ਇਨਫੋਸਿਸ ਦਾ ਮੁਨਾਫਾ ਚੌਥੀ ਤਿਮਾਹੀ ’ਚ 21 ਫੀਸਦੀ ਵਧਿਆ

ਨਵੀਂ ਦਿੱਲੀ/ਬਿਊਰੋ ਨਿਊਜ਼
ਆਈ.ਟੀ. ਕੰਪਨੀ ਇਨਫੋਸਿਸ ਨੇ 23 ਅਪ੍ਰੈਲ ਨੂੰ ਵਿੱਤੀ ਸਾਲ 2025-26 ਦੀ ਚੌਥੀ ਤਿਮਾਹੀ ਦੇ ਨਤੀਜੇ ਜਾਰੀ ਕੀਤੇ ਹਨ। ਕੰਪਨੀ ਦਾ ਏਕੀਕ੍ਰਿਤ ਸ਼ੁੱਧ ਲਾਭ ਸਾਲ ਦਰ ਸਾਲ 21 ਫੀਸਦੀ ਵਧ ਕੇ 8,501 ਕਰੋੜ ਰੁਪਏ ਹੋ ਗਿਆ ਹੈ। ਪਿਛਲੇ ਸਾਲ ਇਸੇ ਤਿਮਾਹੀ ਵਿਚ ਮੁਨਾਫਾ 7,033 ਕਰੋੜ ਸੀ। ਸੰਚਾਲਣ ਤੋਂ ਹੋਣ ਵਾਲਾ ਰੈਵੀਨਿਊ ਕਰੀਬ 13.38 ਫੀਸਦੀ ਵਧਿਆ ਹੈ। ਇਹ 46,402 ਕਰੋੜ ਰੁਪਏ ’ਤੇ ਪਹੁੰਚ ਗਿਆ ਹੈ, ਜੋ ਪਿਛਲੇ ਸਾਲ 40,925 ਕਰੋੜ ਰੁਪਏ ਸੀ। ਇਸਦੇ ਚੱਲਦਿਆਂ ਕੰਪਨੀ ਵਲੋਂ ਆਪਣੇ ਨਿਵੇਸ਼ਕਾਂ ਨੂੰ 25 ਰੁਪਏ ਦਾ ਡਿਵੀਡੈਂਡ ਦੇਣ ਦਾ ਵੀ ਐਲਾਨ ਕੀਤਾ ਗਿਆ ਹੈ। ਜ਼ਿਕਰਯੋਗ ਹੈ ਕਿ ਕੰਪਨੀਆਂ ਆਪਣੇ ਮੁਨਾਫੇ ਦਾ ਕੁਝ ਹਿੱਸਾ ਆਪਣੇ ਸ਼ੇਅਰ ਧਾਰਕਾਂ ਨੂੰ ਦਿੰਦੀਆਂ ਹਨ, ਜਿਸ ਨੂੰ ਲਾਭਅੰਸ਼ ਕਿਹਾ ਜਾਂਦਾ ਹੈ।