ਜਾਣਾ ਚੰਦ ‘ਤੇ ਮੁਬਾਰਕ ਪਹਿਲਾਂ ਢਾਰਿਆਂ ਨੂੰ ਦੇਖ
ਜਿਹੜੇ ਰੁਲ਼ਦੇ ਜਮੀਂ ਤੇ ਨੰਨੇ ਤਾਰਿਆਂ ਨੂੰ ਦੇਖ
ਇਸਰੋ ਦੇ ਸਾਇੰਸਦਾਨੋਂ, ਗੌਰਵ ਹੋ ਸਾਡਾ
ਨਹੀਂ ਛੱਤ ਵੀ ਸਿਰਾਂ ‘ਤੇ ਦੁਖਿਆਰਿਆਂ ਨੂੰ ਦੇਖ
ਉਦੋਂ ਮੰਨ ਲਵਾਂਗੇ ਵੱਡੀ ਪ੍ਰਾਪਤੀ ਤੁਹਾਡੀ
ਮਨਾਵਾਂਗੇ ਵੀ ਖੁਸ਼ੀਆਂ ਨਾਹਰਿਆਂ ਨੂੰ ਦੇਖ
ਪੁਲਾੜ ਵਿੱਚ ਖੋਜਾਂ ਜਾ ਕੇ ਫੇਰ ਕਰਿਓ
ਕੱਢੋ ਹੱਲ ਕੋਈ ਪਹਿਲਾਂ ਭੁੱਖਾਂ ਮਾਰਿਆਂ ਨੂੰ ਦੇਖ
ਸਾਡੇ ਦੇਸ਼ ਵਿੱਚ ਅਜੇ ਤਾਂ ਮਚੀ ਕੁਰਲਾਹਟ
ਖੁਸ਼ ਹੋਈ ਜਾਨੈ ਚੰਦ ਤੇ ਨਜ਼ਾਰਿਆਂ ਨੂੰ ਦੇਖ
ਅਜੇ ਕੁੱਲੀ ਗੁੱਲੀ ਜੁੱਲੀ ਵੀ ਹੋਈ ਨਾ ਪੂਰੀ
ਐਵੇਂ ਆਖੋ ਨਾ ਤਰੱਕੀ ਮੁਨਾਰਿਆਂ ਨੂੰ ਦੇਖ
ਪੌਣੀ ਸਦੀ ਹੋ ਗਈ ਮਿਲੀ ਅਜ਼ਾਦੀ ਨੂੰ
ਕਿੱਥੇ ਗਈ ਏ ਗੁਲਾਮੀ ਮੁਜਾਰਿਆਂ ਨੂੰ ਦੇਖ
ਹੱਦਾਂ ਉੱਤੇ ਘੁਸਪੈਠ ਬੰਦ ਅਜੇ ਹੋਈ ਨਾ
ਕੁੱਝ ਲਈ ਏ ਹੜੱਪ ਲਲਕਾਰਿਆਂ ਨੂੰ ਦੇਖ
ਖਲਕਤ ਵੰਡੀ ਹੋਈ ਲੋਕਾਂ ਤੇ ਜੋਕਾਂ ਵਿੱਚ
ਖੂਨ ਪੀਣੇ ਜੋ ਬੈਠੇ ਹਤਿਆਰਿਆਂ ਨੂੰ ਦੇਖ
ਘਰ ਆਪਣਾ ਹੀ ਭਰਦੇ ਲੁੱਟ ਕੇ ਅਵਾਮ ਨੂੰ
ਵਾਅਦੇ ਕਰਦੇ ਨਾ ਪੂਰੇ ਫ਼ੋਕੇ ਲਾਰਿਆਂ ਨੂੰ ਦੇਖ
ਤੁਸੀਂ ਕਰੋ ਨਾ ਦਿਖਾਵੇ ਵੱਡੇ ‘ਕੱਠ ਕਰਕੇ
ਢਿੱਡ ਭਰਨੇ ‘ਨੀ ਸੁਣ, ਬੁਲਾਰਿਆਂ ਨੂੰ ਦੇਖ
ਜਸ਼ਨ ਮਨਾਉ ਬਹੁਤ ਵੱਡੀ ਕਾਮਯਾਬੀ
ਅੱਖਾਂ ਪੂੰਝਦੇ ਜੇ ਤੁਸੀਂ ਹੰਝੂ ਖਾਰਿਆਂ ਨੂੰ ਦੇਖ
– ਸੁਲੱਖਣ ਮਹਿਮੀ
+647-786-6329