Breaking News
Home / ਜੀ.ਟੀ.ਏ. ਨਿਊਜ਼ / ਟਰੂਡੋ ਨਾਲ ਛੇਤੀ ਮੁਲਾਕਾਤ ਕਰਨਗੇ ਫਰਾਂਸ ਦੇ ਰਾਸ਼ਟਰਪਤੀ ਮੈਕਰੌਨ

ਟਰੂਡੋ ਨਾਲ ਛੇਤੀ ਮੁਲਾਕਾਤ ਕਰਨਗੇ ਫਰਾਂਸ ਦੇ ਰਾਸ਼ਟਰਪਤੀ ਮੈਕਰੌਨ

ਓਟਵਾ/ਬਿਊਰੋ ਨਿਊਜ਼ : ਫਰਾਂਸ ਦੇ ਰਾਸ਼ਟਰਪਤੀ ਇਮੈਨੂਅਲ ਮੈਕਰੌਨ ਛੇਤੀ ਹੀ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨਾਲ ਮੁਲਾਕਾਤ ਕਰਨੀ ਚਾਹੁੰਦੇ ਹਨ। ਕੈਨੇਡਾ ਲਈ ਫਰਾਂਸ ਦੀ ਅੰਬੈਸਡਰ ਕਰੀਨ ਰਿਸਪਲ ਨੇ ਆਖਿਆ ਕਿ ਮਹਾਂਮਾਰੀ ਤੋਂ ਪਹਿਲਾਂ ਦੋਵਾਂ ਮੁਲਕਾਂ ਦਰਮਿਆਨ ਅਧੂਰੇ ਪਏ ਬਿਜਨਸ ਨੂੰ ਮੁੜ ਲੀਹ ‘ਤੇ ਲਿਆਉਣ ਤੋਂ ਇਲਾਵਾ ਮੈਕਰੌਨ ਪਿਛਲੇ ਮਹੀਨੇ ਅਮਰੀਕਾ, ਬ੍ਰਿਟੇਨ ਤੇ ਆਸਟਰੇਲੀਆ ਦਰਮਿਆਨ ਕਾਇਮ ਕੀਤੇ ਗਏ ਗੱਠਜੋੜ ਔਕਸ ਬਾਰੇ ਟਰੂਡੋ ਦੇ ਵਿਚਾਰ ਵੀ ਸੁਣਨਾ ਚਾਹੁੰਦੇ ਹਨ। ਇਨ੍ਹਾਂ ਤਿੰਨਾਂ ਮੁਲਕਾਂ ਵੱਲੋਂ ਬਣਾਏ ਗਏ ਇਸ ਔਕਸ ਗੱਠਜੋੜ ਕਾਰਨ ਮੈਕਰੌਨ ਕਾਫੀ ਖਫਾ ਹਨ ਤੇ ਉਹ ਇਸ ਨੂੰ ਆਪਣੇ ਭਰੋਸੇਮੰਦ ਭਾਈਵਾਲਾਂ ਵੱਲੋਂ ਪਿੱਠ ਵਿੱਚ ਛੁਰਾ ਮਾਰਨ ਬਰਾਬਰ ਮੰਨਿਆ ਜਾ ਰਿਹਾ ਹੈ।
ਦੂਜੇ ਪਾਸੇ ਇਸ ਗੱਠਜੋੜ ਵਿੱਚ ਸ਼ਾਮਲ ਨਾ ਕੀਤੇ ਜਾਣ ਨਾਲ ਟਰੂਡੋ ਨੂੰ ਕੋਈ ਫਰਕ ਪੈਂਦਾ ਨਜ਼ਰ ਨਹੀਂ ਆ ਰਿਹਾ। ਉਨ੍ਹਾਂ ਦਾ ਕਹਿਣਾ ਹੈ ਕਿ ਇਹ ਗੱਠਜੋੜ ਪ੍ਰਮਾਣੂ ਸਬਮਰੀਨਜ ਆਸਟਰੇਲੀਆ ਨੂੰ ਵੇਚਣ ਦਾ ਮਾਮਲਾ ਹੈ, ਜਿਸ ਵਿੱਚ ਕੈਨੇਡਾ ਨੂੰ ਕੋਈ ਦਿਲਚਸਪੀ ਨਹੀਂ। ਇੱਥੇ ਦੱਸਣਾ ਬਣਦਾ ਹੈ ਕਿ ਔਕਸ ਨੂੰ ਇਸ ਲਈ ਕਾਇਮ ਕੀਤਾ ਗਿਆ ਹੈ ਤਾਂ ਕਿ ਇੰਡੋ-ਪੈਸੇਫਿਕ ਵਿੱਚ ਚੀਨ ਦੇ ਵੱਧ ਰਹੇ ਦਬਦਬੇ ਦਾ ਸਾਹਮਣਾ ਕਰਨ ਲਈ ਆਸਟਰੇਲੀਆ ਦੇ ਹੱਥ ਮਜਬੂਤ ਕੀਤੇ ਜਾ ਸਕਣ। ਪ੍ਰਮਾਣੂ ਸਬਮਰੀਨਜ ਦੇ ਫਲੀਟ ਨਾਲ ਆਸਟਰੇਲੀਆ ਨੂੰ ਲੈਸ ਕਰਨਾ ਦੀ ਗਰੁੱਪ ਨੂੰ ਕਾਇਮ ਕਰਨ ਦਾ ਮੁੱਖ ਮਕਸਦ ਹੈ। ਇਸ ਦੇ ਨਾਲ ਹੀ ਇਸ ਡੀਲ ਨਾਲ ਤਿੰਨਾਂ ਦੇਸ਼ਾਂ ਦਰਮਿਆਨ ਡਿਫੈਂਸ ਇੰਡਸਟਰੀ ਵਿੱਚ ਸਹਿਯੋਗ ਹੋਰ ਵਧੇਗਾ। ਫਰਾਂਸ ਦੇ ਰਾਸਟਰਪਤੀ ਨੂੰ ਇਸ ਮਾਮਲੇ ਵਿੱਚ ਗੁੱਸਾ ਇਸ ਲਈ ਆਇਆ ਕਿਉਂਕਿ ਉਸ ਦੇ ਡਿਫੈਂਸ ਕਾਂਟਰੈਕਟਰਜ ਵੀ ਪ੍ਰਮਾਣੂ ਸਬਮਰੀਨਜ ਬਣਾਉਂਦੇ ਹਨ। ਮੈਕਰੌਨ ਨੇ ਵਾਸ਼ਿੰਗਟਨ ਤੋਂ ਆਪਣੇ ਅੰਬੈਸਡਰ ਨੂੰ ਵਾਪਿਸ ਸੱਦ ਕੇ ਇਸ ਸਬੰਧ ਵਿੱਚ ਆਪਣਾ ਗੁੱਸਾ ਪ੍ਰਗਟਾਇਆ। ਭਾਵੇਂ ਅੰਬੈਸਡਰ ਆਪਣੇ ਅਹੁਦੇ ਉੱਤੇ ਮੁੜ ਆ ਗਏ ਹਨ ਪਰ ਮੈਕਰੌਨ ਦੇ ਗੁੱਸੇ ਨੂੰ ਸ਼ਾਂਤ ਕਰਨ ਲਈ ਬਾਇਡਨ ਪ੍ਰਸਾਸ਼ਨ ਵੱਲੋਂ ਕਈ ਤਰ੍ਹਾਂ ਦੀਆਂ ਕੋਸ਼ਿਸ਼ਾਂ ਕੀਤੀਆਂ ਜਾ ਰਹੀਆਂ ਹਨ। ਇਸ ਵੀ ਪਤਾ ਲੱਗਿਆ ਹੈ ਕਿ ਮੈਕਰੌਨ ਅਮਰੀਕਾ ਦੇ ਰਾਸ਼ਟਰਪਤੀ ਜੋਅ ਬਾਇਡਨ ਨਾਲ ਮੀਟਿੰਗ ਕਰਨ ਉੱਤੇ ਕੰਮ ਕਰ ਰਹੇ ਹਨ।
ਇਸ ਦੌਰਾਨ ਟਰੂਡੋ ਦੇ ਤਰਜਮਾਨ ਐਲੈਕਸ ਵੈੱਲਸਟੈੱਡ ਨੇ ਇੱਕ ਈਮੇਲ ਵਿੱਚ ਆਖਿਆ ਕਿ ਪ੍ਰਧਾਨ ਮੰਤਰੀ ਵੀ ਜਲਦ ਤੋਂ ਜਲਦ ਰਾਸ਼ਟਰਪਤੀ ਮੈਕਰੌਨ ਨਾਲ ਮੁਲਾਕਾਤ ਕਰਨਗੇ।

 

Check Also

ਫੋਰਡ ਸਰਕਾਰ ਨੇ ਪੇਸ਼ ਕੀਤਾ 214 ਬਿਲੀਅਨ ਦੇ ਖਰਚੇ ਵਾਲਾ ਬਜਟ

ਲਿਬਰਲ ਆਗੂ ਬੌਨੀ ਕ੍ਰੌਂਬੀ ਨੇ ਬਜਟ ਦੀ ਜਮ ਕੇ ਕੀਤੀ ਆਲੋਚਨਾ ਓਨਟਾਰੀਓ/ਬਿਊਰੋ ਨਿਊਜ਼ : ਡਗ …