ਈਰਾਨ ਦੇ ਜਰਨੈਲ ‘ਤੇ ਹਮਲੇ ਬਾਰੇ ਅਮਰੀਕਾ ਨੇ ਨਹੀਂ ਦਿੱਤੀ ਜਾਣਕਾਰੀ : ਟਰੂਡੋ

ਟੋਰਾਂਟੋ/ਸਤਪਾਲ ਸਿੰਘ ਜੌਹਲ : ਕੈਨੇਡਾ ਦੇ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨੇ ਈਰਾਨ ‘ਚ ਡੇਗੇ ਗਏ ਯਾਤਰੀ ਜਹਾਜ਼ ਦੇ ਮ੍ਰਿਤਕਾਂ ਦੇ ਪਰਿਵਾਰਾਂ ਨਾਲ ਡੂੰਘੀ ਹਮਦਰਦੀ ਦਾ ਪ੍ਰਗਟਾਵਾ ਕੀਤਾ ਹੈ। ਪ੍ਰੇਸ਼ਾਨੀ ਦੇ ਆਲਮ ‘ਚ ਉਨ੍ਹਾਂ ਆਖਿਆ ਕਿ ਅਮਰੀਕੀ ਪ੍ਰਸ਼ਾਸਨ ਨੇ ਈਰਾਨ ਦੇ ਫ਼ੌਜੀ ਜਰਨੈਲ ਉਪਰ ਹਮਲਾ ਕਰਨ ਬਾਰੇ ਕੋਈ ਅਗਾਊਂ ਜਾਣਕਾਰੀ ਨਹੀਂ ਦਿੱਤੀ ਸੀ। ਟਰੂਡੋ ਨੇ ਕਿਹਾ ਕਿ ਜੇਕਰ ਈਰਾਨ ਅਤੇ ਅਮਰੀਕਾ ਵਿਚਕਾਰ ਤਣਾਓ ਨਾ ਵਧਦਾ ਤਾਂ ਯੁਕਰੇਨ ਇੰਟਰਨੈਸ਼ਨਲ ਏਅਰਲਾਈਨਜ਼ ਦੇ ਜਹਾਜ਼ ‘ਚ ਮਾਰੇ ਗਏ ਸਾਰੇ 176 ਲੋਕ ਅੱਜ ਜਿਊਂਦੇ ਹੋਣੇ ਸਨ। ਇਹ ਵੀ ਕਿ ਝਗੜਿਆਂ ਅਤੇ ਜੰਗ ਦਾ ਸ਼ਿਕਾਰ ਆਮ ਲੋਕ ਹੁੰਦੇ ਹਨ। ਟਰੂਡੋ ਨੇ ਕਿਹਾ ਕਿ ਅਮਰੀਕੀ ਪ੍ਰਸ਼ਾਸਨ ਵਲੋਂ ਆਪਣੇ ਭਾਈਵਾਲ ਦੇਸ਼ ਦੇ ਤੌਰ ‘ਤੇ ਕੈਨੇਡਾ ਨੂੰ ਅਗਾਊਂ ਸਾਵਧਾਨ ਕੀਤਾ ਜਾਣਾ ਚਾਹੀਦਾ ਸੀ। ਉਨ੍ਹਾਂ ਆਖਿਆ ਕਿ ਸਾਰੇ ਕੈਨੇਡਾ ਵਾਸੀਆਂ ਦੀ ਤਰ੍ਹਾਂ ਮੈਂ ਆਪ ਵੀ ਸਦਮੇ ‘ਚ ਹਾਂ।