ਸੂਬੇ ‘ਚ ਅੰਤਰਰਾਸ਼ਟਰੀ ਵਿਦਿਆਰਥੀਆਂ ਦੀ ਗਿਣਤੀ ਘੱਟ ਕਰੇਗਾ ਕਿਊਬੇਕ

ਕਾਲਜੀਏਟ ਨੈੱਟਵਰਕ ਦੇ ਵਿਦਿਆਰਥੀਆਂ ਦੀ ਗਿਣਤੀ ਸਾਢੇ 19 ਹਜ਼ਾਰ ਘਟਾਈ
ਓਟਵਾ/ਬਿਊਰੋ ਨਿਊਜ਼ : ਕਿਊਬੇਕ ਸਰਕਾਰ ਇਸ ਸਾਲ ਕਿਊਬੇਕ ਦੇ ਪੋਸਟ-ਸੈਕੰਡਰੀ ਸੰਸਥਾਨਾਂ ਵਿੱਚ ਦਾਖਲਾ ਲੈਣ ਵਾਲੇ ਅੰਤਰਰਾਸ਼ਟਰੀ ਵਿਦਿਆਰਥੀਆਂ ਦੀ ਗਿਣਤੀ ਵਿੱਚ 20 ਫੀਸਦੀ ਦੀ ਕਮੀ ਕਰ ਰਹੀ ਹੈ। ਇਮੀਗ੍ਰੇਸ਼ਨ ਮੰਤਰਾਲਾ ਨੇ ਪ੍ਰਾਂਤ ਦੇ ਆਧਿਕਾਰਿਕ ਰਾਜਪੱਤਰ ਵਿਚ ਨਵੇਂ ਅੰਤਰਰਾਸ਼ਟਰੀ ਵਿਦਿਆਰਥੀਆਂ ਦੀਆਂ ਵਿਚਾਰੀਆਂ ਜਾਣ ਵਾਲੀਆਂ ਅਰਜ਼ੀਆਂ ਦੀ ਗਿਣਤੀ ਪ੍ਰਕਾਸ਼ਿਤ ਕੀਤੀ ਹੈ। ਸੰਸਥਾਨ ਅਤੇ ਡਿਗਰੀ ਦੇ ਪ੍ਰਕਾਰ ਅਨੁਸਾਰ ਵੰਡਿਆ ਕੋਟਾ ਇਸ ਪਤਝੜ ਵਿੱਚ ਸੂਬੇ ਦੇ ਕਾਲਜੀਏਟ ਨੈੱਟਵਰਕ ਵਿੱਚ ਦਾਖ਼ਲਾ ਲੈਣ ਵਾਲੇ ਅੰਤਰਰਾਸ਼ਟਰੀ ਵਿਦਿਆਰਥੀਆਂ ਦੀ ਗਿਣਤੀ ਨੂੰ ਕਾਫ਼ੀ ਘੱਟ ਕਰ ਦਿੰਦਾ ਹੈ। ਸਰਕਾਰ 2024 ਦੇ ਪੱਧਰ ਅਨੁਸਾਰ ਕਿਊਬੇਕ ਦੀਆਂ ਯੂਨੀਵਰਸਿਟੀਆਂ ਵਿਚ ਅੰਤਰਰਾਸ਼ਟਰੀ ਵਿਦਿਆਰਥੀਆਂ ਦੀ ਇਨਰੌਲਮੈਂਟ ਨੂੰ ਵੀ ਸਥਿਰ ਕਰਦੀ ਹੈ। ਕਿਊਬੇਕ ਦੇ ਇਮੀਗ੍ਰੇਸ਼ਨ ਮੰਤਰੀ ਜੀਨ-ਫਰਾਂਸਵਾ ਰੋਬਰਗ ਨੇ ਕਿਹਾ ਕਿ ਇਹ ਕੋਟਾ ਇੱਕ ਸਾਲ ਲਈ ਨਿਯਮਤ ਹੈ, ਜਿਸਦੇ ਨਾਲ ਸਰਕਾਰ ਨੂੰ ਆਪਣੀਆਂ ਜ਼ਰੂਰਤਾਂ ਅਨੁਸਾਰ ਸਥਿਤੀ ਦਾ ਮੁੜ ਮੁਲਾਂਕਣ ਕਰਨ ਦਾ ਮੌਕਾ ਮਿਲੇਗਾ।
ਵਿਦਿਆਰਥੀ ਵੀਜ਼ਾ ਸਰਕਾਰ ਵੱਲੋਂ ਜਾਰੀ ਕੀਤੇ ਜਾਂਦੇ ਹਨ। ਕਿਊਬੇਕ ਵਿੱਚ ਵਿਦੇਸ਼ ਤੋਂ ਆਉਣ ਵਾਲੇ ਵਿਦਿਆਰਥੀਆਂ ਨੂੰ ਰਾਜ ਦੀ ਸਰਕਾਰ ਵਲੋਂ ਕਿਊਬੇਕ ਮਨਜ਼ੂਰੀ ਪ੍ਰਮਾਣ ਪੱਤਰ, ਜਿਸ ਨੂੰ ਸੀ.ਏ.ਕਿਊ. ਦੇ ਰੂਪ ਵਿੱਚ ਜਾਣਿਆ ਜਾਂਦਾ ਹੈ, ਵੀ ਪ੍ਰਾਪਤ ਕਰਨਾ ਹੋਵੇਗਾ, ਜੋ ਕਿ ਸਟੱਡੀ ਪਰਮਿਟ ਤੋਂ ਪਹਿਲਾਂ ਹਾਸਿਲ ਕਰਨਾ ਲਾਜ਼ਮੀ ਹੈ। ਮੰਤਰਾਲਾ ਦੇ ਅੰਕੜਿਆਂ ਅਨੁਸਾਰ 2024 ਵਿੱਚ ਸਿੱਖਿਆ ਮੰਤਰਾਲਾ ਨੇ ਕਾਲਜੀਏਟ ਨੈੱਟਵਰਕ ਵਿੱਚ ਦਾਖ਼ਲਾ ਲੈਣ ਵਾਲੇ ਅੰਤਰਰਾਸ਼ਟਰੀ ਵਿਦਿਆਰਥੀਆਂ ਦੀਆਂ ਸੀ.ਏ.ਕਿਊ. ਲਈ 48,748 ਅਰਜ਼ੀਆਂ ਪ੍ਰੋਸੈੱਸ ਕੀਤੀਆਂ, ਜਿਨ੍ਹਾਂ ਉੱਤੇ ਕੈਪ ਲਗਾ ਕੇ ਇਸ ਨੂੰ 29,200 ਕਰਕੇ ਕਰੀਬ ਸਾਢੇ 19 ਹਜ਼ਾਰ ਅਰਜ਼ੀਆਂ ਦਾ ਕੱਟ ਲਾਇਆ ਗਿਆ ਹੈ।
ਯੂਨੀਵਰਸਿਟੀਆਂ ਲਈ ਕੋਟਾ 63,299 ਅਰਜ਼ੀਆਂ ਦਾ ਹੈ। ਬਿਜ਼ਨਸ ਕਾਲਜਾਂ ਸਹਿਤ ਕਿਊਬੇਕ 26 ਫਰਵਰੀ, 2025 ਅਤੇ 2026 ਦੇ ਵਿੱਚ ਵੱਧ ਤੋਂ ਵੱਧ 1,24,760 ਅਰਜ਼ੀਆਂ ਪ੍ਰੋਸੈੱਸ ਕਰੇਗਾ ਜੋ ਕਿ ਪਿਛਲੇ ਸਾਲ ਦੀ ਤੁਲਨਾ ਵਿੱਚ 20 ਫ਼ੀਸਦੀ ਘੱਟ ਹੈ।