Breaking News
Home / ਕੈਨੇਡਾ / ਬਰੈਂਪਟਨ ਐਕਸ਼ਨ ਸੈਂਟਰ ਦੀ ਪਿਕਨਿਕ ਵਿੱਚ ਲੋਕਾਂ ਦੀ ਭਰਵੀਂ ਸ਼ਮੂਲੀਅਤ

ਬਰੈਂਪਟਨ ਐਕਸ਼ਨ ਸੈਂਟਰ ਦੀ ਪਿਕਨਿਕ ਵਿੱਚ ਲੋਕਾਂ ਦੀ ਭਰਵੀਂ ਸ਼ਮੂਲੀਅਤ

ਬਰੈਂਪਟਨ/ਬਿਊਰੋ ਨਿਊਜ਼ : ਬਰੈਂਪਟਨ ਐਕਸ਼ਨ ਸੈਂਟਰ ਵਲੋਂ ਆਰਗੇਨਾਈਜਰ ਨਵੀ ਔਜਲਾ ਅਤੇ ਉਸਦੀ ਟੀਮ ਦੁਆਰਾ ਆਯੋਜਿਤ ਪਿਕਨਿਕ ਨੂੰ ਆਮ ਲੋਕਾਂ ਵਲੋਂ ਭਰਵਾਂ ਹੁੰਗਾਰਾ ਮਿਲਿਆ। ਤਿੰਨ ਸੌ ਤੋਂ ਵੱਧ ਲੋਕਾਂ ਦੀ ਹਾਜ਼ਰੀ ਨੇ ਇਹ ਸਿੱਧ ਕਰ ਦਿੱਤਾ ਕਿ ਲੋਕ ਘੱਟ ਉਜਰਤਾਂ ਤੋਂ ਨਿਜਾਤ ਪਾਕੇ ਆਪਣੇ ਵਧੀਆ ਜੀਵਨ ਲਈ ਉਤਸਕ ਹਨ। ਇਸ ਪਿਕਨਿਕ ਵਿੱਚ ਖਾਣ-ਪੀਣ ਦੇ ਵਧੀਆ ਪਰਬੰਧ ਦੇ ਨਾਲ ਹੀ ਨਿਵੇਕਲੀ ਗੱਲ ਇਹ ਸੀ ਕਿ ਇਹ ਲੋਕਾਂ ਨੂੰ ਆਪਣੇ ਹੱਕਾਂ ਪ੍ਰਤੀ ਜਾਗਰੂਕ ਅਤੇ ਚੇਤਨ ਕਰਨ ਦਾ ਸਬੱਬ ਬਣੀ। ਇਸ ਪਿਕਨਿਕ ਵਿੱਚ ਵਰਕਰਜ਼ ਐਕਸ਼ਨ ਸੈਂਟਰ ਤੋਂ ਉਚੇਚੇ ਤੌਰ ‘ਤੇ ਪਹੁੰਚੀ ਆਰਗੇਨਾਈਜਰ ਡੀਨਾ ਨੇ ਲੋਕਾਂ ਵਲੋਂ ਉਹਨਾਂ ਦਾ ਘੱਟੋ ਘੱਟੋ 15 ਡਾਲਰ ਪ੍ਰਤੀ ਘੰਟਾ ਦੀ ਮੰਗ ਦਾ ਭਾਰੀ ਗਿਣਤੀ ਵਿੱਚ ਪਟੀਸ਼ਨ ਤੇ ਦਸਤਖਤ ਕਰ ਕੇ ਸਾਥ ਦੇਣ ਦਾ ਧੰਨਵਾਦ ਕੀਤਾ। ਉਹਨਾਂ ਕਿਹਾ ਕਿ ਵਰਕਰਜ਼ ਐਕਸ਼ਨ ਸੈਂਟਰ ਵਲੋਂ ਲੋਕਾਂ ਦੇ ਸਹਿਯੋਗ ਨਾਲ ਸਰਕਾਰ ਤੇ ਲਗਾਤਾਰ ਦਬਾਅ ਬਣਾਇਆ ਜਾ ਰਿਹਾ ਹੈ ਕਿ ਪੜਾਅ-ਵਾਰ ਦੀ ਥਾਂ 15 ਡਾਲਰ ਪੇਅ ਤੁਰੰਤ ਕਰਨ ਲਈ ਕਾਨੂੰਨ ਬਣਾਇਆ ਜਾਵੇ। ਦਸਤਖਤੀ ਮੁਹਿੰਮ ਦੇ ਨਾਲ ਹੀ ਘਰਾਂ ਅੱਗੇ ਸਾਈਨ ਲਾਉਣ ਦੀ ਮੁਹਿੰਮ ਵੀ ਸ਼ੁਰੂ ਕੀਤੀ ਗਈ ਹੈ। ਪਰਮਿੰਦਰ ਚੌਹਾਨ ਨੇ ਏਜੰਸੀਆਂ ਰਾਹੀਂ ਹੁੰਦੀ ਲੁੱਟ ਅਤੇ ਲੰਬਾ ਸਮਾਂ ਕੰਮ ਕਰਨ ਦੇ ਬਾਵਜੂਦ ਪੱਕਾ ਨਾ ਕਰਨ ਬਾਰੇ ਆਪਣੇ ਵਿਚਾਰ ਪੇਸ਼ ਕੀਤੇ। ਬਰੈਂਪਟਨ ਐਕਸ਼ਨ ਕਮੇਟੀ ਦੀ ਆਰਗੇਨਾਈਜਰ ਨਵੀ ਔਜਲਾ ਜਿਸ ਦੀ ਟੀਮ ਨੇ ਇਸ ਪਿਕਨਿਕ ਦਾ ਪਰਬੰਧ ਕੀਤਾ ਸੀ ਨੇ ਸਹਿਯੋਗ ਦੇ ਕੇ ਹੌਸਲਾ ਅਫਜਾਈ ਲਈ ਸਭ ਦਾ ਧੰਨਵਾਦ ਕੀਤਾ। ਬਹੁਤ ਸਾਰੇ ਲੋਕਾਂ ਨੇ ਨਵੀ ਔਜਲਾ ਦੁਆਰਾ ਲੇਬਰ ਦੀ ਭਲਾਈ ਲਈ ਕੀਤੇ ਜਾ ਰਹੇ ਕਾਰਜ ਦੀ ਸ਼ਲਾਘਾ ਕੀਤੀ।
ਚੇਤਨਾ ਕਲਚਰਲ ਸੈਂਟਰ ਦੇ ਨਾਹਰ ਔਜਲਾ ਦੀ ਟੀਮ ਜਿਸ ਵਿੱਚ ਅਵਤਾਰ ਔਜਲਾ, ਬਿਕਰਮ ਰੱਖੜਾ, ਸ਼ੰਨੀ ਸ਼ਿਵਰਾਜ, ਹਰਜਸਪ੍ਰੀਤ ਅਤੇ ਸੁੰਦਰਪਾਲ ਰਾਜਾਸਾਂਸੀ ਸ਼ਾਮਲ ਸਨ ਨੇ ‘ਸੁਪਰ-ਵੀਜ਼ਾ’ ਨਾਟਕ ਅਤੇ ‘ਠਰਕੀ ਬਾਬੇ’ ਸਕਿੱਟ ਖੇਡ ਕੇ ਮਨੋਰੰਜਨ ਦੇ ਨਾਲ ਨਾਲ ਭਾਵਪੂਰਤ ਸੰਦੇਸ਼ ਵੀ ਪਹੁੰਚਾਇਆ। ਇਕਬਾਲ ਬਰਾੜ ਦੀ ਸੁਰੀਲੀ ਅਵਾਜ਼ ਦਾ ਵੀ ਲੋਕਾਂ ਨੇ ਆਨੰਦ ਮਾਣਿਆ। ਭੁਪਿੰਦਰ ਰਤਨ ਨੇ ਵੀ ਪਰੀ-ਰਿਕਾਰਡਡ ਮਿਊਜਿਕ ਤੇ ਲਾਈਵ ਗਾ ਕੇ ਰੌਣਕ ਲਾਈ ਰੱਖੀ। ਇਸ ਦੌਰਾਨ ਕਾਊਂਸਲਰ ਗੁਰਪ੍ਰੀਤ ਢਿੱਲੋਂ ਅਤੇ ਸਕੂਲ ਟਰੱਸਟੀ ਹਰਕੀਰਤ ਸਿੰਘ ਨੇ ਆਪਣੇ ਵਿਚਾਰ ਸਰੋਤਿਆਂ ਨਾਲ ਸਾਂਝੇ ਕੀਤੇ। ਬਹੁਤ ਸਾਰੇ ਲੇਖਕਾਂ, ਬੁੱਧੀਜੀਵੀਆਂ ਅਤੇ ਮੀਡੀਆਕਰਮੀਆਂ ਨੇ ਆਪਣੀ ਹਾਜ਼ਰੀ ਲਗਵਾਈ। ਟੀ ਵੀ ਅਤੇ ਪ੍ਰਿੰਟ ਮੀਡੀਆ ਨੇ ਇਸ ਸਾਰੇ ਪਰੋਗਰਾਮ ਦੀ ਕਵਰੇਜ ਕੀਤੀ। ਸਟੇਜ ਤੋਂ ਸਮੁੱਚੇ ਮੀਡੀਏ ਦਾ ਸਹਿਯੋਗ ਦੇਣ ਲਈ ਧੰਨਵਾਦ ਕੀਤਾ ਗਿਆ।

Check Also

ਭਾਵਪੂਰਤ ਅਤੇ ਪ੍ਰੇਰਨਾਦਾਇਕ ਰਿਹਾ ਡਾ. ਨਵਜੋਤ ਕੌਰ ਨਾਲ ਅੰਤਰਰਾਸ਼ਟਰੀ ਪ੍ਰੋਗਰਾਮ ‘ਸਿਰਜਣਾ ਦੇ ਆਰ-ਪਾਰ’

ਟੋਰਾਂਟੋ : ਪੰਜਾਬ ਸਾਹਿਤ ਅਕਾਦਮੀ ਚੰਡੀਗੜ੍ਹ ਅਤੇ ਅੰਤਰਰਾਸ਼ਟਰੀ ਸਾਹਿਤਕ ਸਾਂਝਾਂ ਦੇ ਸਾਂਝੇ ਯਤਨਾਂ ਨਾਲ ਮਹੀਨਾਵਾਰ …