ਅਮਰੀਕਾ ਦੇ ਟੈਕਸਾਸ ਵਿਚ ਨਵੇਂ ਐਚ-1ਬੀ ਵੀਜ਼ਾ ਜਾਰੀ ਨਹੀਂ ਹੋਣਗੇ

15 ਹਜ਼ਾਰ ਭਾਰਤੀਆਂ ’ਤੇ ਪਵੇਗਾ ਅਸਰ
ਵਾਸ਼ਿੰਗਟਨ/ਬਿਊਰੋ ਨਿਊਜ਼
ਅਮਰੀਕਾ ਦੇ ਅਹਿਮ ਸੂਬੇ ਟੈਕਸਾਸ ਵਿਚ ਨਵੇਂ ਐਚ-1ਬੀ ਵੀਜ਼ਾ ਜਾਰੀ ਕਰਨ ’ਤੇ ਰੋਕ ਲਗਾ ਦਿੱਤੀ ਗਈ ਹੈ। ਟੈਕਸਾਸ ਦੇ ਗਵਰਨਰ ਗਰੇਗ ਏਬਟ ਨੇ ਅਗਲੇ ਸਾਲ ਮਈ ਤੱਕ ਐਚ-1ਬੀ ਕੈਟੇਗਰੀ ਦੇ ਵੀਜ਼ਾ ਜਾਰੀ ਨਾ ਕਰਨ ਦੇ ਨਿਰਦੇਸ਼ ਜਾਰੀ ਕਰ ਦਿੱਤੇ ਹਨ। ਪਹਿਲੇ ਫੇਜ਼ ਵਿਚ ਟੈਕਸਾਸ ਦੇ ਸਾਰੇ ਸਰਕਾਰੀ ਦਫਤਰਾਂ ਅਤੇ ਯੂਨੀਵਰਸਿਟੀਆਂ ਵਿਚ ਇਹ ਰੋਕ ਲੱਗੇਗੀ। ਇਸ ਨਿਰਦੇਸ਼ ਨਾਲ ਕਰੀਬ 15 ਹਜ਼ਾਰ ਭਾਰਤੀਆਂ ’ਤੇ ਅਸਰ ਪੈ ਸਕਦਾ ਹੈ। ਟੈਕਸਾਸ ਵਰਕ ਫੋਰਸ ਕਮਿਸ਼ਨ ਨਾਲ ਸਾਰੇ ਐਚ-1ਬੀ ਵੀਜ਼ਾ ਹੋਲਡਰਾਂ ਦੀ ਗਿਣਤੀ, ਜੌਬ ਰੋਲ, ਮੂਲ ਦੇਸ਼ ਅਤੇ ਵੀਜ਼ੇ ਦੀ ਮਿਆਦ ਪੁੱਗਣ ਬਾਰੇ 27 ਮਾਰਚ ਤੱਕ ਡੈਟਾ ਰਿਪੋਰਟ ਮੰਗੀ ਗਈ ਹੈ। ਨਵੇਂ ਨਿਰਦੇਸ਼ਾਂ ਦੇ ਅਨੁਸਾਰ ਐਚ-1ਬੀ ਵੀਜ਼ਾ ’ਤੇ ਪਾਬੰਦੀ ਇਸਦੀ ਕਥਿਤ ਦੁਰਵਰਤੋਂ ਕਾਰਨ ਲਗਾਈ ਗਈ ਹੈ। ਟੈਕਸਾਸ ਐਚ-1ਬੀ ਵੀਜ਼ੇ ਜਾਰੀ ਕਰਨ ਵਾਲਾ ਅਮਰੀਕਾ ਦਾ ਦੂਜਾ ਵੱਡਾ ਸੂਬਾ ਹੈ ਅਤੇ ਕੈਲੀਫੋਰਨੀਆ ਪਹਿਲੇ ਨੰਬਰ ’ਤੇ ਆਉਂਦਾ ਹੈ। ਅਮਰੀਕਾ ਵਿਚ ਹਰ ਸਾਲ ਭਾਰਤੀਆਂ ਨੂੰ ਮਿਲਣ ਵਾਲੇ 2 ਲੱਖ ਐਚ-1ਬੀ ਵੀਜ਼ਿਆਂ ਵਿਚੋਂ 40 ਹਜ਼ਾਰ ਦੇ ਕਰੀਬ ਟੈਕਸਾਸ ਵਿਚੋਂ ਜਾਰੀ ਹੁੰਦੇ ਹਨ।