ਪੁਲਿਸ ਨੇ ਕਾਰਗੋ ਰੈਕੇਟ ਦਾ ਕੀਤਾ ਪਰਦਾਫਾਸ਼-ਲੱਖਾਂ ਡਾਲਰ ਦੀ ਖੇਪ ਬਰਾਮਦ
ਟੋਰਾਂਟੋ/ਬਿਊਰੋ ਨਿਊਜ਼ : ਕੈਨੇਡਾ ਦੇ ਉਨਟਾਰੀਓ ਸੂਬੇ ਵਿਚ ਇਕ ਵੱਡੀ ਕਾਰਗੋ ਚੋਰੀ ਦੀ ਜਾਂਚ ਵਿਚ 5 ਪੰਜਾਬੀਆਂ ਨੂੰ ਗ੍ਰਿਫਤਾਰ ਕੀਤਾ ਗਿਆ ਹੈ ਅਤੇ ਉਨ੍ਹਾਂ ਤੋਂ 20 ਲੱਖ ਡਾਲਰ ਦੇ ਚੋਰੀ ਹੋਏ ਭੰਗ ਉਤਪਾਦ ਬਰਾਮਦ ਕੀਤੇ ਗਏ ਹਨ। ਇਹ ਇਲਜ਼ਾਮ 15 ਅਪ੍ਰੈਲ 2026 ਨੂੰ ਵਾਪਰੀ ਇਕ ਘਟਨਾ ਤੋਂ ਸ਼ੁਰੂ ਹੋਏ ਹਨ, ਜਦੋਂ ਆਟੋ ਕਾਰਗੋ ਥੈਫਟ ਯੂਨਿਟ (ਏਸੀਟੀਯੂ) ਦੇ ਅਧਿਕਾਰੀ ਮਿਸੀਸਾਗਾ ਵਿਚ ਮੈਕਲਾਫਲਿਨ ਰੋਡ ਅਤੇ ਹਾਈਵੇਅ 401 ਦੇ ਖੇਤਰ ਵਿਚ ਜਾਂਚ ਕਰ ਰਹੇ ਸਨ। ਜਾਂਚ ਦੌਰਾਨ ਪੁਲਿਸ ਨੂੰ ਇਕ ਟ੍ਰੇਲਰ ਮਿਲਿਆ, ਜਿਸਦੀ ਪਹਿਲਾਂ ਨਿਆਗਰਾ ਖੇਤਰ ਤੋਂ ਚੋਰੀ ਹੋਣ ਦੀ ਰਿਪੋਰਟ ਕੀਤੀ ਗਈ ਸੀ। ਇਸ ਟ੍ਰੇਲਰ ਵਿਚ ਭੰਗ ਦੇ ਉਤਪਾਦਾਂ ਦੀ ਇਕ ਵੱਡੀ ਖੇਪ ਸੀ, ਜੋ ਚੋਰੀ ਹੋਣ ਵੇਲੇ ਕਈ ਡਿਪੈਂਸਰੀਆਂ ਵੱਲ ਜਾ ਰਹੀ ਸੀ। ਜਾਂਚ ਕਰਤਾਵਾਂ ਨੇ ਚੋਰੀ ਹੋਏ ਟਰੇਲਰ ਨਾਲ ਜੁੜੇ ਕਈ ਵਿਅਕਤੀਆਂ ਦਾ ਪਤਾ ਲਗਾਇਆ ਹੈ। ਬਾਅਦ ਵਿਚ 5 ਪੰਜਾਬੀਆਂ ਨੂੰ ਗ੍ਰਿਫਤਾਰ ਕੀਤਾ ਗਿਆ। ਉਨ੍ਹਾਂ ਦੇ ਕਬਜ਼ੇ ‘ਚੋਂ ਦੋ ਨਾਜਾਇਜ਼ ਹਥਿਆਰ ਵੀ ਬਰਾਮਦ ਕੀਤੇ ਗਏ ਹਨ। ਮੁਲਜ਼ਮਾਂ ਦੀ ਪਛਾਣ ਮਨਵੀਰ ਸਿੰਘ (21), ਸਰਬਜੀਤ ਸਿੰਘ (32), ਦਿਲਖਾਬ ਸਿੰਘ (21) ਅਤੇ ਜੈਸਕਵਨ ਮੱਲ੍ਹੀ (23), ਸਾਰੇ ਬਰੈਂਪਟਨ ਦੇ ਵਸਨੀਕ, ਅਤੇ ਹੈਮਿਲਟਨ ਦੇ ਕਰਨ ਕੁਮਾਰ (25) ਵਜੋਂ ਹੋਈ ਹੈ।
ਯਾਰਕ ਰੀਜ਼ਨਲ ਪੁਲਿਸ ਵੱਲੋਂ ਸਾਂਝੇ ਕੀਤੇ ਗਏ ਵੇਰਵਿਆਂ ਅਨੁਸਾਰ ਅਗਲੇਰੀ ਜਾਂਚ ਵਿੱਚ ਸਾਹਮਣੇ ਆਇਆ ਕਿ ਟਰੇਲਰ ਚੋਰੀ ਹੋਣ ਸਮੇਂ ਕਈ ਡਿਸਪੈਂਸਰੀਆਂ ਵਿੱਚ ਪਹੁੰਚਾਉਣ ਲਈ ਭਾਰੀ ਮਾਤਰਾ ਵਿੱਚ ਕੈਨਾਬਿਸ ਉਤਪਾਦ ਲੈ ਕੇ ਜਾ ਰਿਹਾ ਸੀ। ਪੁਲਿਸ ਨੇ ਆਸ-ਪਾਸ ਦੇ ਇਲਾਕੇ ਵਿੱਚ ਅਜਿਹੇ ਵਿਅਕਤੀਆਂ ਨੂੰ ਦੇਖਿਆ ਜੋ ਬਾਅਦ ਵਿੱਚ ਚੋਰੀ ਹੋਏ ਟਰੇਲਰ ਨਾਲ ਸਬੰਧਤ ਪਾਏ ਗਏ। ਇਸ ਸਬੰਧੀ ਪੰਜ ਸ਼ੱਕੀਆਂ ਨੂੰ ਹਿਰਾਸਤ ਵਿੱਚ ਲਿਆ ਗਿਆ ਹੈ ਅਤੇ ਤਲਾਸ਼ੀ ਦੌਰਾਨ ਦੋ ਹਥਿਆਰ ਬਰਾਮਦ ਕੀਤੇ ਗਏ ਹਨ। ਪੁਲਿਸ ਨੇ ਮੁਲਜ਼ਮਾਂ ਦੀਆਂ ਤਸਵੀਰਾਂ ਜਾਰੀ ਕੀਤੀਆਂ ਹਨ ਅਤੇ ਕਿਹਾ ਹੈ ਕਿ ਇਸ ਵਿੱਚ ਹੋਰ ਪੀੜਤ ਵੀ ਸ਼ਾਮਲ ਹੋ ਸਕਦੇ ਹਨ। ਕਿਸੇ ਵੀ ਜਾਣਕਾਰੀ ਵਾਲੇ ਵਿਅਕਤੀ ਨੂੰ ਅਧਿਕਾਰੀਆਂ ਨਾਲ ਸੰਪਰਕ ਕਰਨ ਦੀ ਅਪੀਲ ਕੀਤੀ ਗਈ ਹੈ।