890 ਸੀਸੀ ਇੰਜਣ ਨਾਲ ਮਿਲੇ ਕਈ ਵੱਡੇ ਅਪਡੇਟ
ਨਵੀਂ ਦਿੱਲੀ/ਬਿਊਰੋ ਨਿਊਜ਼
ਡੁਕਾਟੀ ਇੰਡੀਆ ਨੇ ਭਾਰਤੀ ਬਾਜ਼ਾਰ ਵਿੱਚ ਆਪਣੀਆਂ ਨਵੀਆਂ ਮੌਨਸਟਰ ਵੀ2 ਅਤੇ ਮੌਨਸਟਰ ਪਲੱਸ ਵੀ2 ਬਾਈਕਾਂ ਲਾਂਚ ਕਰ ਦਿੱਤੀਆਂ ਹਨ। ਨਵੀਂ ਮੌਨਸਟਰ ਰੇਂਜ ਦੀ ਸ਼ੁਰੂਆਤੀ ਐਕਸ-ਸ਼ੋਅ ਰੂਮ ਕੀਮਤ 13 ਲੱਖ 99 ਹਜ਼ਾਰ ਰੁਪਏ ਰੱਖੀ ਗਈ ਹੈ। ਇਹ ਕੀਮਤ ਪਿਛਲੇ ਮਾਡਲ ਦੇ ਮੁਕਾਬਲੇ ਕਰੀਬ 15 ਹਜ਼ਾਰ ਰੁਪਏ ਜ਼ਿਆਦਾ ਹੈ। ਨਵੀਂ ਬਾਈਕ ਵਿੱਚ ਸਭ ਤੋਂ ਵੱਡਾ ਬਦਲਾਅ ਇਸਦੇ ਨਵੇਂ 890 ਸੀਸੀ ਵੀ-ਟਵਿਨ ਇੰਜਣ ਦਾ ਹੈ। ਕੰਪਨੀ ਇਸੇ ਇੰਜਣ ਦੀ ਵਰਤੋਂ ਮਲਟੀਸਟ੍ਰਾਡਾ ਵੀ2, ਪੈਨਿਗੇਲ ਵੀ2 ਅਤੇ ਸਟ੍ਰੀਟ ਫਾਈਟਰ ਵੀ2 ਵਰਗੀਆਂ ਬਾਈਕਾਂ ਵਿੱਚ ਵੀ ਕਰਦੀ ਹੈ। ਦੋਵੇਂ ਨਵੇਂ ਮਾਡਲਾਂ ਦਾ ਮਕੈਨੀਕਲ ਸੈਟਅਪ ਲਗਭਗ ਇੱਕੋ ਜਿਹਾ ਹੈ।
ਮੌਨਸਟਰ ਪਲੱਸ ਵੀ2 ਨੂੰ ਆਮ ਮੌਨਸਟਰ ਵੀ2 ਤੋਂ ਵੱਖ ਕਰਨ ਲਈ ਕੁਝ ਵਾਧੂ ਫੀਚਰ ਦਿੱਤੇ ਗਏ ਹਨ। ਇਸ ਵਿੱਚ ਹੈੱਡਲਾਈਟ ਕਾਊਲ ਦੇ ਨਾਲ ਪਿਛਲੀ ਸਵਾਰੀ ਲਈ ਸੀਟ ਕਵਰ ਵੀ ਮਿਲਦਾ ਹੈ। ਇਸ ਕਾਰਨ ਮੌਨਸਟਰ ਪਲੱਸ ਵੀ2 ਨੂੰ ਵਧੇਰੇ ਪ੍ਰੀਮੀਅਮ ਲੁੱਕ ਮਿਲਦੀ ਹੈ। ਡੁਕਾਟੀ ਮੌਨਸਟਰ ਵੀ2 ਨੂੰ ਡੁਕਾਟੀ ਰੈੱਡ, ਆਈਸਬਰਗ ਵ੍ਹਾਈਟ ਅਤੇ ਸਪੋਰਟ ਲਿਵਰੀ ਰੰਗਾਂ ਵਿੱਚ ਪੇਸ਼ ਕੀਤਾ ਗਿਆ ਹੈ। ਡੁਕਾਟੀ ਰੈੱਡ ਰੰਗ ਦੀ ਕੀਮਤ 13 ਲੱਖ 99 ਹਜ਼ਾਰ ਰੁਪਏ ਹੈ, ਜਦਕਿ ਆਈਸਬਰਗ ਵ੍ਹਾਈਟ ਅਤੇ ਸਪੋਰਟ ਲਿਵਰੀ ਲਈ ਗਾਹਕਾਂ ਨੂੰ 14 ਲੱਖ 23 ਹਜ਼ਾਰ ਰੁਪਏ ਖਰਚ ਕਰਨੇ ਪੈਣਗੇ। ਉੱਥੇ ਹੀ ਮੌਨਸਟਰ ਪਲੱਸ ਵੀ2 ਦੀ ਡੁਕਾਟੀ ਰੈੱਡ ਰੰਗ ਵਿੱਚ ਕੀਮਤ 14 ਲੱਖ 34 ਹਜ਼ਾਰ ਰੁਪਏ ਰੱਖੀ ਗਈ ਹੈ। ਆਈਸਬਰਗ ਵ੍ਹਾਈਟ ਅਤੇ ਸਪੋਰਟ ਲਿਵਰੀ ਰੰਗਾਂ ਲਈ ਇਸ ਦੀ ਕੀਮਤ 14 ਲੱਖ 45 ਹਜ਼ਾਰ ਰੁਪਏ ਹੈ। ਨਵੇਂ ਇੰਜਣ ਅਤੇ ਅਪਡੇਟਸ ਦੇ ਨਾਲ ਡੁਕਾਟੀ ਨੇ ਭਾਰਤ ਵਿੱਚ ਆਪਣੀ ਪ੍ਰੀਮੀਅਮ ਨੇਕਡ ਬਾਈਕ ਦੀ ਰੇਂਜ ਨੂੰ ਹੋਰ ਮਜ਼ਬੂਤ ਕਰਨ ਦੀ ਕੋਸ਼ਿਸ਼ ਕੀਤੀ ਹੈ।
ਡੁਕਾਟੀ ਦੀਆਂ ਨਵੀਆਂ ਮੌਨਸਟਰ ਬਾਈਕਾਂ ਨੇ ਭਾਰਤ ਵਿੱਚ ਮਾਰੀ ਐਂਟਰੀ
