ਕੈਨੇਡੀਅਨ ਝੰਡੇ ‘ਤੇ ਲੱਗੇਗਾ ਮੂਲ ਦੇਸ਼ ਦਾ ਲੇਬਲ, ਸੰਸਦ ‘ਚ ਨਵਾਂ ਬਿੱਲ ਪੇਸ਼

ਟੋਰਾਂਟੋ/ਬਿਊਰੋ ਨਿਊਜ਼ : ਕੈਨੇਡਾ ਵਿੱਚ ਵਿਦੇਸ਼ਾਂ ‘ਚ ਬਣੇ ਕੈਨੇਡੀਅਨ ਝੰਡਿਆਂ ਦੀ ਵਿਕਰੀ ਸਬੰਧੀ ਪਾਰਦਰਸ਼ਤਾ ਲਿਆਉਣ ਲਈ ਇੱਕ ਨਵਾਂ ਨਿੱਜੀ ਬਿੱਲ ਸੰਸਦ ਵਿੱਚ ਪੇਸ਼ ਕੀਤਾ ਗਿਆ ਹੈ। ਇਸ ਬਿੱਲ ਦਾ ਮਕਸਦ ਇਹ ਯਕੀਨੀ ਬਣਾਉਣਾ ਹੈ ਕਿ ਖਪਤਕਾਰਾਂ ਨੂੰ ਸਪੱਸ਼ਟ ਤੌਰ ‘ਤੇ ਪਤਾ ਹੋਵੇ ਕਿ ਉਹ ਜਿਸ ਕੈਨੇਡੀਅਨ ਝੰਡੇ ਨੂੰ ਖਰੀਦ ਰਹੇ ਹਨ, ਉਹ ਕਿਸ ਦੇਸ਼ ਵਿੱਚ ਤਿਆਰ ਕੀਤਾ ਗਿਆ ਹੈ।
ਕੰਸਰਵੇਟਿਵ ਸੰਸਦ ਮੈਂਬਰ ਡੱਗ ਸ਼ਿਪਲੀ ਵੱਲੋਂ ਪੇਸ਼ ਕੀਤੇ ਗਏ ਬਿੱਲ ਸੀ-218 ਤਹਿਤ 20 ਸੈਂਟੀਮੀਟਰ ਚੌੜਾਈ ਅਤੇ 30 ਸੈਂਟੀਮੀਟਰ ਲੰਬਾਈ ਜਾਂ ਇਸ ਤੋਂ ਵੱਡੇ ਆਕਾਰ ਦੇ ਸਾਰੇ ਆਯਾਤ ਕੀਤੇ ਕੈਨੇਡੀਅਨ ਝੰਡਿਆਂ ‘ਤੇ ਮੂਲ ਦੇਸ਼ ਦਾ ਲੇਬਲ ਲਗਾਉਣਾ ਲਾਜ਼ਮੀ ਹੋਵੇਗਾ। ਸ਼ਿਪਲੀ ਨੇ ਕਿਹਾ ਕਿ ਕੈਨੇਡਾ ਦੇ ਲੋਕਾਂ ਨੂੰ ਇਹ ਜਾਣਨ ਦਾ ਪੂਰਾ ਹੱਕ ਹੈ ਕਿ ਉਨ੍ਹਾਂ ਦਾ ਰਾਸ਼ਟਰੀ ਝੰਡਾ ਕਿੱਥੇ ਬਣਿਆ ਹੈ। ਉਨ੍ਹਾਂ ਅਨੁਸਾਰ ਜੇਕਰ ਝੰਡਾ ਕੈਨੇਡਾ ਵਿੱਚ ਬਣਿਆ ਹੈ ਤਾਂ ਇਹ ਮਾਣ ਵਾਲੀ ਗੱਲ ਹੈ ਅਤੇ ਜੇਕਰ ਵਿਦੇਸ਼ ਵਿੱਚ ਬਣਿਆ ਹੈ ਤਾਂ ਵੀ ਖਪਤਕਾਰਾਂ ਨੂੰ ਜਾਣਕਾਰੀ ਦੇ ਆਧਾਰ ‘ਤੇ ਆਪਣਾ ਫ਼ੈਸਲਾ ਕਰਨ ਦਾ ਅਧਿਕਾਰ ਹੋਣਾ ਚਾਹੀਦਾ ਹੈ। ਪ੍ਰਸਤਾਵਿਤ ਕਾਨੂੰਨ ਅਨੁਸਾਰ ਕੋਈ ਵੀ ਵਪਾਰੀ ਅਜਿਹਾ ਕੈਨੇਡੀਅਨ ਝੰਡਾ ਨਹੀਂ ਵੇਚ ਸਕੇਗਾ ਜਿਸ ‘ਤੇ ਉਸ ਦੇ ਮੂਲ ਦੇਸ਼ ਬਾਰੇ ਸਪੱਸ਼ਟ ਜਾਣਕਾਰੀ ਨਾ ਹੋਵੇ। ਇਸ ਕਦਮ ਨਾਲ ਉਨ੍ਹਾਂ ਕਾਨੂੰਨੀ ਖਾਮੀਆਂ ਨੂੰ ਬੰਦ ਕਰਨ ਦੀ ਕੋਸ਼ਿਸ਼ ਕੀਤੀ ਜਾ ਰਹੀ ਹੈ ਜਿਨ੍ਹਾਂ ਕਾਰਨ ਵਿਦੇਸ਼ਾਂ ਵਿੱਚ ਬਣੇ ਝੰਡੇ ਬਿਨਾਂ ਢੁੱਕਵੇਂ ਲੇਬਲ ਦੇ ਵੇਚੇ ਜਾਂਦੇ ਹਨ। ਕੰਸਰਵੇਟਿਵ ਪਾਰਟੀ ਦਾ ਕਹਿਣਾ ਹੈ ਕਿ ਇਹ ਬਿੱਲ ਕੈਨੇਡੀਅਨ ਨਿਰਮਾਣ ਖੇਤਰ ਨੂੰ ਉਤਸ਼ਾਹਿਤ ਕਰਨ, ਰੁਜ਼ਗਾਰ ਦੇ ਮੌਕੇ ਵਧਾਉਣ ਅਤੇ ਰਾਸ਼ਟਰੀ ਪ੍ਰਤੀਕ ਦੀ ਮਰਿਆਦਾ ਨੂੰ ਸੁਰੱਖਿਅਤ ਰੱਖਣ ਵਿੱਚ ਮਦਦਗਾਰ ਸਾਬਤ ਹੋਵੇਗਾ। ਇਸ ਵਿੱਚ ਨਾ ਤਾਂ ਆਯਾਤ ‘ਤੇ ਪਾਬੰਦੀ ਲਗਾਉਣ ਦੀ ਗੱਲ ਹੈ ਅਤੇ ਨਾ ਹੀ ਕੋਈ ਵਾਧੂ ਫੀਸ ਲਗਾਉਣ ਦਾ ਉਦੇਸ਼ ਹੈ।