ਇਸ ਫੰਡ ਨਾਲ ਹਸਪਤਾਲ, ਰੈਪਿਡ ਟਰਾਂਜ਼ਿਟ ਸਿਸਟਮ ਤੇ ਕਮਿਊਨਿਟੀ ਸੈਂਟਰ ਬਣਾਏ ਜਾਣਗੇ : ਕਾਰਨੀ
ਓਟਵਾ/ਬਿਊਰੋ ਨਿਊਜ਼ : ਕੈਨੇਡਾ ਦੇ ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਨੇ 51 ਬਿਲੀਅਨ ਡਾਲਰ ਦੇ ਵੱਡੇ ਇਨਫਰਾਸਟ੍ਰੱਕਚਰ ਪ੍ਰੋਗਰਾਮ ‘ਬਿਲਡ ਕਮਿਊਨਿਟੀਜ਼ ਸਟ੍ਰਾਂਗ ਫੰਡ’ ਦੀ ਅਧਿਕਾਰਤ ਸ਼ੁਰੂਆਤ ਕਰ ਦਿੱਤੀ ਹੈ।
ਇਹ ਯੋਜਨਾ ਪਹਿਲਾਂ 2025 ਦੇ ਫੈਡਰਲ ਬਜਟ ਵਿੱਚ ਐਲਾਨੀ ਗਈ ਸੀ ਅਤੇ ਇਸਨੂੰ 10 ਸਾਲਾਂ ਲਈ ਇੱਕ ਵੱਡੀ ਪੀੜ੍ਹੀਗਤ ਨਿਵੇਸ਼ ਯੋਜਨਾ ਵਜੋਂ ਵੇਖਿਆ ਜਾ ਰਿਹਾ ਹੈ। ਕੈਨੇਡਾ ਦੀ ਸਰਕਾਰ ਨੂੰ ਉਮੀਦ ਹੈ ਕਿ ਇਹ ਯੋਜਨਾ ਦੇਸ਼ ਭਰ ਵਿੱਚ ਵਿਕਾਸ ਨੂੰ ਤੇਜ਼ ਕਰੇਗੀ ਅਤੇ ਲੋਕਾਂ ਦੀ ਜ਼ਿੰਦਗੀ ਸੁਧਾਰੇਗੀ।
ਓਟਵਾ ਵਿੱਚ ਇਸ ਸਬੰਧੀ ਐਲਾਨ ਕਰਦਿਆਂ ਪ੍ਰਧਾਨ ਮੰਤਰੀ ਕਾਰਨੀ ਨੇ ਕਿਹਾ ਕਿ ਇਸ ਫੰਡ ਨਾਲ ਹਸਪਤਾਲ, ਰੈਪਿਡ ਟਰਾਂਜ਼ਿਟ ਸਿਸਟਮ ਅਤੇ ਕਮਿਊਨਿਟੀ ਸੈਂਟਰ ਬਣਾਏ ਜਾਣਗੇ, ਜਿਸ ਨਾਲ ਟ੍ਰੈਫਿਕ ਘਟੇਗੀ ਅਤੇ ਲੋਕਾਂ ਦੀ ਯਾਤਰਾ ਦਾ ਸਮਾਂ ਵੀ ਘਟੇਗਾ। ਇਹ ਪ੍ਰੋਜੈਕਟ ਕੈਨੇਡਾ ਦੇ ਅਫੋਰਡੇਬਲ ਹਾਊਸਿੰਗ ਸੰਕਟ ਨੂੰ ਹੱਲ ਕਰਨ ਵਿੱਚ ਵੀ ਮਦਦਗਾਰ ਸਾਬਤ ਹੋ ਸਕਦਾ ਹੈ।
ਇਹ ਵੱਡਾ ਫੰਡ ਤਿੰਨ ਹਿੱਸਿਆਂ ਵਿੱਚ ਵੰਡਿਆ ਗਿਆ ਹੈ। ਪਹਿਲਾ 27.8 ਬਿਲੀਅਨ ਡਾਲਰ ਦਾ ਕਮਿਊਨਿਟੀ ਸਟਰੀਮ ਹੈ, ਜੋ ਸੜਕਾਂ, ਪੁਲਾਂ ਅਤੇ ਹੋਰ ਬੁਨਿਆਦੀ ਢਾਂਚੇ ਲਈ ਵਰਤਿਆ ਜਾਵੇਗਾ। ਦੂਜਾ 17.2 ਬਿਲੀਅਨ ਡਾਲਰ ਦਾ ਸੂਬਾਈ ਅਤੇ ਟੈਰੀਟੋਰਿਅਲ ਸਟਰੀਮ ਹੈ, ਜਿਸ ਨਾਲ ਹਸਪਤਾਲ, ਘਰਾਂ ਅਤੇ ਸਿੱਖਿਆ ਸੰਬੰਧੀ ਢਾਂਚਾ ਬਣਾਇਆ ਜਾਵੇਗਾ। ਤੀਜਾ 6 ਬਿਲੀਅਨ ਡਾਲਰ ਦਾ ਡਾਇਰੈਕਟ ਡਿਲਿਵਰੀ ਸਟਰੀਮ ਹੈ, ਜੋ ਵੱਡੇ ਖੇਤਰੀ ਪ੍ਰੋਜੈਕਟਾਂ ਅਤੇ ਪੁਰਾਣੀਆਂ ਇਮਾਰਤਾਂ ਦੇ ਸੁਧਾਰ ਲਈ ਵਰਤਿਆ ਜਾਵੇਗਾ।