ਕੁਮਾਰ ਵਿਸ਼ਵਾਸ ਤੇ ਕਪਿਲ ਮਿਸ਼ਰਾ ਉਤੇ ‘ਆਪ’ ਆਗੂ ਲਗਾਉਣ ਲੱਗੇ ਇਲਜ਼ਾਮ

ਸਰਕਾਰ ਡੇਗਣ ਦੀਆਂ ਹੋ ਰਹੀਆਂ ਹਨ ਕੋਸ਼ਿਸ਼ਾਂ
ਨਵੀਂ ਦਿੱਲੀ/ਬਿਊਰੋ ਨਿਊਜ਼
ਆਮ ਆਦਮੀ ਪਾਰਟੀ ਵਿੱਚ ਇੱਕ ਵਾਰ ਮੁੜ ਭੁਚਾਲ ਆ ਗਿਆ ਹੈ। ਪਾਰਟੀ ਦੇ ਨੇਤਾ ਗੋਪਾਲ ਰਾਏ ਨੇ ਖੁਲਾਸਾ ਕੀਤਾ ਹੈ ਕਿ ਦਿੱਲੀ ਵਿੱਚ ‘ਆਪ’ ਦੀ ਸਰਕਾਰ ਨੂੰ ਡੇਗਣ ਲਈ ਸਾਜ਼ਿਸ਼ ਰਚੀ ਜਾ ਰਹੀ ਹੈ। ਉਨ੍ਹਾਂ ਨੇ ਇਹ ਸਾਜ਼ਿਸ਼ ਘੜਨ ਦਾ ਇਲਜ਼ਾਮ ਪਾਰਟੀ ਨੇਤਾ ਕੁਮਾਰ ਵਿਸ਼ਵਾਸ ਉੱਪਰ ਲਾਇਆ ਹੈ। ਗੋਪਾਲ ਰਾਏ ਨੇ ਕਿਹਾ ਕਿ ਕੁਮਾਰ ਵਿਸ਼ਵਾਸ ਤੇ ਕਪਿਲ ਮਿਸ਼ਰਾ ਮਿਲ ਕੇ ‘ਆਪ’ ਦੀ ਸਰਕਾਰ ਡੇਗਣ ਦੀ ਸਾਜ਼ਿਸ਼ ਰਚ ਰਹੇ ਹਨ। ਗੋਪਾਲ ਰਾਏ ਨੇ ਫੇਸਬੁੱਕ ‘ਤੇ ਬਿਆਨ ਦਿੰਦੇ ਹੋਏ ਕਿਹਾ ਕਿ ਪਿਛਲੇ ਸਾਲ ਕਾਰਪੋਰੇਸ਼ਨ ਦੀਆਂ ਚੋਣਾਂ ਦੌਰਾਨ ਕੁਮਾਰ ਵਿਸ਼ਵਾਸ ਦੇ ਘਰ ਪਾਰਟੀ ਖਿਲਾਫ ਬੈਠਕ ਹੋਈ ਸੀ। ਇਸ ਬੈਠਕ ਵਿੱਚ ‘ਆਪ’ ਦੇ ਵਿਧਾਇਕ ਤੇ ਕੁਮਾਰ ਵਿਸ਼ਵਾਸ ਮੌਜੂਦ ਸਨ। ਗੋਪਾਲ ਰਾਏ ਦੇ ਬਿਆਨ ਤੋਂ ਬਾਅਦ ਕੁਮਾਰ ਵਿਸ਼ਵਾਸ ਨੇ ਕੇਜਰੀਵਾਲ ਨੂੰ ਤਾਨਾਸ਼ਾਹ ਕਹਿ ਦਿੱਤਾ ਹੈ। ਕੁਮਾਰ ਨੇ ਕੇਜਰੀਵਾਲ ਨੂੰ ਕਿਮ ਜੋਂਗ ਉਨ ਦੱਸਦਿਆਂ ਕਿਹਾ ਕਿ ਇਸ ਨੇ ਸਾਰਿਆਂ ਨੂੰ ਪ੍ਰੇਸ਼ਾਨ ਕਰ ਦਿੱਤਾ ਹੈ। ਚੇਤੇ ਰਹੇ ਕਿ ‘ਆਪ’ ਵਲੋਂ ਸੰਜੇ ਸਿੰਘ, ਐਨਡੀ ਗੁਪਤਾ ਅਤੇ ਸੁਸ਼ੀਲ ਗੁਪਤਾ ਨੂੰ ਰਾਜ ਸਭਾ ਵਿਚ ਭੇਜਣ ਦੇ ਚੱਲਦਿਆਂ ਪਾਰਟੀ ਵਿਚ ਤਣਾਅ ਦਾ ਮਾਹੌਲ ਬਣਿਆ ਹੋਇਆ ਹੈ।
ਗੁਜਰਾਤ ਦੇ ਰਾਜਕੋਟ ‘ਚ ਬਿਮਾਰ ਮਾਂ ਨੂੰ ਕਲਯੁੱਗੀ ਬੇਟੇ ਨੇ ਛੱਤ ਤੋਂ ਸੁੱਟ ਕੇ ਮਾਰਿਆ