ਅਮਰੀਕੀ ਰਾਸ਼ਟਰਪਤੀ ਕੈਨੇਡੀ ਦੀ ਹੱਤਿਆ ’ਤੇ ਦਸਤਾਵੇਜ਼ ਜਾਰੀ

62 ਸਾਲ ਬਾਅਦ ਡੋਨਾਲਡ ਟਰੰਪ ਨੇ ਜਾਰੀ ਕੀਤਾ 80 ਹਜ਼ਾਰ ਪੇਜ਼ ਦਾ ਦਸਤਾਵੇਜ਼
ਵਾਸ਼ਿੰਗਟਨ/ਬਿਊਰੋ ਨਿਊਜ਼ : ਅਮਰੀਕਾ ਦੇ 35ਵੇਂ ਰਾਸ਼ਟਰਪਤੀ ਜਾਨ ਐਫ ਕੈਨੇਡੀ ਦੀ ਗੋਲੀਆਂ ਮਾਰ ਕੇ ਹੱਤਿਆ ਕਰ ਦਿੱਤੀ ਗਈ ਸੀ। ਇਹ ਹਾਦਸਾ ਉਨ੍ਹਾਂ ਨਾਲ ਉਸ ਸਮੇਂ ਵਾਪਰਿਆ ਜਦੋਂ ਉਹ ਇਕ ਖੁੱਲ੍ਹੀ ਕਾਰ ਵਿਚ ਆਪਣੀ ਪਤਨੀ ਦੇ ਨਾਲ ਬੈਠ ਕੇ ਇਕ ਰੈਲੀ ਨੂੰ ਸੰਬੋਧਨ ਕਰਨ ਲਈ ਜਾ ਰਹੇ ਸਨ। ਕੈਨੇਡੀ ਦੀ ਹੱਤਿਆ ਦੀ ਖਬਰ ਸੁਣ ਕੇ ਵਾਸ਼ਿੰਗਟਨ ’ਚ ਬੈਠਾ ਇਕ ਸਾਬਕਾ ਇੰਟੈਲੀਜੈਂਸ ਏਜੰਟ ਘਬਰਾ ਗਿਆ ਸੀ ਅਤੇ ਉਹ ਵਾਸ਼ਿੰਗਟਨ ਛੱਡ ਕੇ ਨਿਊਜਰਸੀ ਪਹੁੰਚ ਗਿਆ ਸੀ। ਉਥੇ ਉਸ ਨੇ ਕਿਹਾ ਕਿ ਸੀਆਈਏ ਦੇ ਇਕ ਗਿਰੋਹ ਨੇ ਕੈਨੇਡੀ ਦੀ ਹੱਤਿਆ ਦੀ ਸਾਜਿਸ਼ ਰਚੀ ਹੈ ਅਤੇ ਉਹ ਮੈਨੂੰ ਵੀ ਮਾਰ ਦੇਣਗੇ। ਜੇ. ਗੈਰੇਟ ਅੰਡਰਹਿਲ ਨਾਮ ਦੇ ਇਸ ਸਾਬਕਾ ਏਜੰਟ ਨੇ ਅਜਿਹਾ ਕਿਉਂ ਕੀਤਾ ਸੀ। ਇਸ ਦਾ ਖੁਲਾਸਾ ਕੈਨੇਡੀ ਦੀ ਹੱਤਿਆ ਨਾਲ ਜੁੜੇ ਉਨ੍ਹਾਂ 80 ਹਜ਼ਾਰ ਦਸਤਾਵੇਜ਼ਾਂ ਤੋਂ ਹੋਇਆ ਜੋ ਲੰਘੇ ਦਿਨੀਂ ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਵੱਲੋਂ ਜਾਰੀ ਕੀਤੇ ਗਏ ਹਨ।