ਗੁਜਰਾਤ ਦੰਗਿਆਂ ਦੌਰਾਨ 69 ਲੋਕਾਂ ਦੇ ਕਤਲ ਮਾਮਲੇ ਵਿਚ 24 ਦੋਸ਼ੀ ਕਰਾਰ, 36 ਬਰੀ

ਅਹਿਮਦਾਬਾਦ : 14 ਸਾਲ ਪਹਿਲਾਂ ਗੁਜਰਾਤ ਦੰਗਿਆਂ ਦੌਰਾਨ ਹੋਏ ਗੁਲਬਰਗ ਸੁਸਾਇਟੀ ਕਤਲਕਾਂਡ ‘ਤੇ ਅੱਜ ਸਪੈਸ਼ਲ ਕੋਰਟ ਨੇ ਆਪਣਾ ਫੈਸਲਾ ਸੁਣਾਇਆ ਹੈ। ਅਦਾਲਤ ਨੇ 24 ਮੁਲਜ਼ਮਾਂ ਨੂੰ ਦੋਸ਼ੀ ਕਰਾਰ ਦਿੱਤਾ, ਜਦਕਿ 36 ਮੁਲਜ਼ਮਾਂ ਨੂੰ ਬਰੀ ਕਰ ਦਿੱਤਾ ਹੈ। ਦੋਸ਼ੀਆਂ ਲਈ ਸਜ਼ਾ ਦਾ ਐਲਾਨ 6 ਜੂਨ ਨੂੰ ਕੀਤਾ ਜਾਏਗਾ। ਦੋਸ਼ੀ ਕਰਾਰ ਦਿੱਤੇ 24 ਮੁਲਜ਼ਮਾਂ ਵਿਚੋਂ 11 ਨੂੰ ਕਤਲ ਦਾ ਦੋਸ਼ੀ ਮੰਨਿਆ ਗਿਆ ਹੈ।ਅਦਾਲਤ ਨੇ ਵੀਐਚਪੀ ਲੀਡਰ ਅਤੁਲ ਤੇ ਕਾਂਗਰਸ ਆਗੂ ਮੇਘ ਸਿੰਘ ਚੌਧਰੀ ਨੂੰ ਵੀ ਦੋਸ਼ੀ ਕਰਾਰ ਦਿੱਤਾ ਹੈ ਜਦਕਿ ਭਾਜਪਾ ਆਗੂ ਬਿਪਿਨ ਪਟੇਲ ਨੂੰ ਬੇਗੁਨਾਹ ਕਰਾਰ ਦਿੱਤਾ ਗਿਆ ਹੈ। ਅਦਾਲਤ ਨੇ ਇਹਨਾਂ ਦੰਗਿਆਂ ਪਿੱਛੇ ਕਿਸੇ ਸਾਜ਼ਿਸ਼ ਦੀ ਗੱਲ ਵੀ ਨਹੀਂ ਮੰਨੀ। ਅਦਾਲਤ ਦੇ ਇਸ ਫੈਸਲੇ ‘ਤੇ ਦੰਗਿਆਂ ਵਿਚ ਮਾਰੇ ਗਏ ਸਾਬਕਾ ਸੰਸਦ ਮੈਂਬਰ ਅਹਿਸਾਨ ਜਾਫਰੀ ਦੀ ਪਤਨੀ ਜਕਿਆ ਜਾਫਰੀ ਸੰਤੁਸ਼ਟ ਨਹੀਂ ਹਨ। ਜਾਫਰੀ ਅਦਾਲਤ ਵੱਲੋਂ ਬਰੀ ਕੀਤੇ ਮੁਲਜ਼ਮਾਂ ਖਿਲਾਫ ਉੱਚ ਅਦਾਲਤ ਵਿਚ ਅਪੀਲ ਕਰਨਗੇ। ਉਨ੍ਹਾਂ ਕਿਹਾ ਕਿ ਇਨਸਾਫ ਮਿਲਣ ਤੱਕ ਕਾਨੂੰਨੀ ਲੜਾਈ ਜਾਰੀ ਰਹੇਗੀ।