ਰੌਨ ਚੱਠਾ ਪੀਲ ਪੁਲਿਸ ਬੋਰਡ ਦੇ ਨਵੇਂ ਚੇਅਰ ਬਣੇ

ਮਿਸੀਸਾਗਾ : ਰੌਨ ਚੱਠਾ ਪੀਲ ਪੁਲਿਸ ਬੋਰਡ ਦੇ ਨਵੇਂ ਚੇਅਰ ਬਣ ਗਏ ਹਨ ਅਤੇ ਇਹ ਸਥਾਨਕ ਪੰਜਾਬੀ ਭਾਈਚਾਰੇ ਲਈ ਮਾਣ ਵਾਲੀ ਗੱਲ ਹੈ। ਇਸ ਤੋਂ ਬਾਅਦ ਰੌਨ ਚੱਠਾ ਨੇ ਆਖਿਆ ਕਿ ਬੇਸ਼ੱਕ ਉਹਨਾਂ ਕੋਲ ਪੀਲ ਬੋਰਡ ਉੱਤੇ ਕੰਮ ਕਰਨ ਦਾ ਸਿਰਫ਼ ਇੱਕ ਸਾਲ ਦਾ ਹੀ ਤਜ਼ਰਬਾ ਹੈ ਪਰ ਪੀਲ ਚਿਲਡਰਨ ਏਡ ਫਾਉਂਡੇਸ਼ਨ ਦੇ ਮੈਂਬਰ, ਬਰੈਂਪਟਨ ਦੀ ਸਕੂਲ ਟਰੈਫਿਕ ਸੇਫਟੀ ਕਮੇਟੀ ਦੇ ਮੈਂਬਰ ਅਤੇ ਸਿਟੀ ਆਫ ਬਰੈਂਪਟਨ ਦੀ ਕਮੇਟੀ ਆਫ ਅਡਜਸਟਮੈਂਟ ਦੇ ਵਾਈਸ ਚੇਅਰ ਵਜੋਂ ਉਹ ਕਮਿਉਨਿਟੀ ਵਿੱਚ ਲਗਾਤਾਰ ਯੋਗਦਾਨ ਪਾਉਂਦੇ ਆਏ ਹਨ। ਰੌਨ ਚੱਠਾ ਨੇ ਆਖਿਆ ਕਿ ਇਸ ਵੇਲੇ ਪੀਲ ਪੁਲਿਸ ਮੁਖੀ ਅਤੇ ਪੁਲਿਸ ਬੋਰਡ ਦਰਮਿਆਨ ਬਹੁਤ ਹੀ ਵਧੀਆ ਤਾਲਮੇਲ ਹੈ ਜਿਸਦੇ ਨਤੀਜੇ ਆਮ ਹੀ ਵੇਖਣ ਨੂੰ ਮਿਲਦੇ ਹਨ। ਪੀਲ ਪੁਲਿਸ ਨੂੰ ਹਾਲ ਵਿੱਚ ਹੀ ਮਿਲੀ 20.5 ਮਿਲੀਅਨ ਰਾਸ਼ੀ ਦਾ ਸਵਾਗਤ ਕਰਦਿਆਂ ਉਹਨਾਂ ਕਿਹਾ ਕਿ ਪੀਲ ਪੁਲਿਸ ਹਿੰਸਾ ਦੇ ਰੁਝਾਨ ਨੂੰ ਕਾਬੂ ਕਰਨ ਲਈ ਵਚਨਬੱਧ ਹੈ। ਰੌਨ ਚੱਠਾ ਮੁਤਾਬਕ ਪੁਲਿਸ ਬੋਰਡ ਅਗਲੇ ਦਿਨਾਂ ਵਿੱਚ ਫੈਸਲਾ ਕਰੇਗਾ ਕਿ ਪੁਲਿਸ ਫੋਰਸ ਨੂੰ ਕੁੱਲ ਕਿੰਨੇ ਡਿਪਟੀ ਚੀਫ ਦੀ ਲੋੜ ਹੈ ਅਤੇ ਉਸ ਲੋੜ ਨੂੰ ਪੂਰਾ ਕਰਨ ਲਈ ਕਦਮ ਚੁੱਕੇ ਜਾਣਗੇ। ਇਸ ਵਕਤ ਪੀਲ ਪੁਲਿਸ ਵਿੱਚ 4 ਡਿਪਟੀ ਹਨ।