ਏਅਰ ਕੈਨੇਡਾ ਨੂੰ ਮਿਲਿਆ ਨਵਾਂ ਸੀਈਓ

ਓਟਵਾ/ਪਰਵਾਸੀ ਨਿਊਜ਼ : ਕੈਨੇਡਾ ਦੀ ਪ੍ਰਮੁੱਖ ਏਅਰਲਾਈਨ ਏਅਰ ਕੈਨੇਡਾ ਨੇ ਸਕੈਂਡੀਨੇਵੀਅਨ ਏਅਰਲਾਈਨਜ਼ (ਐਸਏਐਸ) ਦੇ ਮੌਜੂਦਾ ਮੁਖੀ ਐਨਕੋ ਵੈਨ ਡਰ ਵਰਫ ਨੂੰ ਆਪਣਾ ਨਵਾਂ ਮੁੱਖ ਕਾਰਜਕਾਰੀ ਅਧਿਕਾਰੀ (ਸੀਈਓ) ਨਿਯੁਕਤ ਕੀਤਾ ਹੈ। ਉਹ ਜਨਵਰੀ 2027 ਦੇ ਅੰਤ ਤੱਕ ਅਹੁਦਾ ਸੰਭਾਲਣ ਦੇ ਨਾਲ ਕੰਪਨੀ ਦੇ ਬੋਰਡ ਆਫ਼ ਡਾਇਰੈਕਟਰਜ਼ ਵਿੱਚ ਵੀ ਸ਼ਾਮਲ ਹੋਣਗੇ। ਏਅਰ ਕੈਨੇਡਾ ਦੇ ਚੇਅਰਮੈਨ ਵੈਗਨ ਸੋਰੈਨਸਨ ਨੇ ਕਿਹਾ ਕਿ ਵੈਨ ਡਰ ਵਰਫ ਕੋਲ ਹਵਾਬਾਜ਼ੀ ਖੇਤਰ ਦਾ 25 ਸਾਲਾਂ ਤੋਂ ਵੱਧ ਦਾ ਅੰਤਰਰਾਸ਼ਟਰੀ ਤਜ਼ਰਬਾ ਹੈ ਅਤੇ ਉਨ੍ਹਾਂ ਦੀ ਅਗਵਾਈ ਵਿੱਚ ਕੰਪਨੀ ਹੋਰ ਵਿਕਾਸ ਕਰੇਗੀ। ਵੈਨ ਡਰ ਵਰਫ ਮੌਜੂਦਾ ਸੀਈਓ ਮਾਈਕਲ ਰੂਸੋ ਦੀ ਥਾਂ ਲੈਣਗੇ, ਜੋ 31 ਅਗਸਤ 2026 ਨੂੰ ਸੇਵਾਮੁਕਤ ਹੋਣਗੇ। ਰੂਸੋ ਪਿਛਲੇ 19 ਸਾਲਾਂ ਤੋਂ ਏਅਰ ਕੈਨੇਡਾ ਨਾਲ ਜੁੜੇ ਹੋਏ ਸਨ ਅਤੇ ਪੰਜ ਸਾਲਾਂ ਤੋਂ ਸੀਈਓ ਵਜੋਂ ਸੇਵਾ ਨਿਭਾ ਰਹੇ ਸਨ। ਵੈਨ ਡਰ ਵਰਫ ਇਸ ਤੋਂ ਪਹਿਲਾਂ ਐਸਏਐਸ ਦੇ ਸੀਈਓ ਰਹਿ ਚੁੱਕੇ ਹਨ। ਉਹ ਐਵਿਆਂਕਾ ਅਤੇ ਏਰੋਮੈਕਸੀਕੋ ਵਰਗੀਆਂ ਵੱਡੀਆਂ ਏਅਰਲਾਈਨਜ਼ ਵਿੱਚ ਵੀ ਉੱਚ ਅਹੁਦਿਆਂ ‘ਤੇ ਕੰਮ ਕਰ ਚੁੱਕੇ ਹਨ। ਉਹ ਡੱਚ, ਅੰਗਰੇਜ਼ੀ ਅਤੇ ਫਰੈਂਚ ਸਮੇਤ ਕਈ ਭਾਸ਼ਾਵਾਂ ਵਿੱਚ ਗੱਲਬਾਤ ਕਰਨ ਦੇ ਸਮਰੱਥ ਹਨ। ਮਾਈਕਲ ਰੂਸੋ ਨੂੰ ਫਰੈਂਚ ਭਾਸ਼ਾ ਵਿੱਚ ਸੰਚਾਰ ਨਾ ਕਰਨ ਨੂੰ ਲੈ ਕੇ ਕਾਫ਼ੀ ਆਲੋਚਨਾ ਦਾ ਸਾਹਮਣਾ ਕਰਨਾ ਪਿਆ ਸੀ। ਖ਼ਾਸ ਕਰਕੇ ਏਅਰ ਕੈਨੇਡਾ ਐਕਸਪ੍ਰੈਸ ਦੇ ਦੋ ਪਾਇਲਟਾਂ ਦੀ ਮੌਤ ਤੋਂ ਬਾਅਦ ਜਾਰੀ ਕੀਤੇ ਗਏ ਸਿਰਫ਼ ਅੰਗਰੇਜ਼ੀ ਵੀਡੀਓ ਸੰਦੇਸ਼ ਕਾਰਨ ਉਨ੍ਹਾਂ ਦੀ ਸਖਤ ਨਿੰਦਾ ਹੋਈ ਸੀ।