ਰਿਸ਼ੀ ਕਪੂਰ ਦੇ ਪਿਸ਼ਾਵਰ ਸਥਿਤ ਜੱਦੀ ਘਰ ਨੂੰ ਢਾਹੁਣਾ ਚਾਹੁੰਦਾ ਹੈ ਮਾਲਕ

‘ਕਪੂਰ ਹਵੇਲੀ’ ਨੂੰ ਢਾਹ ਕੇ ਵਪਾਰਕ ਕੰਪਲੈਕਸ ਬਣਾਉਣ ਦੀ ਸਕੀਮ
ਪਿਸ਼ਾਵਰ/ਬਿਊਰੋ ਨਿਊਜ਼
ਮਰਹੂਮ ਬੌਲੀਵੁੱਡ ਅਦਾਕਾਰ ਰਿਸ਼ੀ ਕਪੂਰ ਦੇ ਪਿਸ਼ਾਵਰ ਸਥਿਤ ਇਤਿਹਾਸਕ ਜੱਦੀ ਘਰ ‘ਕਪੂਰ ਹਵੇਲੀ’ ਨੂੰ ਢਹਿ-ਢੇਰੀ ਕੀਤੇ ਜਾਣ ਦਾ ਖ਼ਤਰਾ ਖੜ੍ਹਾ ਹੋ ਗਿਆ ਹੈ। ਘਰ ਦਾ ਮੌਜੂਦਾ ਮਾਲਕ ਉੱਥੇ ਇਕ ਵਪਾਰਕ ਕੰਪਲੈਕਸ ਉਸਾਰਨਾ ਚਾਹੁੰਦਾ ਹੈ। ਸੰਨ 2018 ਵਿਚ ਪਿਸ਼ਾਵਰ (ਖ਼ੈਬਰ ਪਖ਼ਤੂਨਖ਼ਵਾ) ਦੇ ਕਿੱਸਾ ਖ਼ਵਾਨੀ ਬਾਜ਼ਾਰ ‘ਚ ਸਥਿਤ ਇਸ ਹਵੇਲੀ ਨੂੰ ਪਾਕਿਸਤਾਨ ਸਰਕਾਰ ਨੇ ਅਜਾਇਬ ਘਰ ਵਿਚ ਤਬਦੀਲ ਕਰਨ ਦਾ ਫ਼ੈਸਲਾ ਲਿਆ ਸੀ।ઠ
ਰਿਸ਼ੀ ਨੇ ਪਾਕਿ ਸਰਕਾਰ ਨੂੰ ਇਸ ਬਾਰੇ ਅਪੀਲ ਕੀਤੀ ਸੀ। ਵਿਦੇਸ਼ ਮੰਤਰੀ ਸ਼ਾਹ ਮਹਿਮੂਦ ਕੁਰੈਸ਼ੀ ਨੇ ਰਿਸ਼ੀ ਕਪੂਰ ਨੂੰ ਭਰੋਸਾ ਦਿਵਾਇਆ ਸੀ ਕਿ ਸਰਕਾਰ ਇਸ ਨੂੰ ਅਜਾਇਬ ਘਰ ਵਿਚ ਬਦਲੇਗੀ। ਇਲਾਕਾ ਵਾਸੀਆਂ ਦਾ ਕਹਿਣਾ ਹੈ ਕਿ ਹਵੇਲੀ ਭੂਤੀਆ ਇਮਾਰਤ ਵਿਚ ਤਬਦੀਲ ਹੋ ਚੁੱਕੀ ਹੈ। ਇਮਾਰਤ ਦੀ ਹਾਲਤ ਖ਼ਸਤਾ ਹੈ ਤੇ ਇਹ ਕਿਸੇ ਵੇਲੇ ਵੀ ਢਹਿ ਸਕਦੀ ਹੈ। ਮੀਂਹ, ਭੁਚਾਲਾਂ ਤੇ ਤੇਜ਼ ਹਵਾਵਾਂ ਨੇ ਸਮੇਂ ਨਾਲ ਇਸ ਦੀ ਹਾਲਤ ਬੇਹੱਦ ਖ਼ਸਤਾ ਕਰ ਦਿੱਤੀ ਹੈ। ਹਵੇਲੀ ਦਾ ਮਾਲਕ ਪਿਸ਼ਾਵਰ ਦਾ ਅਮੀਰ ਗਹਿਣਾ ਵਪਾਰੀ ਹਾਜੀ ਮੁਹੰਮਦ ਇਸਰਾਰ ਹੈ। ਸੂਬਾ ਸਰਕਾਰ ਹਵੇਲੀ ਦੀ ਇਤਿਹਾਸਕ ਮਹੱਤਤਾ ਦੇ ਮੱਦੇਨਜ਼ਰ ਇਸ ਨੂੰ ਖ਼ਰੀਦ ਕੇ ਇਸ ਦਾ ਪੁਰਾਣਾ ਰੂਪ ਬਹਾਲ ਕਰਨਾ ਚਾਹੁੰਦੀ ਹੈ ਤਾਂ ਕਿ ਸੈਲਾਨੀਆਂ ਨੂੰ ਖਿੱਚਿਆ ਜਾ ਸਕੇ। ਹਵੇਲੀ ਸ਼ਹਿਰ ਦੀ ਕਾਫ਼ੀ ਮਹਿੰਗੀ ਤੇ ਅਹਿਮ ਥਾਂ ‘ਤੇ ਸਥਿਤ ਹੈ।
ਮਾਲਕ ਪਹਿਲਾਂ ਵੀ ਇਸ ਨੂੰ ਢਹਿ-ਢੇਰੀ ਕਰਨ ਦਾ ਯਤਨ ਕਰ ਚੁੱਕਾ ਹੈ, ਪਰ ਸੂਬੇ ਦੇ ਵਿਰਾਸਤਾਂ ਬਾਰੇ ਵਿਭਾਗ ਵੱਲੋਂ ਕੇਸ ਦਰਜ ਕਰਵਾਏ ਜਾਣ ਕਾਰਨ ਉਹ ਅਜਿਹਾ ਨਹੀਂ ਕਰ ਸਕਿਆ ਸੀ। ਕੁਝ ਰਿਪੋਰਟਾਂ ਮੁਤਾਬਕ ਮਾਲਕ ਤੇ ਸੂਬਾ ਸਰਕਾਰ ਵਿਚਾਲੇ ਇਸ ਦੀ ਕੀਮਤ ਬਾਰੇ ਸਹਿਮਤੀ ਨਹੀਂ ਬਣ ਸਕੀ ਹੈ। ਹਾਲਾਂਕਿ ਇਸਰਾਰ ਨੇ ਇਸ ਤੋਂ ਇਨਕਾਰ ਕੀਤਾ ਹੈ। ‘ਕਪੂਰ ਹਵੇਲੀ’ ਦੀ ਉਸਾਰੀ ਬੌਲੀਵੁੱਡ ਦੇ ਸੰਸਥਾਪਕ ਮੰਨੇ ਜਾਂਦੇ ਪ੍ਰਿਥਵੀਰਾਜ ਕਪੂਰ ਦੇ ਪਿਤਾ ਬਸ਼ੇਸਵਰਨਾਥ ਕਪੂਰ ਨੇ ਕੀਤੀ ਸੀ। ਪ੍ਰਿਥਵੀਰਾਜ ਦੇ ਪੋਤਰਿਆਂ ਰਿਸ਼ੀ ਤੇ ਰਣਧੀਰ ਕਪੂਰ ਨੇ 1990 ਵਿਚ ਹਵੇਲੀ ਦਾ ਦੌਰਾ ਵੀ ਕੀਤਾ ਸੀ।