ਹੌਂਡਾ ਨੇ ਉਨਟਾਰੀਓ ਦਾ 15 ਬਿਲੀਅਨ ਡਾਲਰ ਦਾ ਪ੍ਰੋਜੈਕਟ ਰੋਕਿਆ

ਉਨਟਾਰੀਓ/ਬਿਊਰੋ ਨਿਊਜ਼ : ਹੌਂਡਾ ਨੇ ਉਨਟਾਰੀਓ ਵਿੱਚ ਬਣਾਏ ਜਾਣ ਵਾਲੇ ਆਪਣੇ 15 ਬਿਲੀਅਨ ਡਾਲਰ ਦੇ ਇਲੈਕਟ੍ਰਿਕ ਵਾਹਨ (ਈਵੀ) ਪ੍ਰੋਜੈਕਟ ਨੂੰ ਅਨਿਸ਼ਚਿਤ ਸਮੇਂ ਲਈ ਮੁਅੱਤਲ ਕਰਨ ਦਾ ਐਲਾਨ ਕੀਤਾ ਹੈ। ਕੰਪਨੀ ਨੇ ਕਿਹਾ ਕਿ ਬਦਲਦੇ ਕਾਰੋਬਾਰੀ ਹਾਲਾਤ ਅਤੇ ਈਵੀ ਮਾਰਕੀਟ ਵਿੱਚ ਆਈ ਮੰਦੀ ਕਾਰਨ ਇਹ ਫੈਸਲਾ ਲਿਆ ਗਿਆ ਹੈ। ਕੰਪਨੀ ਨੇ ਪਹਿਲਾਂ ਵੀ ਮਈ 2025 ਵਿੱਚ ਇਸ ਪ੍ਰੋਜੈਕਟ ਨੂੰ ਅਸਥਾਈ ਤੌਰ ‘ਤੇ ਰੋਕਣ ਦੀ ਗੱਲ ਕਹੀ ਸੀ ਅਤੇ ਦੋ ਸਾਲ ਬਾਅਦ ਮਾਰਕੀਟ ਦੀ ਸਥਿਤੀ ਦੇ ਅਧਾਰ ‘ਤੇ ਅਗਲਾ ਫੈਸਲਾ ਕਰਨ ਦੀ ਯੋਜਨਾ ਦੱਸੀ ਸੀ। ਹੁਣ ਹੌਂਡਾ ਨੇ ਇਸ ਯੋਜਨਾ ਨੂੰ ਹੋਰ ਲੰਬੇ ਸਮੇਂ ਲਈ ਰੋਕਣ ਦਾ ਫੈਸਲਾ ਕਰ ਲਿਆ ਹੈ। ਹੌਂਡਾ ਨੇ ਆਪਣੇ ਬਿਆਨ ਵਿੱਚ ਕਿਹਾ ਕਿ ਨਵੇਂ ਕਾਰੋਬਾਰੀ ਟੀਚਿਆਂ ਅਤੇ ਮਾਰਕੀਟ ਦੇ ਹਾਲਾਤ ਨੂੰ ਦੇਖਦਿਆਂ ਇਹ ਕਦਮ ਚੁੱਕਿਆ ਗਿਆ ਹੈ। ਕੰਪਨੀ ਨੇ ਇਹ ਵੀ ਕਿਹਾ ਕਿ ਉਹ ਭਵਿੱਖ ਦੀਆਂ ਖਰੀਦ ਅਤੇ ਕਾਰੋਬਾਰੀ ਰਣਨੀਤੀਆਂ ‘ਤੇ ਕੰਮ ਜਾਰੀ ਰੱਖੇਗੀ। ਕੰਪਨੀ ਨੇ ਸਪੱਸ਼ਟ ਕੀਤਾ ਕਿ ਇਸ ਫੈਸਲੇ ਦਾ ਐਲਿਸਟਨ ਸਥਿਤ ਮੌਜੂਦਾ ਉਤਪਾਦਨ ਪਲਾਂਟ ਦੇ ਰੁਜ਼ਗਾਰ ਜਾਂ ਉਤਪਾਦਨ ‘ਤੇ ਕੋਈ ਅਸਰ ਨਹੀਂ ਪਵੇਗਾ। ਇਹ ਪ੍ਰੋਜੈਕਟ ਪੂਰਾ ਹੋਣ ‘ਤੇ ਕਰੀਬ 1000 ਨਵੇਂ ਮੈਨੂਫੈਕਚਰਿੰਗ ਰੁਜ਼ਗਾਰ ਪੈਦਾ ਕਰਨ ਅਤੇ 2028 ਤੱਕ ਹਰ ਸਾਲ ਕਰੀਬ 2 ਲੱਖ 40 ਹਜ਼ਾਰ ਵਾਹਨ ਤਿਆਰ ਕਰਨ ਦੀ ਸਮਰੱਥਾ ਰੱਖਦਾ ਸੀ। ਹੌਂਡਾ ਦੇ ਸੀਈਓ ਤੋਸ਼ੀਹੀਰੋ ਮਾਈਬ ਨੇ ਕਿਹਾ ਕਿ ਹੁਣ ਕੰਪਨੀ ਹਾਈਬ੍ਰਿਡ ਅਤੇ ਗੈਸ ਵਾਲੀਆਂ ਗੱਡੀਆਂ ‘ਤੇ ਵੱਧ ਧਿਆਨ ਦੇਵੇਗੀ, ਹਾਲਾਂਕਿ ਕਾਰਬਨ ਨਿਊਟ੍ਰੈਲ ਬਣਨ ਦਾ ਟੀਚਾ ਜਾਰੀ ਰਹੇਗਾ।