Parvasi Newspaper Punjabi Newspaper
ਸਭ ਕੁਝ ਠੀਕ ਨਾ ਪਾਰਟੀ ਆਪ ਅੰਦਰ,
ਗਲ ਬਾਹਰ ਆਈ ਘਰੇ ਨਾ ਰਹੀ ਘੁੱਟੀ ।
ਵਿੱਚ ਕਾਹਲੀ ਦੇ ਬਣੀ ਸੀ ਜੋ ਮਾਲ੍ਹਾ,
ਹਾਰ ਪਿੱਛੋਂ ਉਹ ਮੋਤੀ-ਮੋਤੀ ਹੋ ਟੁੱਟੀ ।
ਝਾਤੀ ਆਪਣੇ ਅੰਦਰ ਕੋਈ ਮਾਰਦਾ ਨਾ,
ਇਕ ਦੂਜੇ ਉਤੇ ਦੋਸ਼ ਸਾਰੇ ਜਾਣ ਸੁੱਟੀ ।
ਖੁਸ ਜਾਏ ਅਹੁਦਾ, ਉਹੀ ਬਣੇ ਵੈਰੀ,
ਟੋਏ ਆਪਣੇ ਹੀ ਰਾਹ ਵਿਚ ਜਾਣ ਪੁੱਟੀ ।
ਉਸ ਜਨਤਾ ਦਾ ਦਰਦ ਨਾ ਦਸ ਹੋਵੇ,
ਛੱਡ ਕੰਮ-ਕਾਰ ਜੋ ਇਹਨਾਂ ਸੀ ਨਾਲ ਜੁੱਟੀ ।
ਪਰਦੇਸੀ ਰਾਂਝੇ ਵੀ ਭਾਲਦੇ ਫਿਰਨ ਟਿੱਲ੍ਹਾ,
ਹੀਰ ਉਹਨਾਂ ਦੀ ਗਈ ਸ਼ਰੇਆਮ ਲੁੱਟੀ ।
ਗਿੱਲ ਬਲਵਿੰਦਰਾ ਸੱਪ ਨਾ ਮਾਰ ਹੋਇਆ,
ਸ਼ੋਰ ਮਚਾਉਣ ਤੇ ਲਕੀਰ ਨੂੰ ਜਾਣ ਕੁੱਟੀ ।
ਗਿੱਲ ਬਲਵਿੰਦਰ
416-558-5530
