ਓਟਵਾ ਦੇ ਪੁਲਿਸ ਮੁਖੀ ਦੀ ਛੁੱਟੀ

ਓਟਵਾ/ਬਿਊਰੋ ਨਿਊਜ਼ : ਕੈਨੇਡਾ ਵਿੱਚ ਕੋਵਿਡ-19 ਪਾਬੰਦੀਆਂ ਖਿਲਾਫ ਟਰੱਕ ਡਰਾਈਵਰਾਂ ਵੱਲੋਂ ਕੀਤੇ ਜਾ ਰਹੇ ਪ੍ਰਦਰਸ਼ਨਾਂ ਦਰਮਿਆਨ ਓਟਵਾ ਪੁਲਿਸ ਮੁਖੀ ਪੀਟਰ ਸਲੋਲੀ ਨੂੰ ਅਹੁਦੇ ਤੋਂ ਹਟਾ ਦਿੱਤਾ ਗਿਆ ਹੈ। ਪਿਛਲੇ ਤਿੰਨ ਹਫ਼ਤਿਆਂ ਤੋਂ ਜਾਰੀ ਰੋਸ ਪ੍ਰਦਰਸ਼ਨਾਂ ਕਰਕੇ ਕੈਨੇਡਾ ਦੀ ਰਾਜਧਾਨੀ ਵਿੱਚ ਕੰਮਕਾਜ ਪੂਰੀ ਤਰ੍ਹਾਂ ਠੱਪ ਹੋ ਕੇ ਰਹਿ ਗਿਆ ਹੈ। ਪ੍ਰਦਰਸ਼ਨਕਾਰੀਆਂ ਖਿਲਾਫ ਹੁਣ ਤੱਕ ਕੋਈ ਕਾਰਵਾਈ ਨਾ ਹੋਣ ਕਰਕੇ ਓਟਵਾ ਪੁਲਿਸ ਮੁਖੀ ਦੀ ਨੁਕਤਾਚੀਨੀ ਹੋ ਰਹੀ ਸੀ। ਇਸ ਦੌਰਾਨ ਪ੍ਰਦਰਸ਼ਨਕਾਰੀਆਂ ਵੱਲੋਂ ਅਮਰੀਕੀ ਸਰਹੱਦ ‘ਤੇ ਲਾਈਆਂ ਰੋਕਾਂ ਦੀ ਗਿਣਤੀ ਘਟ ਕੇ ਇਕ ਰਹਿ ਗਈ ਹੈ। ਪੁਲਿਸ ਮੁਖੀ ਨੂੰ ਅਹੁਦੇ ਤੋਂ ਲਾਂਭੇ ਕਰਨਾ ਤੇ ਰੋਕਾਂ ਦੀ ਗਿਣਤੀ ਘਟਾਉਣ ਦੀਆਂ ਇਹ ਦੋਵੇਂ ਘਟਨਾਵਾਂ ਅਜਿਹੇ ਮੌਕੇ ਸਾਹਮਣੇ ਆਈਆਂ ਹਨ ਜਦੋਂ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨੇ ਕੈਨੇਡਾ ਐਮਰਜੈਂਸੀਜ਼ ਐਕਟ ਲਾਉਣ ਤੇ ਓਟਵਾ ਵਿੱਚ ਜਾਰੀ ਅਸ਼ਾਂਤੀ ਤੇ ਫ਼ਸਾਦ ਨੂੰ ਖ਼ਤਮ ਕਰਨ ਲਈ ਸਖ਼ਤ ਕਾਨੂੰਨੀ ਤੇ ਆਰਥਿਕ ਉਪਰਾਲੇ ਕਰਨ ਦੀ ਧਮਕੀ ਦਿੱਤੀ ਹੈ। ਐਮਰਜੈਂਸੀ ਐਕਟ ਤਹਿਤ ਸਰਕਾਰ ਟਰੱਕ ਡਰਾਈਵਰਾਂ ਦੇ ਬੈਂਕ ਖਾਤਿਆਂ ਨੂੰ ਜਾਮ ਕਰਨ ਦੇ ਨਾਲ ਉਨ੍ਹਾਂ ਦੇ ਲਾਇਸੈਂਸ ਮੁਅੱਤਲ ਕਰ ਸਕਦੀ ਹੈ। ਇਹੀ ਨਹੀਂ ਐਕਟ ਵਿੱਚ ਟਰੱਕ ਨੂੰ ਟੋਅ ਕਰਨ ਦੀ ਵੀ ਵਿਵਸਥਾ ਹੈ। ਟਰੱਕ ਡਰਾਈਵਰਾਂ ਵੱਲੋਂ ਕੀਤੇ ਜਾ ਰਹੇ ਪ੍ਰਦਰਸ਼ਨਾਂ, ਜਿਸ ਨੂੰ ਫਰੀਡਮ ਕੋਨਵਾਏ ਭਾਵ ‘ਆਜ਼ਾਦੀ ਦੇ ਕਾਫ਼ਲੇ’ ਦਾ ਨਾਮ ਦਿੱਤਾ ਗਿਆ ਹੈ, ਖਿਲਾਫ਼ ਕਈ ਸਥਾਨਕ ਵਿਅਕਤੀਆਂ ਨੇ ਸ਼ਿਕਾਇਤ ਕੀਤੀ ਹੈ। ਸਥਾਨਕ ਬਾਸ਼ਿੰਦਿਆਂ ਨੇ ਸ਼ਿਕਾਇਤ ਵਿੱਚ ਟਰੱਕ ਡਰਾਈਵਰਾਂ ਵੱਲੋਂ ਉਨ੍ਹਾਂ ਨੂੰ ਤੰਗ ਪ੍ਰੇਸ਼ਾਨ ਤੇ ਸੜਕਾਂ ‘ਤੇ ਡਰਾਉਣ ਧਮਕਾਉਣ ਦਾ ਦਾਅਵਾ ਕੀਤਾ ਹੈ। ਓਟਵਾ ਪੁਲਿਸ ਸੇਵਾਵਾਂ ਬੋਰਡ ਦੀ ਪ੍ਰਧਾਨ ਡਾਇਨਾ ਡੀਨਜ਼ ਨੇ ਸਲੋਲੀ ਨੂੰ ਅਹੁਦੇ ਤੋਂ ਹਟਾਉਣ ਦਾ ਐਲਾਨ ਕਰਦਿਆਂ ਕਿਹਾ ਕਿ ਪ੍ਰਦਰਸ਼ਨਕਾਰੀਆਂ ਨੇ ਡਾਊਨਟਾਊਨ ਨੂੰ ਵੱਡੀਆਂ ਸਕਰੀਨਾਂ, ਹੌਟ ਟੱਬ ਤੇ ਆਊਟਡੋਰ ਜਿਮਾਂ ਨਾਲ ਸਟਰੀਟ ਪਾਰਟੀ ਵਿੱਚ ਤਬਦੀਲ ਕਰ ਦਿੱਤਾ ਹੈ।