New Delhi : ਫਾਰਮਾ ਸੈਕਟਰ ਵਿੱਚ ਇੱਕ ਵੱਡਾ ਬ੍ਰਾਂਡ ਸੌਦਾ ਸਾਹਮਣੇ ਆਇਆ ਹੈ। ਨੋਵਾਰਟਿਸ ਇੰਡੀਆ ਜਲਦ ਹੀ 1,250 ਕਰੋੜ ਰੁਪਏ ਵਿੱਚ ਫਾਈਜ਼ਰ ਤੋਂ ਬਲੱਡ ਪ੍ਰੈਸ਼ਰ ਦੀ ਦਵਾਈ ਮਿਨੀਪ੍ਰੈੱਸ ਐਕਸਐਲ ਦੇ ਅਧਿਕਾਰ ਖਰੀਦਣ ਜਾ ਰਹੀ ਹੈ। ਇਸ ਸੌਦੇ ਤੋਂ ਬਾਅਦ ਮਿਨੀਪ੍ਰੈੱਸ ਅਤੇ ਮਿਨੀਪ੍ਰੈੱਸ ਐਕਸਐਲ, ਨੋਵਾਰਟਿਸ ਇੰਡੀਆ ਦੇ ਪੋਰਟਫੋਲੀਓ ਵਿੱਚ ਸ਼ਾਮਲ ਹੋ ਜਾਣਗੀਆਂ।
ਇਹ ਕਦਮ ਫਾਈਜ਼ਰ ਇੰਕ. ਵੱਲੋਂ ਅੰਤਰਰਾਸ਼ਟਰੀ ਬਾਜ਼ਾਰ ਵਿੱਚ ਮਿਨੀਪ੍ਰੈੱਸ ਐਕਸਐਲ ਦਾ ਨਿਰਮਾਣ ਬੰਦ ਕਰਨ ਦੇ ਫੈਸਲੇ ਤੋਂ ਬਾਅਦ ਚੁੱਕਿਆ ਗਿਆ ਹੈ।
ਇਸ ਸੌਦੇ ਦੀ ਖ਼ਾਸ ਗੱਲ ਇਹ ਹੈ ਕਿ 1,250 ਕਰੋੜ ਰੁਪਏ ਦੀ ਕੁੱਲ ਰਕਮ ਵਿੱਚੋਂ ਫਾਈਜ਼ਰ ਇੰਡੀਆ ਨੂੰ ਸਿਰਫ਼ 131.38 ਕਰੋੜ ਰੁਪਏ ਮਿਲਣਗੇ। ਇਸ ਦਾ ਕਾਰਨ ਇਹ ਹੈ ਕਿ ਮਿਨੀਪ੍ਰੈੱਸ ਅਤੇ ਮਿਨੀਪ੍ਰੈੱਸ ਐਕਸਐਲ ਦੇ ਬ੍ਰਾਂਡ ਅਤੇ ਟ੍ਰੇਡਮਾਰਕ ਦਾ ਮਾਲਕਾਨਾ ਹੱਕ ਇਸ ਵੇਲੇ ਫਾਈਜ਼ਰ ਇੰਕ., ਯਾਨੀ ਫਾਈਜ਼ਰ ਦੀ ਗਲੋਬਲ ਪੇਰੈਂਟ ਕੰਪਨੀ ਕੋਲ ਹੈ। ਇਸ ਲਈ ਸੌਦੇ ਦੀ ਰਕਮ ਦਾ ਵੱਡਾ ਹਿੱਸਾ ਗਲੋਬਲ ਕੰਪਨੀ ਨੂੰ ਜਾਵੇਗਾ।