ਬਰੈਂਪਟਨ/ਪਰਵਾਸੀ ਨਿਊਜ਼ : ਬਰੈਂਪਟਨ ਨਾਰਥ-ਕੈਲੇਡਨ ਫੈਡਰਲ ਲਿਬਰਲ ਐਸੋਸੀਏਸ਼ਨ ਵੱਲੋਂ ਐਤਵਾਰ ਨੂੰ ਕਰਵਾਏ ਗਏ ਕਮਿਊਨਿਟੀ ਬਾਰਬੀਕਿਊ ਸਮਾਗਮ ਵਿੱਚ 1000 ਤੋਂ ਵੱਧ ਵਿਅਕਤੀਆਂ ਨੇ ਸ਼ਮੂਲੀਅਤ ਕੀਤੀ। ਬ੍ਰੈਂਪਟਨ ਨਾਰਥ-ਕੈਲੇਡਨ ਦੀ ਸੰਸਦ ਮੈਂਬਰ ਰੂਬੀ ਸਹੋਤਾ ਦੀ ਮੌਜੂਦਗੀ ਵਿੱਚ ਹੋਏ ਇਸ ਸਮਾਗਮ ਦਾ ਉਦੇਸ਼ ਭਾਈਚਾਰੇ, ਪਰਿਵਾਰਾਂ ਅਤੇ ਬਰੈਂਪਟਨ ਤੇ ਕੈਲੇਡਨ ਨੂੰ ਵਿਲੱਖਣ ਬਣਾਉਣ ਵਾਲੇ ਲੋਕਾਂ ਨਾਲ ਜੁੜਨਾ ਸੀ। ਰੂਬੀ ਸਹੋਤਾ ਨੇ ਸਮਾਗਮ ਦੌਰਾਨ ਲੋਕਾਂ, ਪਰਿਵਾਰਾਂ ਅਤੇ ਵਲੰਟੀਅਰਾਂ ਨਾਲ ਮੁਲਾਕਾਤ ਕੀਤੀ ਅਤੇ ਰੁਜ਼ਗਾਰ, ਮਹਿੰਗਾਈ, ਸੜਕਾਂ ਦੀ ਸੁਰੱਖਿਆ ਅਤੇ ਬੱਚਿਆਂ ਦੇ ਭਵਿੱਖ ਨਾਲ ਜੁੜੇ ਮੁੱਦਿਆਂ ਬਾਰੇ ਉਨ੍ਹਾਂ ਦੇ ਵਿਚਾਰ ਸੁਣੇ।
ਸਹੋਤਾ ਨੇ ਕਿਹਾ ਕਿ ਸਰਕਾਰ ਦਾ ਕੰਮ ਓਟਵਾ ਤੋਂ ਨਹੀਂ, ਸਗੋਂ ਲੋਕਾਂ ਨਾਲ ਹੋਈਆਂ ਅਜਿਹੀਆਂ ਗੱਲਬਾਤਾਂ ਤੋਂ ਸ਼ੁਰੂ ਹੋਇਆ ਹੈ। ਉਨ੍ਹਾਂ ਕਿਹਾ ਕਿ ਇਲਾਕੇ ਦੇ ਵਸਨੀਕਾਂ ਨੇ ਜਬਰੀ ਵਸੂਲੀ, ਵਾਹਨ ਚੋਰੀ ਅਤੇ ਵਾਰ-ਵਾਰ ਹਿੰਸਕ ਅਪਰਾਧ ਕਰਨ ਵਾਲੇ ਲੋਕਾਂ ਦੀ ਰਿਹਾਈ ਨੂੰ ਲੈ ਕੇ ਚਿੰਤਾ ਪ੍ਰਗਟਾਈ ਸੀ। ਉਨ੍ਹਾਂ ਮੁਤਾਬਕ ਸਰਕਾਰ ਨੇ ਇਨ੍ਹਾਂ ਮੁੱਦਿਆਂ ‘ਤੇ ਕਾਰਵਾਈ ਕੀਤੀ ਹੈ।
ਸਰਕਾਰ ਵੱਲੋਂ 2025 ਦੀ ਪਤਝੜ ਤੋਂ ਹੁਣ ਤੱਕ ਜਨਤਕ ਸੁਰੱਖਿਆ ਨਾਲ ਸਬੰਧਤ ਚਾਰ ਬਿੱਲ ਅੱਗੇ ਵਧਾਏ ਗਏ ਹਨ। ਇਨ੍ਹਾਂ ਵਿੱਚ ਬੇਲ ਅਤੇ ਸਜ਼ਾ ਸੁਧਾਰ ਕਾਨੂੰਨ ਵੀ ਸ਼ਾਮਲ ਹੈ, ਜੋ 15 ਜੁਲਾਈ ਤੋਂ ਲਾਗੂ ਹੋ ਗਿਆ। ਜਬਰੀ ਵਸੂਲੀ ਨਾਲ ਨਜਿੱਠਣ ਲਈ ਸਰੀ, ਬਰੈਂਪਟਨ ਅਤੇ ਵਿਨੀਪੈਗ ਵਿੱਚ ਹੋਏ ਸੰਮੇਲਨਾਂ ਰਾਹੀਂ ਵੱਖ-ਵੱਖ ਪੱਧਰਾਂ ਦੀਆਂ ਸਰਕਾਰਾਂ ਅਤੇ ਕਾਨੂੰਨ ਲਾਗੂ ਕਰਨ ਵਾਲੀਆਂ ਏਜੰਸੀਆਂ ਵਿਚਕਾਰ ਤਾਲਮੇਲ ਵਧਾਉਣ ਦੀ ਕੋਸ਼ਿਸ਼ ਕੀਤੀ ਗਈ ਹੈ।
ਸਮਾਗਮ ਦੌਰਾਨ ਕੈਨੇਡਾ ਦੀ ਆਰਥਿਕਤਾ ਨੂੰ ਮਜ਼ਬੂਤ ਕਰਨ ਅਤੇ ਵਪਾਰਕ ਭਾਈਵਾਲੀ ਵਿੱਚ ਵਿਭਿੰਨਤਾ ਲਿਆਉਣ ਬਾਰੇ ਵੀ ਜਾਣਕਾਰੀ ਸਾਂਝੀ ਕੀਤੀ ਗਈ। ਸਰਕਾਰ ਮੁਤਾਬਕ ਪਿਛਲੇ ਇੱਕ ਸਾਲ ਵਿੱਚ ਕੈਨੇਡਾ ਨੇ ਪੰਜ ਮਹਾਂਦੀਪਾਂ ਵਿੱਚ 20 ਤੋਂ ਵੱਧ ਵਪਾਰਕ ਅਤੇ ਸੁਰੱਖਿਆ ਸਮਝੌਤੇ ਕੀਤੇ ਹਨ। ਇਹ ਸਮਾਗਮ ਬਰੈਂਪਟਨ ਸੌਕਰ ਸੈਂਟਰ ਵਿਖੇ ਹੋਇਆ, ਜਿਸ ਵਿੱਚ ਬਾਰਬੀਕਿਊ, ਸੱਭਿਆਚਾਰਕ ਫੂਡ, ਆਈਸਕ੍ਰੀਮ, ਬੱਚਿਆਂ ਲਈ ਗਤੀਵਿਧੀਆਂ, ਫੇਸ ਪੇਂਟਿੰਗ ਅਤੇ ਸਥਾਨਕ ਸੰਸਥਾਵਾਂ ਦੀ ਭਾਗੀਦਾਰੀ ਰਹੀ। ਸਮਾਗਮ ਵਿੱਚ ਭਾਈਚਾਰਕ ਆਗੂਆਂ, ਚੁਣੇ ਹੋਏ ਨੁਮਾਇੰਦਿਆਂ ਅਤੇ ਖੇਤਰ ਦੇ ਮਿਊਂਸਪਲ ਉਮੀਦਵਾਰਾਂ ਨੇ ਵੀ ਸ਼ਿਰਕਤ ਕੀਤੀ।
ਬਰੈਂਪਟਨ ਨਾਰਥ-ਕੈਲੇਡਨ ਫੈਡਰਲ ਲਿਬਰਲ ਐਸੋਸੀਏਸ਼ਨ ਨੇ ਸਮਾਗਮ ਨੂੰ ਸਫਲ ਬਣਾਉਣ ਲਈ ਵਲੰਟੀਅਰਾਂ, ਭਾਈਚਾਰਕ ਸੰਸਥਾਵਾਂ, ਵਿਕਰੇਤਾਵਾਂ ਅਤੇ ਵਸਨੀਕਾਂ ਦਾ ਧੰਨਵਾਦ ਕੀਤਾ।