ਪੰਜਾਬੀ ਸੰਸਦ ਮੈਂਬਰਾਂ ਦਾ ਗੜ੍ਹ ਮੰਨੇ ਜਾਂਦੇ ਬਰੈਂਪਟਨ ‘ਚ ਪੰਜਾਬੀ ਮੇਅਰ ਉਮੀਦਵਾਰਾਂ ਦੀ ਹਾਰ

ਸਤਪਾਲ ਸਿੰਘ ਜੋਹਲ, ਗੁਰਪ੍ਰੀਤ ਸਿੰਘ ਢਿੱਲੋਂ ਤੇ ਜਗਦੀਸ਼ ਸਿੰਘ ਗਰੇਵਾਲ ਹਾਰੇ
ਬਰੈਂਪਟਨ/ਪਰਵਾਸੀ ਨਿਊਜ਼ : ਕੈਨੇਡਾ ਦੇ ਉਨਟਾਰੀਓ ਸੂਬੇ ਦੀਆਂ 114 ਸਥਾਨਕ ਸਰਕਾਰਾਂ ਦੀਆਂ ਹੋਈਆਂ ਚੋਣਾਂ ਵਿੱਚ ਪੰਜਾਬੀ ਕਿਧਰੇ ਵੀ ਮੇਅਰ ਨਹੀਂ ਬਣਾ ਸਕੇ। ਕੈਨੇਡਾ ਦੇ ਸੰਘਣੀ ਵਸੋਂ ਵਾਲੇ ਇਲਾਕੇ ਬਰੈਂਪਟਨ ਦੀ ਸਿਟੀ ਕੌਂਸਲ ਵਿੱਚ ਪੈਟ੍ਰਿਕ ਬ੍ਰਾਊਨ 65,893 ਵੋਟਾਂ ਲੈ ਕੇ ਤੀਜੀ ਵਾਰ ਮੇਅਰ ਚੁਣੇ ਗਏ ਹਨ। ਜ਼ਿਕਰਯੋਗ ਹੈ ਕਿ ਬਰੈਂਪਟਨ ਦੇ 6 ਪਾਰਲੀਮੈਂਟ ਹਲਕਿਆਂ ਵਿੱਚ ਪੰਜਾਬੀ ਹੀ ਐੱਮ.ਪੀ. ਹਨ, ਚਾਹੇ ਉਹ ਕਿਸੇ ਵੀ ਪਾਰਟੀ ਨਾਲ ਸਬੰਧਤ ਹੋਣ। ਮੇਅਰ ਦੇ ਅਹੁਦੇ ਲਈ ਪੰਜ ਪੰਜਾਬੀ ਚੋਣ ਮੈਦਾਨ ਵਿੱਚ ਸਨ, ਜਿਨ੍ਹਾਂ ਵਿੱਚੋਂ ਪ੍ਰਭ ਗਿੱਲ ਤੀਜੇ ਨੰਬਰ ‘ਤੇ ਰਹਿੰਦਿਆਂ ਚੋਣ ਹਾਰ ਗਏ ਹਨ।
ਬਰੈਂਪਟਨ ਕੌਂਸਲ ਵਿੱਚ ਨਵਜੀਤ ਕੌਰ ਬਰਾੜ, ਗੁਰਪ੍ਰਤਾਪ ਸਿੰਘ ਤੂਰ (ਜਾਂ ਤਰਨ ਚਾਹਲ) ਅਤੇ ਹਰਕੀਰਤ ਸਿੰਘ ਕੌਂਸਲਰ ਚੁਣੇ ਗਏ ਹਨ, ਜਦਕਿ ਸੁਖਮਨ ਸੰਘਾ ਰੀਜਨਲ ਕੌਂਸਲਰ ਬਣੇ ਹਨ। ਪੀਲ ਬੋਰਡ ਸਕੂਲ ਟਰੱਸਟੀਆਂ ਵਿੱਚ ਜੋਤ ਧਾਲੀਵਾਲ ਅਤੇ ਖ਼ੁਸ਼ਪਾਲ ਗਿੱਲ (ਜਾਂ ਖ਼ੁਸ਼ਪਾਲ ਸਿੰਘ) ਚੁਣੇ ਗਏ ਹਨ। ਜ਼ਿਕਰਯੋਗ ਹੈ ਕਿ ਸਿਟੀ ਕੌਂਸਲ ਲਈ ਪੰਜ ਕੌਂਸਲਰ, ਪੰਜ ਰੀਜਨਲ ਕੌਂਸਲਰ ਅਤੇ ਪੰਜ ਹੀ ਸਕੂਲ ਟਰੱਸਟੀ ਚੁਣੇ ਜਾਂਦੇ ਹਨ।
ਇਸੇ ਤਰ੍ਹਾਂ ਨਾਲ ਲੱਗਦੀ ਕੈਲੇਡਨ ਸਿਟੀ ਕੌਂਸਲ ਵਿੱਚ ਸਿਰਫ਼ ਇੱਕ ਪੰਜਾਬੀ, ਜਗਰਾਜ ਸਿੰਘ ਸੇਖੋਂ, ਚੋਣ ਜਿੱਤੇ ਹਨ। ਨਾਮੀ ਪੰਜਾਬੀ ਚਿਹਰੇ ਸਤਪਾਲ ਸਿੰਘ ਜੋਹਲ, ਗੁਰਪ੍ਰੀਤ ਸਿੰਘ ਢਿੱਲੋਂ ਅਤੇ ਜਗਦੀਸ਼ ਸਿੰਘ ਗਰੇਵਾਲ ਚੋਣ ਹਾਰ ਗਏ ਹਨ।