Parvasi Newspaper Punjabi Newspaper
ਗਿੱਲ ਬਲਵਿੰਦਰ
ਲੈ ਕੇ ਕਬਜ਼ੇ ਨੂੰ ਸਿੰਘਾਂ ਨੇ ਯੁੱਧ ਕਰਨਾ,
ਗੁਰੂ-ਘਰ ਦੀ ਕਰ ਲਈ ਚੋਣ ਆਪੇ ।
ਪੱਗਾਂ ਲਹਿੰਦੀਆਂ ਨੂੰ ਤੱਕਿਆ ਜਗ ਸਾਰੇ,
ਪੂਰੀ ਕੌਮ ਦੀ ਝੁਕਾ ਲਈ ਧੌਣ ਆਪੇ ।
ਮੋਹ ਮਾਇਆ ਦਾ ਸਭ ਨੂੰ ਇੰਝ ਖਿੱਚੇ,
ਗੁੜ ਸੱਦੇ ਜਿਉਂ ਕੀੜਿਆਂ ਦਾ ਭੌਂਣ ਆਪੇ ।
ਬੱਚੇ ਕਹਿਣ ਨਾ ਲੜਾਈ ਵਾਲੀ ਥਾਂ ਜਾਣਾ,
ਸੁਣ ਮਾਪਿਆਂ ਦਾ ਨਿਕਲ ਜਾਏ ਰੋਣ ਆਪੇ ।
ਆਮ ਸਿੱਖਾਂ ਦੀ ਰਾਇ ਕੌਣ ਸੁਣਦਾ,
ਫੈਸਲੇ ਧੱਕੇ ਦੇ ਹੀ ਜ਼ੋਰ ਨਾਲ ਹੋਣ ਆਪੇ ।
ਮਨ ਪਿੱਛੇ ਲੱਗ, ਗਲਤੀਆਂ ਕਰੀ ਜਾਂਦੇ,
ਗੱਠੜੀ ਪਾਪਾਂ ਦੀ ਸਿਰਾਂ ‘ਤੇ ਢੋਣ ਆਪੇ ।
ਗਿੱਲ ਬਲਵਿੰਦਰਾ ਕੰਮ ਇਹ ਬੜਾ ਔਖਾ,
ਲਾਲਚ ਚੌਧਰ ਦਾ ਛੱਡੂਗਾ ਕੌਣ ਆਪੇ ।
416-558-5530
