ਟੋਰਾਂਟੋ/ਬਿਊਰੋ ਨਿਊਜ਼ : 12 ਜੁਲਾਈ ਤੋਂ ਉਨਟਾਰੀਓ ਦੇ ਕਈ ਸਟੇਟ ਹਾਈਵੇ ‘ਤੇ ਸਪੀਡ ਲਿਮਟ ਨੂੰ ਵਧਾ ਦਿੱਤਾ ਗਿਆ ਹੈ। ਹੁਣ ਡਰਾਈਵਰ ਨਾਰਥ ਅਤੇ ਸਾਊਥ ਦੋਵੇਂ ਪਾਸਿਆਂ ਤੋਂ 10 ਹਾਈਵੇ ‘ਤੇ ਗਤੀ ਸੀਮਾ 100 ਕਿਲੋਮੀਟਰ ਪ੍ਰਤੀ ਘੰਟਾ ਤੋਂ ਵਧਾ ਕੇ 110 ਕਿਲੋਮੀਟਰ ਪ੍ਰਤੀ ਘੰਟਾ ਤੱਕ ਗੱਡੀਆਂ ਚਲਾ ਸਕਣਗੇ। ਟਰਾਂਸਪੋਰਟ ਮੰਤਰੀ ਪ੍ਰਭਮੀਤ ਸਰਕਾਰੀਆ ਨੇ ਕਿਹਾ ਕਿ ਉਨਟਾਰੀਓ ਦੇ ਜ਼ਿਆਦਾਤਰ ਹਾਈਵੇ ਮੂਲ ਰੂਪ ਨਾਲ 110 ਕਿਲੋਮੀਟਰ ਪ੍ਰਤੀ ਘੰਟਾ ਦੀ ਗਤੀ ਸੀਮਾ ਨੂੰ ਸੁਰੱਖਿਅਤ ਰੂਪ ਨਾਲ ਅਡਜਸਟ ਕਰਨ ਦੇ ਲਈ ਡਿਜ਼ਾਈਨ ਕੀਤੇ ਗਏ ਹਨ ਅਤੇ 2022 ਵਿਚ ਸਾਡੇ ਬਦਲਾਵਾਂ ਤੋਂ ਪ੍ਰਾਪਤ ਡੇਟਾ ਤੋਂ ਪਤਾ ਲੱਗਦਾ ਹੈ ਕਿ ਉਹ ਅਜਿਹਾ ਹੀ ਕਰਦੇ ਹਨ। ਇਨ੍ਹਾਂ ਸਾਰੇ ਹਾਲਾਤ ਨੂੰ ਦੇਖਦੇ ਹੋਏ ਅਤੇ ਉਨਟਾਰੀਓ ਦੇ ਡਰਾਈਵਰਾਂ ਦੀ ਸੁਰੱਖਿਆ ਨੂੰ ਪੂਰੀ ਤਰ੍ਹਾਂ ਨਾਲ ਧਿਆਨ ਵਿਚ ਰੱਖਦੇ ਹੋਏ 10 ਕਿਲੋਮੀਟਰ ਪ੍ਰਤੀ ਘੰਟਾ ਦੀ ਸਪੀਡ ਲਿਮਟ ਵਧਾਈ ਗਈ ਹੈ। ਇਸ ਨਾਲ ਉਨਟਾਰੀਓ ਦੇ ਸਟੇਟ ਹਾਈਵੇ ‘ਤੇ ਹੋਰ ਕੈਨੇਡੀਅਨ ਹਾਈਵੇਜ਼ ਦੇ ਬਰਾਬਰ ਸਪੀਡ ਲਿਮਟ ਹੋ ਜਾਏਗੀ।
ਇਹ ਬਦਲਾਅ ਉਨਟਾਰੀਓ ਦੇ ਟਰਾਂਸਪੋਰਟ ਨੈਟਵਰਕ ਨੂੰ ਆਧੁਨਿਕ ਬਣਾਉਣ ਅਤੇ ਯਾਤਰੀ ਐਫੀਸੈਂਸੀ ਵਿਚ ਸੁਧਾਰ ਕਰਨ ਦੀ ਇਕ ਵਿਆਪਕ ਪਹਿਲ ਦਾ ਹਿੱਸਾ ਹੈ। ਨਵੀਂ ਸਪੀਡ ਲਿਮਟ ਹੁਣ ਇਸ ਤਰ੍ਹਾਂ ਨਾਲ ਹੈ।
* ਟਿਲਬਰੀ ਵਿਚ ਹਾਈਵੇ 401 ਆਪਣੇ 110 ਕਿਲੋਮੀਟਰ ਪ੍ਰਤੀ ਘੰਟਾ ਖੇਤਰ ਨੂੰ ਹੋਰ ਸੱਤ ਕਿਲੋਮੀਟਰ ਤੱਕ ਵਧਾਏਗਾ।
* ਹਾਈਵੇ 35/115 ਤੋਂ ਕੋਵਰਗ ਤੱਕ ਹਾਈਵੇ 401 ਦਾ ਇਕ ਹਿੱਸਾ, ਜੋ ਕਰੀਬ 35 ਕਿਲੋਮੀਟਰ ਦੀ ਦੂਰੀ ਤੈਅ ਕਰਦਾ ਹੈ।
* ਕੋਲਬੋਰਨ ਤੋਂ ਬੇਲੇਵਿਲੇ ਤੱਕ ਹਾਈਵੇ 401, ਜੋ ਕਰੀਬ 44 ਕਿਲੋਮੀਟਰ ਦੀ ਦੂਰੀ ਤੈਅ ਕਰਦਾ ਹੈ।
* ਬੇਲੇਵਿਲੇ ਤੋਂ ਕਿੰਗਸਟਨ ਤੱਕ ਹਾਈਵੇ 401 ਦਾ ਹਿੱਸਾ, ਜੋ ਕਰੀਬ 66 ਕਿਲੋਮੀਟਰ ਲੰਬਾ ਹੈ।
* ਹਾਈਵੇ 16 ਤੋਂ ਕਿਊਬੈਕ ਸੀਮਾ ਤੱਕ ਹਾਈਵੇ 401, ਜੋ ਕਰੀਬ 107 ਕਿਲੋਮੀਟਰ ਦੀ ਦੂਰੀ ਤੈਅ ਕਰਦਾ ਹੈ।
* ਬੁਡਸਟਾਕ ਤੋਂ ਬਰੈਟਫੋਰਡ ਤੱਕ ਹਾਈਵੇ 403, ਜੋ ਕਰੀਬ 26 ਕਿਲੋਮੀਟਰ ਦੀ ਦੂਰੀ ਤੈਅ ਕਰਦਾ ਹੈ।
* ਬਰੈਟਫੋਰਡ ਤੋਂ ਹੈਮਿਲਟਨ ਤੱਕ ਹਾਈਵੇ 403 ਦਾ ਹਿੱਸਾ, ਜੋ ਕਰੀਬ 14.5 ਕਿਲੋਮੀਟਰ ਦੀ ਦੂਰੀ ਤੈਅ ਕਰਦਾ ਹੈ।
* ਥੋਰੋਲਡ ਤੋਂ ਵੇਲੈਂਡ ਤੱਕ ਹਾਈਵੇ 406, ਜੋ ਕਰੀਬ 13 ਕਿਲੋਮੀਟਰ ਦੀ ਦੂਰੀ ਤੈਅ ਕਰਦਾ ਹੈ।
* ਹਾਈਵੇ 401 ਤੋਂ ਓਟਾਵਾ ਤੱਕ ਹਾਈਵੇ 416, ਕਰੀਬ 70 ਕਿਲੋਮੀਟਰ।
* ਹਾਈਵੇ 69 ਤੋਂ ਸੁਡਬਰੀ ਤੋਂ ਫਰੈਂਚ ਰਿਵਰ ਤੱਕ, ਕਰੀਬ 60 ਕਿਲੋਮੀਟਰ।
ਸੂਬਾ ਸਰਕਾਰ ਦੇ ਅਨੁਸਾਰ ਇਨ੍ਹਾਂ ਹਾਈਵੇਜ਼ ਦੀ ਚੋਣ ਸੁਰੱਖਿਅਤ ਰੂਪ ਨਾਲ ਹਾਈ ਸਪੀਡ ਲਿਮਟ ਦਾ ਸਮਰਥਨ ਕਰਨ ਦੀ ਉਨ੍ਹਾਂ ਦੀ ਸਮਰੱਥਾ ਦੇ ਅਧਾਰ ‘ਤੇ ਕੀਤੀ ਗਈ ਹੈ। ਇਹ ਫੈਸਲਾ ਦੋ ਸਾਲ ਦੇ ਸਫਲ ਪ੍ਰੀਖਣ ਤੋਂ ਬਾਅਦ ਲਿਆ ਗਿਆ ਹੈ, ਜਿਸ ਵਿਚ ਸਾਊਥ ਅਤੇ ਨਾਰਥ ਉਨਟਾਰੀਓ ਵਿਚ ਕਈ ਹਾਈਵੇਜ਼ ‘ਤੇ ਸਪੀਡ ਲਿਮਿਟ ਵਿਚ ਸਥਾਈ ਵਾਧਾ ਦੇਖਿਆ ਗਿਆ ਹੈ। ਇਸਦੇ ਨਾਲ ਹੀ ਉਨਟਾਰੀਓ, ਅਲਬਰਟਾ, ਮੈਨੀਟੋਬਾ, ਨਿਊ ਬਰੰਸਵਿਕ, ਨੋਵਾ ਸਕੋਟੀਆ ਅਤੇ ਸਸਕੇਚੇਵਾਨ ਜਿਹੇ ਹੋਰ ਸੂਬਿਆਂ ਦੇ ਨਾਲ ਸ਼ਾਮਲ ਹੋ ਗਿਆ ਹੈ, ਜਿੱਥੇ ਜ਼ਿਆਦਾ ਤੋਂ ਜ਼ਿਆਦਾ ਗਤੀ ਸੀਮਾ ਵੀ 110 ਕਿਲੋਮੀਟਰ ਪ੍ਰਤੀ ਘੰਟਾ ਹੈ। ਬ੍ਰਿਟਿਸ਼ ਕੋਲੰਬੀਆ 120 ਕਿਲੋਮੀਟਰ ਪ੍ਰਤੀ ਘੰਟਾ ਦੀ ਸੀਮਾ ਦੇ ਨਾਲ ਸਭ ਤੋਂ ਵੱਖ ਹੈ।