ਸੁਪਰੀਮ ਕੋਰਟ ਅੰਮ੍ਰਿਤਧਾਰਾ ਦਵਾਈ ਨਹੀਂ : ਚੀਫ ਜਸਟਿਸ ਜੇ ਐਸ ਖੇਹਰ

ਕਿਹਾ, ਕਈ ਸਮੱਸਿਆਵਾਂ ਦਾ ਹੱਲ ਸਰਕਾਰ ਨੂੰ ਅਪੀਲ ਕਰਕੇ ਵੀ ਕਰਾਇਆ ਜਾ ਸਕਦਾ
ਨਵੀਂ ਦਿੱਲੀ/ਬਿਊਰੋ ਨਿਊਜ਼
ਸੁਪਰੀਮ ਕੋਰਟ ਦੇ ਚੀਫ ਜਸਟਿਸ ਜੇ ਐਸ ਖੇਹਰ ਨੇ ਸੁਪਰੀਮ ਕੋਰਟ ਦੀ ਤੁਲਨਾ ਅੰਮ੍ਰਿਤਧਾਰਾ ਦਵਾਈ ਨਾਲ ਕਰ ਦਿੱਤੀ ਹੈ। ਉਨ੍ਹਾਂ ਇਕ ਜਨਹਿਤ ਪਟੀਸ਼ਨ ਖਾਰਜ ਕਰਦੇ ਹੋਏ ਕਿਹਾ ਕਿ ਇਹ ਸੁਪਰੀਮ ਕੋਰਟ ਹੈ, ਕੋਈ ਅੰਮ੍ਰਿਤਧਾਰਾ ਦਵਾਈ ਨਹੀਂ, ਜੋ ਹਰ ਬਿਮਾਰੀ ਅਤੇ ਪ੍ਰੇਸ਼ਾਨੀ ਦਾ ਇਲਾਜ ਇੱਥੇ ਹੀ ਹੋ ਜਾਵੇ। ਲੋਕ ਸਵੇਰੇ ਉਠਦੇ ਹੀ ਹਰ ਸਮੱਸਿਆ ਦਾ ਇਲਾਜ ਲੱਭਣ ਸੁਪਰੀਮ ਕੋਰਟ ਪਹੁੰਚ ਜਾਂਦੇ ਹਨ। ਸੁਪਰੀਮ ਕੋਰਟ ਜਯਾ ਠਾਕੁਰ ਬਨਾਮ ਕੇਂਦਰ ਸਰਕਾਰ ਨਾਮਕ ਇਕ ਮਾਮਲੇ ਵਿਚ ਦਾਇਰ ਕੀਤੀ ਗਈ ਪਬਲਿਕ ਇੰਟਰੈਸਟ ਲਿਟੀਗੇਸ਼ਨ ‘ਤੇ ਸੁਣਵਾਈ ਕਰ ਰਹੀ ਸੀ। ਚੀਫ ਜਸਟਿਸ ਨੇ ਕਿਹਾ ਕਈ ਸਮੱਸਿਆਵਾਂ ਦਾ ਹੱਲ ਸਰਕਾਰ ਨੂੰ ਅਪੀਲ ਕਰਕੇ ਵੀ ਕਰਾਇਆ ਜਾ ਸਕਦਾ ਹੈ। ਉਹਨਾਂ ਕਿਹਾ ਕਿ ਲੋਕਾਂ ਨੂੰ ਸਰਕਾਰ ਦੇ ਸਾਹਮਣੇ ਆਪਣੀਆਂ ਗੱਲਾਂ ਰੱਖਣੀਆਂ ਚਾਹੀਦੀਆਂ ਹਨ। ਜ਼ਰੂਰੀ ਨਹੀਂ ਕਿ ਹਰ ਕੰਮ ਲਈ ਸੁਪਰੀਮ ਕੋਰਟ ਹੀ ਸਰਕਾਰ ਨੂੰ ਨਿਰਦੇਸ਼ ਜਾਰੀ ਕਰੇ। ਜ਼ਿਕਰਯੋਗ ਹੈ ਕਿ ਸੁਪਰੀਮ ਕੋਰਟ ਵਿਚ ਇਸ ਸਮੇਂ ਕਰੀਬ 63 ਹਜ਼ਾਰ ਕੇਸ ਪੈਂਡਿੰਗ ਪਏ ਹਨ।