ਨਵੀਂ ਦਿੱਲੀ/ਬਿਊਰੋ ਨਿਊਜ਼
ਭਾਰਤੀ ਸ਼ੇਅਰ ਬਾਜ਼ਾਰ ਵਿੱਚ ਅਗਲੇ ਹਫ਼ਤੇ ਕਾਫ਼ੀ ਹਲਚਲ ਦੇਖਣ ਨੂੰ ਮਿਲ ਸਕਦੀ ਹੈ। ਪੰਜ ਕੰਪਨੀਆਂ ਪਹਿਲੀ ਵਾਰ ਆਪਣੇ ਸ਼ੇਅਰ ਆਮ ਨਿਵੇਸ਼ਕਾਂ ਲਈ ਜਾਰੀ ਕਰਨ ਜਾ ਰਹੀਆਂ ਹਨ। ਇਨ੍ਹਾਂ ਪੰਜਾਂ ਕੰਪਨੀਆਂ ਦੇ ਆਈ.ਪੀ.ਓ. ਰਾਹੀਂ ਕੁੱਲ ਕਰੀਬ 7,443 ਕਰੋੜ ਰੁਪਏ ਜੁਟਾਉਣ ਦੀ ਤਿਆਰੀ ਹੈ। ਇਨ੍ਹਾਂ ਕੰਪਨੀਆਂ ਵਿੱਚ ਆਟੋ ਪਾਰਟਸ ਬਣਾਉਣ ਵਾਲੀ ਧੂਤ ਟਰਾਂਸਮਿਸ਼ਨ, ਜਾਂਚ ਉਪਕਰਨ ਬਣਾਉਣ ਵਾਲੀ ਮੋਲਬਾਇਓ ਡਾਇਗਨੋਸਟਿਕਸ, ਡੇਅਰੀ ਉਤਪਾਦਾਂ ਨਾਲ ਜੁੜੀ ਮਿਲਕੀ ਮਿਸਟ ਡੇਅਰੀ ਫੂਡ, ਆਨਲਾਈਨ ਕਾਰੋਬਾਰ ਨਾਲ ਸਬੰਧਤ ਸ਼ਿਪਰਾਕੇਟ ਅਤੇ ਇੰਜੀਨੀਅਰਿੰਗ ਉਤਪਾਦ ਬਣਾਉਣ ਵਾਲੀ ਬਿਹਾਰੀ ਲਾਲ ਇੰਜੀਨੀਅਰਿੰਗ ਸ਼ਾਮਲ ਹਨ।
ਇਨ੍ਹਾਂ ਵਿੱਚੋਂ ਧੂਤ ਟਰਾਂਸਮਿਸ਼ਨ ਅਤੇ ਮੋਲਬਾਇਓ ਡਾਇਗਨੋਸਟਿਕਸ ਦੇ ਆਈ.ਪੀ.ਓ. ਦੀ ਵਿਕਰੀ 10 ਅਗਸਤ ਤੋਂ ਸ਼ੁਰੂ ਹੋਵੇਗੀ। ਧੂਤ ਟਰਾਂਸਮਿਸ਼ਨ ਨੇ ਕਰੀਬ 3,067 ਕਰੋੜ ਰੁਪਏ ਦੇ ਆਈਪੀਓ ਲਈ ਪ੍ਰਤੀ ਸ਼ੇਅਰ 829 ਤੋਂ 871 ਰੁਪਏ ਦਾ ਮੁੱਲ ਦਾਇਰਾ ਤੈਅ ਕੀਤਾ ਹੈ। ਇਸ ਵਿੱਚ ਕੰਪਨੀ ਵੱਲੋਂ 1,400 ਕਰੋੜ ਰੁਪਏ ਤੱਕ ਦੇ ਨਵੇਂ ਸ਼ੇਅਰ ਜਾਰੀ ਕੀਤੇ ਜਾਣਗੇ। ਇਸ ਤੋਂ ਇਲਾਵਾ ਮੌਜੂਦਾ ਮਾਲਕਾਂ ਅਤੇ ਸ਼ੇਅਰਧਾਰਕਾਂ ਵੱਲੋਂ ਲਗਭਗ 1.91 ਕਰੋੜ ਸ਼ੇਅਰ ਵੇਚੇ ਜਾਣਗੇ।
ਦੂਜੇ ਪਾਸੇ, ਮੋਲਬਾਇਓ ਡਾਇਗਨੋਸਟਿਕਸ ਨੇ 904 ਤੋਂ 940 ਕਰੋੜ ਰੁਪਏ ਦੇ ਆਈਪੀਓ ਲਈ ਪ੍ਰਤੀ ਸ਼ੇਅਰ 768 ਤੋਂ 807 ਰੁਪਏ ਦਾ ਮੁੱਲ ਦਾਇਰਾ ਤੈਅ ਕੀਤਾ ਹੈ। ਇਸ ਆਈਪੀਓ ਵਿੱਚ 200 ਕਰੋੜ ਰੁਪਏ ਤੱਕ ਦੇ ਨਵੇਂ ਸ਼ੇਅਰ ਜਾਰੀ ਕੀਤੇ ਜਾਣਗੇ। ਇਸਦੇ ਨਾਲ ਹੀ ਮੌਜੂਦਾ ਸ਼ੇਅਰ ਧਾਰਕਾਂ ਵੱਲੋਂ 91.66 ਲੱਖ ਸ਼ੇਅਰਾਂ ਤੱਕ ਦੀ ਵਿਕਰੀ ਕੀਤੀ ਜਾਵੇਗੀ। ਬਾਕੀ ਤਿੰਨ ਕੰਪਨੀਆਂ ਦੇ ਆਈਪੀਓ ਵੀ ਆਉਣ ਵਾਲੇ ਦਿਨਾਂ ਵਿੱਚ ਨਿਵੇਸ਼ਕਾਂ ਦਾ ਧਿਆਨ ਖਿੱਚ ਸਕਦੇ ਹਨ। ਲਗਾਤਾਰ ਆ ਰਹੇ ਆਈਪੀਓ ਕਾਰਨ ਪ੍ਰਾਇਮਰੀ ਬਾਜ਼ਾਰ ਵਿੱਚ ਨਿਵੇਸ਼ਕਾਂ ਦੀ ਸਰਗਰਮੀ ਵਧਣ ਦੀ ਉਮੀਦ ਹੈ।
ਅਗਲੇ ਹਫ਼ਤੇ ਆਈ.ਪੀ.ਓ. ਦੀ ਬਰਸਾਤ, 5 ਕੰਪਨੀਆਂ ਜੁਟਾਉਣਗੀਆਂ 7,400 ਕਰੋੜ ਰੁਪਏ
