ਕੈਨੇਡਾ ਭਰ ਵਿੱਚ 911 ਸੇਵਾ ਬਹਾਲ

ਪ੍ਰਭਜੋਤ ਸਿੰਘ, LJI ਰਿਪੋਰਟਰ
ਕੈਨੇਡਾ ਭਰ ਦੀਆਂ ਕਈ ਪੁਲਿਸ ਸੇਵਾਵਾਂ ਨੇ ਦੱਸਿਆ ਕਿ ਵੀਰਵਾਰ ਸਵੇਰੇ ਉਨ੍ਹਾਂ ਦੀਆਂ 911 ਲਾਈਨਾਂ ਬੰਦ ਸਨ, ਹਾਲਾਂਕਿ ਬਹੁਤ ਸਾਰੇ ਮਾਮਲਿਆਂ ਵਿੱਚ ਇਹ ਸਮੱਸਿਆ ਇੱਕ ਜਾਂ ਦੋ ਘੰਟਿਆਂ ਦੇ ਅੰਦਰ-ਅੰਦਰ ਹੱਲ ਹੁੰਦੀ ਦਿਖਾਈ ਦਿੱਤੀ। ਟੋਰਾਂਟੋ, ਓਟਾਵਾ, ਲੰਡਨ (ਓਨਟਾਰੀਓ) ਅਤੇ ਵਾਟਰਲੂ (ਓਨਟਾਰੀਓ) ਸਮੇਤ ਕਈ ਪੁਲਿਸ ਸੇਵਾਵਾਂ ਨੇ ਸੋਸ਼ਲ ਮੀਡੀਆ ‘ਤੇ ਇਨ੍ਹਾਂ ਰੁਕਾਵਟਾਂ ਬਾਰੇ ਜਾਣਕਾਰੀ ਦਿੱਤੀ ਅਤੇ ਨਿਵਾਸੀਆਂ ਨੂੰ ਅਪੀਲ ਕੀਤੀ ਕਿ ਉਹ ਐਮਰਜੈਂਸੀ ਦੀ ਸਥਿਤੀ ਵਿੱਚ ਗੈਰ-ਐਮਰਜੈਂਸੀ ਲਾਈਨਾਂ ‘ਤੇ ਕਾਲ ਕਰਨ। ਵੀਰਵਾਰ ਸਵੇਰੇ, ‘ਬੈੱਲ’ (Bell) ਕੰਪਨੀ ਨੂੰ ਆਪਣੇ ਮੁੱਖ ‘ਨੈਕਸਟ ਜਨਰੇਸ਼ਨ’ (NG)) 9-1-1 ਨੈੱਟਵਰਕ ਵਿੱਚ ਤਕਰੀਬਨ ਸਵੇਰੇ 3:13 ਵਜੇ (ET) ਸਮੱਸਿਆ ਦਾ ਸਾਹਮਣਾ ਕਰਨਾ ਪਿਆ ਅਤੇ ਸੇਵਾ ਸਵੇਰੇ 4:40 ਵਜੇ (ET) ਬਹਾਲ ਕਰ ਦਿੱਤੀ ਗਈ।
ਓਨਟਾਰੀਓ ਪ੍ਰੋਵਿੰਸ਼ੀਅਲ ਪੁਲਿਸ (OPP) ਨੇ ਵੀ ਕਿਹਾ ਕਿ ਉਨ੍ਹਾਂ ਨੂੰ ਸੂਬੇ ਦੇ ਕੁਝ ਹਿੱਸਿਆਂ ਵਿੱਚ 911 ਸੇਵਾ ਵਿੱਚ ਰੁਕ-ਰੁਕ ਕੇ ਆ ਰਹੀਆਂ ਦਿੱਕਤਾਂ ਬਾਰੇ ਸੂਚਿਤ ਕੀਤਾ ਗਿਆ ਸੀ, ਜਦੋਂ ਕਿ ‘ਸੁਰੇਤੇ ਦੂ ਕਿਊਬਿਕ’ (Surete du Quebec ) ਨੇ ਕਿਹਾ ਕਿ ਤਕਨੀਕੀ ਸਮੱਸਿਆਵਾਂ ਕਾਰਨ ਕੁਝ 911 ਕਾਲਾਂ ਦੇ ਤਬਾਦਲੇ (ਟਰਾਂਸਫਰ) ਵਿੱਚ ਦਿੱਕਤ ਆ ਰਹੀ ਸੀ। ਬਹੁਤਿਆਂ ਨੇ ਦੱਸਿਆ ਕਿ ਇਹ ਸਮੱਸਿਆ ਸਵੇਰੇ 7:30 ਵਜੇ (ET) ਦੇ ਕਰੀਬ ਹੱਲ ਹੋ ਗਈ ਸੀ।
OPP ਨੇ ਕਿਹਾ ਕਿ ਹਾਲਾਂਕਿ 911 ਸਿਸਟਮ ਨੂੰ ਜ਼ਿਆਦਾਤਰ ਬਹਾਲ ਕਰ ਦਿੱਤਾ ਗਿਆ ਹੈ, ਪਰ ”ਇਹ ਸੰਭਵ ਹੈ ਕਿ ਰੁਕ-ਰੁਕ ਕੇ ਆਉਣ ਵਾਲੀਆਂ ਰੁਕਾਵਟਾਂ ਅਜੇ ਵੀ ਮੌਜੂਦ ਹੋ ਸਕਦੀਆਂ ਹਨ।”
ਓਨਟਾਰੀਓ ਪੁਲਿਸ ਬਲ ਨੇ ਇੱਕ ਤਾਜ਼ਾ ਬਿਆਨ ਵਿੱਚ ਕਿਹਾ, ”ਜੇਕਰ ਤੁਸੀਂ 911 ਡਾਇਲ ਕਰਕੇ OPP ਨਾਲ ਸੰਪਰਕ ਕਰਨ ਵਿੱਚ ਅਸਮਰੱਥ ਹੋ, ਤਾਂ ਕਿਰਪਾ ਕਰਕੇ OPP ਦੀ ਗੈਰ-ਐਮਰਜੈਂਸੀ ਲਾਈਨ 1-888-310-1122 ‘ਤੇ ਕਾਲ ਕਰੋ। ਸਿਸਟਮ ਦੀ ਜਾਂਚ ਕਰਨ ਜਾਂ ਇਹ ਪਤਾ ਲਗਾਉਣ ਲਈ ਕਿ ਕੀ ਇਹ ਤੁਹਾਡੇ ਲਈ ਕੰਮ ਕਰ ਰਿਹਾ ਹੈ, 911 ‘ਤੇ ਕਾਲ ਨਾ ਕਰੋ।”
ਮਾਂਟਰੀਅਲ ਪੁਲਿਸ ਦੇ ਇੱਕ ਬੁਲਾਰੇ ਦਾ ਕਹਿਣਾ ਹੈ ਕਿ ਇਸ ਸੇਵਾ-ਬੰਦੀ (outage) ਨੇ 911 ਸੇਵਾ ਲਈ ਜ਼ਿੰਮੇਵਾਰ ਟੈਲੀਫੋਨ ਕੰਪਨੀ ਨੂੰ ਪ੍ਰਭਾਵਿਤ ਕੀਤਾ। ਬੁਲਾਰੇ ਅਨੁਸਾਰ, ਭਾਵੇਂ ਕਾਲਾਂ ਆ ਵੀ ਰਹੀਆਂ ਸਨ, ਪਰ ਇਸ ਗੱਲ ਦੀ ਸੰਭਾਵਨਾ ਸੀ ਕਿ ਉਨ੍ਹਾਂ ਨੂੰ ਦੇਸ਼ ਦੇ ਕਿਸੇ ਹੋਰ ਹਿੱਸੇ ਦੀਆਂ ਪੁਲਿਸ ਸੇਵਾਵਾਂ ਵੱਲ ਤਬਦੀਲ (ਟਰਾਂਸਫਰ) ਕਰ ਦਿੱਤਾ ਜਾਂਦਾ।
ਹੋਰ ਪੂਰਬ ਵੱਲ, ਨੋਵਾ ਸਕੋਸ਼ੀਆ ਸਰਕਾਰ ਦਾ ਕਹਿਣਾ ਹੈ ਕਿ 911 ਸੇਵਾ ਵਿੱਚ ਰੁਕ-ਰੁਕ ਕੇ ਆ ਰਹੀਆਂ ਦਿੱਕਤਾਂ ਕੁਝ ਸੈਲਫੋਨ ਅਤੇ VoIP ਉਪਭੋਗਤਾਵਾਂ ਨੂੰ ਪ੍ਰਭਾਵਿਤ ਕਰ ਸਕਦੀਆਂ ਹਨ।