ਖੁਰਾਕ, ਘਰ ਦੀ ਸੁਰੱਖਿਆ ਅਤੇ ਟਰਾਂਸਪੋਰਟ ਤੱਕ ਪੈਣਗੇ ਅਸਰ
ਉਨਟਾਰੀਓ/ਬਿਊਰੋ ਨਿਊਜ਼ : ਨਵਾਂ ਸਾਲ 2026 ਆਉਣ ਨਾਲ ਹੀ ਉਨਟਾਰੀਓ ਦੇ ਵਸਨੀਕਾਂ ਦੀ ਰੋਜ਼ਾਨਾ ਜ਼ਿੰਦਗੀ ਵਿੱਚ ਕਈ ਮਹੱਤਵਪੂਰਨ ਕਾਨੂੰਨੀ ਅਤੇ ਨਿਯਮਕ ਬਦਲਾਅ ਲਾਗੂ ਹੋਣ ਜਾ ਰਹੇ ਹਨ। 1 ਜਨਵਰੀ 2026 ਤੋਂ ਇਹ ਬਦਲਾਅ ਖਾਣ-ਪੀਣ ਦੀਆਂ ਵਸਤੂਆਂ, ਕਰਿਆਨਾ ਵਪਾਰ, ਘਰ ਦੀ ਸੁਰੱਖਿਆ ਅਤੇ ਸੜਕ ਸੁਰੱਖਿਆ ਨਾਲ ਜੁੜੇ ਹੋਣਗੇ। ਸਰਕਾਰ ਦਾ ਕਹਿਣਾ ਹੈ ਕਿ ਇਹ ਕਦਮ ਲੋਕਾਂ ਦੀ ਸਿਹਤ, ਸੁਰੱਖਿਆ ਅਤੇ ਨਿਆਂਪੂਰਨ ਵਪਾਰਕ ਪ੍ਰਣਾਲੀ ਨੂੰ ਮਜ਼ਬੂਤ ਕਰਨ ਲਈ ਚੁੱਕੇ ਜਾ ਰਹੇ ਹਨ।
ਹੈਲਥ ਕੈਨੇਡਾ ਵੱਲੋਂ ਜਾਰੀ ਨਵੇਂ ਨਿਯਮਾਂ ਅਨੁਸਾਰ ਗਾਂ ਦੇ ਦੁੱਧ ਅਤੇ ਬਟਰ ਸਪ੍ਰੈਡ ਵਿੱਚ ਵਿਟਾਮਿਨ ਡੀ ਦੀ ਮਾਤਰਾ ਦੁੱਗਣੀ ਕੀਤੀ ਜਾਵੇਗੀ। ਇਸਦੇ ਨਾਲ ਹੀ ਬੱਕਰੀ ਦੇ ਦੁੱਧ ਵਿੱਚ ਵੀ ਵਿਟਾਮਿਨ ਡੀ ਦੀ ਮਨਜ਼ੂਰਸ਼ੁਦਾ ਮਾਤਰਾ ਵਧਾ ਦਿੱਤੀ ਗਈ ਹੈ। ਹੈਲਥ ਕੈਨੇਡਾ ਮੁਤਾਬਕ, ਵਿਟਾਮਿਨ ਡੀ ਹੱਡੀਆਂ ਦੀ ਮਜ਼ਬੂਤੀ ਲਈ ਬਹੁਤ ਜ਼ਰੂਰੀ ਹੈ, ਪਰ ਹਰ ਪੰਜ ਵਿੱਚੋਂ ਇੱਕ ਕੈਨੇਡੀਅਨ ਨੂੰ ਇਸਦੀ ਪੂਰੀ ਮਾਤਰਾ ਨਹੀਂ ਮਿਲ ਰਹੀ। ਇਸ ਤੋਂ ਪਹਿਲਾਂ ਯੋਗਰਟ ਅਤੇ ਕੇਫਿਰ ਵਿੱਚ ਵੀ ਵਿਟਾਮਿਨ ਡੀ ਸ਼ਾਮਿਲ ਕਰਨ ਦੀ ਮਨਜ਼ੂਰੀ ਦਿੱਤੀ ਜਾ ਚੁੱਕੀ ਹੈ।
ਇਸੇ ਦਿਨ ਤੋਂ ਕੈਨੇਡਾ ਦਾ ਨਵਾਂ ਗਰੋਸਰੀ ਕੋਡ ਆਫ ਕੰਡਕਟ ਵੀ ਲਾਗੂ ਹੋਵੇਗਾ। ਇਸ ਦਾ ਮਕਸਦ ਕਰਿਆਨਾ ਸਪਲਾਈ ਚੇਨ ਵਿੱਚ ਵੱਡੇ ਸਟੋਰਾਂ ਅਤੇ ਸਪਲਾਇਰਾਂ ਦਰਮਿਆਨ ਨਿਆਂਪੂਰਨ ਅਤੇ ਪਾਰਦਰਸ਼ੀ ਵਪਾਰਕ ਸਬੰਧ ਬਣਾਉਣਾ ਹੈ। ਮਾਹਿਰਾਂ ਦਾ ਕਹਿਣਾ ਹੈ ਕਿ ਇਸ ਨਾਲ ਕਰਿਆਨੇ ਦੀਆਂ ਕੀਮਤਾਂ ਤੁਰੰਤ ਘਟਣ ਦੀ ਉਮੀਦ ਨਹੀਂ, ਪਰ ਲੰਬੇ ਸਮੇਂ ਵਿੱਚ ਖਾਦ ਮਹਿੰਗਾਈ ਨੂੰ ਸਥਿਰ ਕਰਨ ਵਿੱਚ ਮਦਦ ਮਿਲ ਸਕਦੀ ਹੈ।
ਘਰ ਦੀ ਸੁਰੱਖਿਆ ਨੂੰ ਧਿਆਨ ਵਿੱਚ ਰੱਖਦਿਆਂ ਉਨਟਾਰੀਓ ਫਾਇਰ ਕੋਡ ਵਿੱਚ ਵੀ ਸੋਧਾਂ ਕੀਤੀਆਂ ਗਈਆਂ ਹਨ। 1 ਜਨਵਰੀ ਤੋਂ ਹਰ ਘਰ ਦੀ ਹਰ ਮੰਜ਼ਿਲ ‘ਤੇ ਕਾਰਬਨ ਮੋਨੋਆਕਸਾਈਡ ਅਲਾਰਮ ਲਗਾਉਣਾ ਲਾਜ਼ਮੀ ਹੋਵੇਗਾ, ਭਾਵੇਂ ਉੱਥੇ ਸੌਣ ਵਾਲਾ ਕਮਰਾ ਹੋਵੇ ਜਾਂ ਨਾ। ਸਰਕਾਰ ਮੁਤਾਬਕ, ਕਾਰਬਨ ਮੋਨੋਆਕਸਾਈਡ ਇੱਕ ”ਖਾਮੋਸ਼ ਕਾਤਲ” ਹੈ ਕਿਉਂਕਿ ਇਹ ਬਿਨ੍ਹਾਂ ਰੰਗ, ਸੁਗੰਧ ਜਾਂ ਸੁਆਦ ਦੇ ਜਾਨਲੇਵਾ ਹੋ ਸਕਦੀ ਹੈ। ਇਸਦੇ ਨਾਲ ਹੀ ਨਸ਼ੇ ਦੀ ਹਾਲਤ ਵਿੱਚ ਵਾਹਨ ਚਲਾਉਣ ‘ਤੇ ਸਜ਼ਾਵਾਂ ਹੋਰ ਸਖ਼ਤ ਕੀਤੀਆਂ ਜਾ ਰਹੀਆਂ ਹਨ। ਸਰਕਾਰ ਨੇ ਲੋਕਾਂ ਨੂੰ ਅਪੀਲ ਕੀਤੀ ਹੈ ਕਿ ਤਿਉਹਾਰਾਂ ਦੌਰਾਨ ਜਸ਼ਨ ਮਨਾਉਂਦੇ ਸਮੇਂ ਜ਼ਿੰਮੇਵਾਰ ਰਵੱਈਆ ਅਪਣਾਇਆ ਜਾਵੇ ਅਤੇ ਸੁਰੱਖਿਅਤ ਆਵਾਜਾਈ ਦੇ ਬਦਲ ਵਰਤੇ ਜਾਣ।