ਟੈਕਸ ਸਕੈਮ ਕੀ ਹੈ ਅਤੇ ਕਿਵੇਂ ਬਚਿਆ ਜਾ ਸਕਦਾ ਹੈ?

ਰੁਪਿੰਦਰ (ਰੀਆ) ਦਿਓਲ
ਸੀਜੀਏ, ਸੀਪੀਏ 2130 ਨਾਰਥ ਪਾਰਕ ਡਰਾਈਵ ਯੂਨਿਟ 245 ਬਰੈਂਪਟਨ, ਨਾਰਥ ਪਾਰਕ ਅਤੇ ਟਾਰਬਰਾਮ ਰੋਡ ਨਾਰਥ ਪਾਰਕ 416-300-2359
ਟੈਕਸ ਰਿਟਰਨ ਫਾਈਲ ਕਰਨ ਤੋਂ ਬਾਅਦ ਸੀ ਆਰ ਏ ਜਾਂ ਕੈਨੇਡਾ ਰੈਵੀਨਯੂ ਏਜੰਸੀ ਵਲੋਂ ਫੈਸਲਾ ਜਾਂ ਨੋਟਿਸ ਆਫ ਅਸੈਸਮੈਂਟ ਆਉਦੇ ਹਨ। ਇਸ ਸਮੇਂ ਹੀ ਫਰਾਡ ਕਰਨ ਵਾਲੇ ਠੱਗ ਵੀ ਸਰਗਰਮ ਹੋ ਜਾਂਦੇ ਹਨ ਅਤੇ ਕਈ ਤਰੀਕੇ ਵਰਤਕੇ ਆਮ ਨਾਗਰਿਕਾਂ ਨੂੰ ਡਰਾ ਧਮਕਾ ਕੇ ਪੈਸੇ ਬਟੋਰਨ ਦਾ ਯਤਨ ਕਰਦੇ ਹਨ ਅਤੇ ਕਈ ਵਾਰ ਕਾਮਯਾਬ ਵੀ ਹੋ ਜਾਂਦੇ ਹਨ।
ਇਹ ਠੱਗ ਸੀ ਆਰ ਏ ਦਾ ਜਾਹਲੀ ਫੋਨ ਨੰਬਰ ਵਰਤਕੇ ਆਮ ਵਿਅੱਕਤੀ ਨੂੰ ਫੋਨ ਕਰਕੇ ਯਕੀਨ ਦਿਵਾਉਂਦੇ ਹਨ ਕਿ ਇਹ ਕਾਲ ਕੈਨੇਡਾ ਰੈਵੀਨਯੂ ਏਜੰਸੀੇ ਤੋਂ ਹੈ ਅਤੇ ਕਹਿੰਦੇ ਹਨ ਕਿ ਤੁਹਾਡਾ ਟੈਕਸ ਰੀਫੰਡ ਬਣਦਾ ਹੈ,ਤੁਸੀਂ ਆਪਣੀ ਬੈਂਕ ਖਾਤੇ ਦੀ ਅਤੇ ਹੋਰ ਇਨਫਰਮੇਸ਼ਨ ਹੁਣੇ ਦੇਵੋ ਤਾਂਕਿ ਤੁਹਾਡੇ ਰੀਫੰਡ ਦੇ ਪੈਸੇ ਹੁਣੇ ਤੁਹਾਡੇ ਅਕਾਊਂਟ ਵਿਚ ਜਮਾਂ ਕਰਵਾ ਦਿੱਤੇ ਜਾਣ। ਇਹ ਸਾਰੀ ਇਨਫਰਮੇਸ਼ਨ ਲੈ ਕੇ ਤੁਹਾਡੇ ਖਾਤੇ ਵਿਚੋਂ ਤੁਹਾਡੇ ਪੈਸੇ ਵੀ ਕਢਵਾ ਲੈਂਦੇ ਹਨ।
ਦੂਸਰਾ ਤਰੀਕਾ ਇਹ ਹੈ ਕਿ ਕਿਸੇ ਵਿਅਕਤੀ ਨੂੰ ਜਾਂ ਬਿਜਨਸ ਨੂੰ ਇਹ ਫੋਨ ਕਰਕੇ ਧਮਕੀ ਦਿੰਦੇ ਹਨ ਕਿ ਤੁਹਾਡਾ ਪਿਛਲੇ ਸਾਲਾਂ ਦਾ ਟੈਕਸ ਆਡਿਟ ਹੋਇਆ ਹੈ ਅਤੇ ਤੁਹਾਡੇ ਵੱਲ ਟੈਕਸ ਬਕਾਇਆ ਨਿਕਲਦਾ ਹੈ। ਬਹੁਤ ਸਖਤ ਭਾਸ਼ਾ ਵਰਤ ਕੇ ਇਹ ਧਮਕੀ ਦਿੰਦੇ ਹਨ ਕਿ ਇਹ ਰਕਮ ਤੁਹਾਨੂੰ ਹੁਣੇ ਜਮਾਂ ਕਰਵਾਉਣੀ ਪਵੇਗੀ ਨਹੀਂ ਤਾਂ ਤੁਹਾਨੂੰ ਬਹੁਤ ਵੱਡਾ ਜੁਰਮਾਨਾ ਹੋ ਜਾਵੇਗਾ ਜਾਂ ਤੁਹਾਡੇ ਖਿਲਾਫ ਗ੍ਰਿਫਤਾਰੀ ਵਾਰੰਟ ਜਾਰੀ ਹੋ ਚੁਕੇ ਹਨ, ਜੇ ਪੈਸੇ ਜਮਾਂ ਨਹੀਂ ਕਰਵਾਏ ਤਾਂ ਹਥਕੜੀ ਲਾ ਕੇ ਗ੍ਰਿਫਤਾਰ ਕਰ ਲਿਆ ਜਾਵੇਗਾ। ਜਦ ਨਵਾਂ ਵਿਅੱਕਤੀ ਪੂਰੀ ਤਰ੍ਹਾਂ ਡਰ ਜਾਂਦਾ ਹੈ ਤਾਂ ਇਹ ਪੈਸੇ ਪੇ ਕਰਨ ਵਾਸਤੇ ਗਿਫਟ ਕਾਰਡ ਸਟੋਰ ਵਿਚੋਂ ਖਰੀਦਣ ਵਾਸਤੇ ਕਹਿੰਦੇ ਹਨ ਅਤੇ ਕਾਰਡ ਦੇ ਪਿਛੇ ਦਿੱਤੀ ਜਾਣਕਾਰੀ  ਠੱਗ ਨੂੰ ਭੇਜਣ ਨੂੰ ਕਹਿੰਦੇ ਹਨ ਅਤੇ ਉਹ ਪੇਮੈਂਟ ਲੈ ਜਾਂਦੇ ਹਨ ਅਤੇ ਜਦੋਂ ਤੱਕ ਤੁਹਾਨੂੰ ਪਤਾ ਲੱਗਦਾ ਹੈ, ਤੁਸੀਂ ਠੱਗੇ ਜਾ ਚੁੱਕੇ ਹੁੰਦੇ ਹੋ।
ਹਰ ਸਾਲ ਕੈਨੇਡੀਅਨ ਲੋਕ ਇੰਨਾਂ ਫਰਾਡੀਆਂ ਵਲੋਂ ਠੱਗੇ ਜਾਂਦੇ ਹਨ। ਪਿਛਲੇ ਸਾਲ ਤਿੰਨ ਮਿਲੀਅਨ ਡਾਲਰ ਇਹਨਾਂ ਠੱਗਾਂ ਵਲੋਂ ਹਥਿਆਏ ਗਏ ਹਨ। ਪਿਛੇ ਜਿਹੇ ਇਕ ਬਿਜਨਸਮੈਨ ਨੂੰ ਫੋਨ ਆਇਆ ਕਿ ਤੁਸੀਂ ਟੈਕਸ ਫਰਾਡ ਕੀਤਾ ਹੈ, ਤੁਹਾਡੇ ਵੱਲ ਟੈਕਸ ਦਾ ਬਕਾਇਆ ਨਿਕਲਦਾ ਹੈ, ਜੇ ਹੁਣੇ ਪੇ ਨਹੀਂ ਕੀਤਾ ਤਾਂ ਜੁਰਮਾਨਾ ਕੀਤਾ ਜਾਵੇਗਾ ਅਤੇ ਮੇਰੇ ਕੋਲ ਤੁਹਾਡੇ ਗ੍ਰਿਫਤਾਰੀ ਵਾਰੰਟ ਹਨ ਅਤੇ ਤੁਹਾਨੂੰ ਹੱਥਕੜੀ ਲਾ ਕੇ ਗ੍ਰਿਫਤਾਰ ਵੀ ਕਰ ਲਿਆ ਜਾਵੇਗਾ। ਇਸ ਬਿਜਨਸਮੈਨ ਨੂੰ ਪਹਿਲਾਂ ਹੀ ਇਸ ਤਰ੍ਹਾਂ ਦੇ ਫਰਾਡ ਵਾਰੇ ਪਤਾ ਸੀ, ਉਸਨੇ ਆਪਣੇ ਅਕਾਊਂਟੈਂਟ ਦੇ ਸਹਿਯੋਗ ਨਾਲ ਪੁਲਿਸ ਨੂੰ ਸੂਚਿਤ ਕੀਤਾ।
ਪੁਲਿਸ ਅਤੇ ਸੀ ਆਰ ਏ ਵਲੋਂ ਇਸ ਤਰ੍ਹਾਂ ਦੇ ਟੈਲੀਫੋਨ ਸਕੈਮ ਬਾਰੇ ਵਾਰਨਿੰਗ ਵੀ ਦਿੱਤੀ ਜਾ ਚੁੱਕੀ ਹੈ। ਹੁਣੇ ਹੀ ਪੁਲਿਸ ਨੂੰ ਰਿਪੋਰਟ ਮਿਲੀ ਹੈ ਕਿ ਇਕ ਵਿਅੱਕਤੀ ਨੂੰ ਇਸ ਤਰ੍ਹਾਂ ਹੀ ਕਾਲ ਆਈ ਕਿ ਤੁਸੀਂ ਟੈਕਸ ਦਾ ਬਕਾਇਆ ਪੇ ਨਹੀਂ ਕੀਤਾ, ਉਸ ਨੂੰ ਧਮਕਾਇਆ ਗਿਆ ਕਿ ਜੇ ਹੁਣੇ ਹੀ ਪੇਮੈਂਟ ਨਹੀਂ ਕੀਤੀ ਗਈ ਤਾਂ ਤੁਹਾਨੂੰ ਹੁਣੇ ਹੀ ਗ੍ਰਿਫਤਾਰ ਕਰਕੇ ਜੇਲ੍ਹ ਭੇਜ ਦਿਤਾ ਜਾਵੇਗਾ, ਤੁਹਾਡੀ ਇੰਮੀਗਰੇਸ਼ਨ ਕੈਂਸਲ ਕਰ ਦਿਤੀ ਜਾਵੇਗੀ ਅਤੇ ਤੁਹਾਨੂੰ ਡੀਪੋਰਟ ਵੀ ਕਰ ਦਿਤਾ ਜਾਵੇਗਾ। ਜਦ ਵਿਅੱਕਤੀ ਪੂਰੀ ਤਰ੍ਹਾਂ ਡਰ ਗਿਆ ਤਾਂ ਕਿਹਾ ਗਿਆ ਕਿ ਸਟੋਰ ਵਿਚੋਂ ਜਾਕੇ 12000 ਡਾਲਰ ਦੇ ਗਿਫਟ ਕਾਰਡ ਖਰੀਦਕੇ, ਉਨ੍ਹਾਂ ਦੀ ਪਿਛਲੇ ਪਾਸੇ ਲਿਖੀ ਜਾਣਕਾਰੀ ਸਾਨੂੰ ਭੇਜੋ। ਇਹ ਵਿਅੱਕਤੀ ਇੰਨਾ ਡਰ ਗਿਆ ਕਿ ਦੋ ਸਟੋਰਾਂ ਵਿਚੋਂ ਇਹ ਕਾਰਡ ਖਰੀਦਕੇ ਠੱਗਾਂ ਨੂੰ ਜਾਣਕਾਰੀ ਭੇਜ ਦਿਤੀ। ਜਦ ਤੱਕ ਉਸਨੂੰ ਅਹਿਸਾਸ ਹੋਇਆ ਕਿ ਉਹ ਠੱਗਿਆ ਗਿਆ ਹੈ ਅਤੇ ਇਸਦੀ ਰਿਪੋਰਟ ਪੁਲਿਸ ਨੂੰ ਦਿਤੀ। ਸੀ ਆਰ ਏ ਵਲੋਂ ਵੀ ਇਸ ਤਰ੍ਹਾਂ ਦੇ ਠੱਗਾਂ ਨਾਲ ਨਿਪਟਣ ਲਈ ਪੁਲਿਸ ਨਾਲ ਮਿਲਕੇ ਕਦਮ ਚੁੱਕੇ ਜਾ ਰਹੇ ਹਨ ਅਤੇ ਕੈਨੇਡਾ ਰੈਵੀਨਯੂ ਏਜੰਸੀ ਵਲੋਂ ਆਮ ਨਾਗਰਿਕਾਂ ਨੂੰ ਜਾਣਕਾਰੀ ਦਿੱਤੀ ਜਾ ਰਹੀ ਹੈ। ਕੈਨੇਡਾ ਰੈਵੀਨਯੂ ਏਜੰਸੀ ਵਲੋਂ ਕਦੇ ਵੀ ਟਿਮ ਹਾਰਟਨ, ਲਾਇਬਰੇਰੀ ਵਿਚ ਜਾਂ ਹੋਰ ਪਬਲਿਕ ਪਲੇਸ ਤੇ ਤੁਹਾਨੂੰ ਮਿਲਣ ਲਈ ਨਹੀਂ ਬੁਲਾਇਆ ਜਾਂਦਾ। ਕਦੇ ਵੀ ਟੈਕਸ ਦੇ ਬਕਾਏ ਦੀ ਰਕਮ ਹੁਣੇ ਹੀ ਪ੍ਰੀਪੇਡ ਗਿਫਟ ਕਾਰਡਾਂ ਰਾਹੀਂ ਪੇ ਕਰਨ ਨੂੰ ਨਹੀਂ ਕਿਹਾ ਜਾਂਦਾ । ਨਾਂ ਹੀ ਕਦੇ ਗ੍ਰਿਫਤਾਰ ਕਰਨ ਜਾਂ ਜੇਲ੍ਹ ਭੇਜਣ ਦੀ ਧਮਕੀ ਦਿਤੀ ਜਾਂਦੀਂ ਹੈ। ਇਹ ਵੀ ਕੈਨੇਡਾ ਰੈਵੀਨਯੂ ਏਜੰਸੀ ਵਲੋਂ ਤਕੀਦ ਕੀਤੀ ਜਾਂਦੀ ਹੈ ਕਿ ਜੇ ਕਦੇ ਵੀ ਤੁਹਾਨੂੰ ਇਸ ਤਰ੍ਹਾਂ ਦਾ ਕੋਈ ਫੋਨ ਆਉਂਦਾ ਹੈ ਤਾਂ ਕੋਈ ਇਨਫਾਰਮੇਸ਼ਨ ਨਾਂ ਦੇਵੋ, ਅਤੇ ਫੋਨ ਕੱਟ ਕੇ ਇਸਦੀ ਸੂਚਨਾ ਪੁਲਿਸ ਨੂੰ ਜ਼ਰੂਰ ਦੇਵੋ। ਤੁਹਾਡੇ ਨੋਟਿਸ ਆਫ ਅਸੈਸਮੈਂਟ ਤੇ ਵੀ ਕੈਨੇਡਾ ਰੈਵੀਨਯੂ ਏਜੰਸੀ ਵਲੋਂ ਨੋਟਿਸ ਲਿਖਕੇ ਸਾਵਧਾਨ ਕੀਤਾ ਗਿਆ ਹੈ ਕਿ ਇਸ ਤਰ੍ਹਾਂ ਦੇ ਫਰਾਡ ਤੋਂ ਸਾਵਧਾਨ ਰਹੋ । ਕੈਨੇਡਾ ਰੈਵੀਨਯੂ ਏਜੰਸੀ ਵਲੋਂ ਕਦੇ ਵੀ ਫੋਨ ਕਰਕੇ ਗ੍ਰਿਫਤਾਰ ਕਰਨ ਦੀ ਧਮਕੀ ਨਹੀਂ ਦਿਤੀ ਜਾਂਦੀ ਅਤੇ ਨਾਂ ਹੀ ਟੈਕਸ ਬਕਾਇਆ ਹੁਣੇ ਹੀ ਸਟੋਰ ਕਾਰਡ ਰਾਹੀਂ ਜਾਂ ਮਨੀ ਟਰਾਂਸਫਰ ਸਰਵਿਸ ਰਾਹੀਂ ਪੇ ਕਰਨ ਨੂੰ ਕਿਹਾ ਜਾਂਦਾ ਹੈ।
ਆਮ ਤੌਰ ‘ਤੇ ਇਹ ਠੱਗ ਸੀਨੀਅਰਾਂ ਨੂੰ ਜਾਂ ਨਵੇਂ ਆਏ ਵਿਅੱਕਤੀਆਂ ਨੂੰ ਨਿਸ਼ਾਨਾ ਬਣਾਉਂਦੇ ਹਨ। ਪਿਛਲੇ ਡੇਢ ਸਾਲ ਵਿਚ ਹੀ ਇਹੋ ਜਹੇ 6800 ਕੇਸ ਰਿਪੇਰਟ ਕੀਤੇ ਗਏ ਹਨ।
ਇਹ ਆਰਟੀਕਲ ਇਕ ਆਮ ਜਾਣਕਾਰੀ ਲਈ ਲਿਖਿਆ ਗਿਆ ਹੈ ਤਾਂ ਕਿ ਜੇ ਤੁਹਾਨੂੰ ਕੋਈ ਇਹੋ ਜਹਿਆ ਫੋਨ ਆਉਂਦਾ ਹੈ, ਟੈਕਸ ਮੈਸੇਜ, ਵਉਆਇਸ ਮੈਸੇਜ ਜਾਂ ਈ-ਮੇਲ ਆਊਦੀ ਹੈ ਤਾਂ ਤੁਹਾਨੂੰ ਪਹਿਲਾਂ ਹੀ ਪਤਾ ਹੋਵੇ ਕਿ ਇਹ ਇਕ ਫਰਾਡ ਹੈ। ਇਸ ਸਬੰਧੀ ਜਾਂ ਆਪਣੇ ਪਰਸਨਲ ਜਾਂ ਬਿਜਨਸ ਟੈਕਸ ਸਬੰਧੀ ਹੋਰ ਕੋਈ ਵੀ ਜਾਣਕਾਰੀ ਲੈਣ ਲਈ ਤੁਸੀਂ ਮੈਨੂੰ ਕਾਲ ਕਰ ਸਕਦੇ ਹੋ।
ਜੇ ਪਿਛਲੀਆਂ ਰਿਟਰਨਾਂ ਨਹੀਂ ਭਰੀਆਂ, ਪਨੈਲਿਟੀ ਪੈ ਗਈ ਹੈ ਜਾਂ ਕੈਨੇਡਾ ਰੈਵੀਨਯੂ ਏਜੰਸੀ ਵਲੋਂ ਕੋਈ ਕਟੌਤੀ ਨਾਮਨਜੂਰ ਕਰਕੇ ਟੈਕਸ ਰਿਕਵਰੀ ਪਾ ਦਿਤੀ ਗਈ ਹੈ, ਸੀ ਆਰ ਏ ਤੋਂ ਕੋਈ ਲੈਟਰ ਆਇਆ ਹੈ ਜਾਂ ਕੋਈ ਕੰਪਨੀ ਖੋਹਲਣੀ ਹੈ ਤਾਂ ਤੁਸੀਂ ਮੈਨੂੰ 416-300-2359 ‘ਤੇ ਸੰਪਰਕ ਕਰ ਸਕਦੇ ਹੋ।