‘ਆਪ’ ਵਿਧਾਇਕ ਸੰਤੋਸ਼ ਕਟਾਰੀਆ ਨੇ ਦਲਿਤ ਮਹਿਲਾਂ ਕੋਲੋਂ ਮਠਿਆਈ ਲੈ ਕੇ ਹੇਠਾਂ ਸੁੱਟੀ

ਸ਼ੋਸ਼ਲ ਮੀਡੀਆ ’ਤੇ ਵੀਡੀਓ ਹੋਇਆ ਵਾਇਰਲ

ਅੰਮਿ੍ਰਤਸਰ/ਬਿਊਰੋ ਨਿਊਜ਼ : ਪੰਜਾਬ ਦੇ ਨਵਾਂਸ਼ਹਿਰ ਜ਼ਿਲ੍ਹੇ ਦੇ ਬਲਾਚੌਰ ਵਿਧਾਨ ਸਭਾ ਹਲਕੇ ਤੋਂ ਆਮ ਆਦਮੀ ਪਾਰਟੀ ਦੀ ਵਿਧਾਇਕਾ ਸੰਤੋਸ਼ ਕਟਾਰੀਆ ਦਾ ਸ਼ੋਸ਼ਲ ਮੀਡੀਆ ’ਤੇ ਇਕ ਵੀਡੀਓ ਵਾਇਰਲ ਹੋ ਰਿਹਾ ਹੈ। ਵੀਡੀਓ ਵਾਇਰਲ ਕਰਨ ਵਾਲੇ ਨੇ ਆਰੋਪ ਲਗਾਇਆ ਕਿ ਬੇਟੀਆਂ ਦੇ ਤਿਉਹਾਰ ਤੀਜ ’ਤੇ ਆਯੋਜਿਤ ਪ੍ਰੋਗਰਾਮ ਦੌਰਾਨ ‘ਆਪ’ ਵਿਧਾਇਕਾ ਸੰਤੋਸ਼ ਕਟਾਰੀਆ ਨੇ ਸ਼ਿਰਕਤ ਕੀਤੀ ਸੀ। ਇਸ ਮੌਕੇ ਪ੍ਰੋਗਰਾਮ ਦੌਰਾਨ ਵਿਧਾਇਕਾ ਨੇ ਦਲਿਤ ਮਹਿਲਾ ਕੋਲੋਂ ਮਿਠਾਈ ਲੈ ਲਈ ਪ੍ਰੰਤੂ ਉਨ੍ਹਾਂ ਨੇ ਉਸ ਮਠਿਆਈ ਨੂੰ ਖਾਣ ਦੀ ਬਜਾਏ ਆਪਣੀ ਕੁਰਸੀ ਹੇਠ ਸੁੱਟ ਦਿੱਤਾ, ਜੋ ਸ਼ੋਸ਼ਲ ਮੀਡੀਆ ’ਤੇ ਵਾਇਰਲ ਵੀਡੀਓ ਵਿਚ ਸਾਫ਼ ਨਜ਼ਰ ਆ ਰਿਹਾ ਹੈ। ਪ੍ਰੰਤੂ ਵਿਧਾਇਕਾ ਕਟਾਰੀਆ ਨੇ ਇਨ੍ਹਾਂ ਆਰੋਪਾਂ ਨੂੰ ਸਿਰੇ ਤੋਂ ਖਾਰਜ ਕਰ ਦਿੱਤਾ ਅਤੇ ਉਨ੍ਹਾਂ ਕਿਹਾ ਕਿ ਉਨ੍ਹਾਂ ’ਤੇ ਲਗਾਏ ਸਾਰੇ ਆਰੋਪ ਸਰਾਸਰ ਗਲਤ ਹਨ। ਉਨ੍ਹਾਂ ਅੱਗੇ ਕਿਹਾ ਕਿ ਮੋਜੇਵਾਲ ਮਜਾਰਾ ਪਿੰਡ ਦੇ ਪ੍ਰੋਗਰਾਮ ਦੌਰਾਨ ਜਦੋਂ ਇਕ ਮਹਿਲਾ ਨੇ ਉਨ੍ਹਾਂ ਵੱਲ ਡੱਬਾ ਕੀਤਾ ਤਾਂ ਉਨ੍ਹਾਂ ਆਪਣੇ ਹੱਥ ਅੱਗੇ ਵਧਾਇਆ ਪ੍ਰੰਤੂ ਜਦੋਂ ਉਨ੍ਹਾਂ ਦੇਖਿਆ ਕਿ ਡੱਬੇ ’ਚ ਮਿਠਾਈ ਹੈ ਤਾਂ ਉਨ੍ਹਾਂ ਆਪਣਾ ਹੱਥ ਤੁਰੰਤ ਪਿੱਛੇ ਕਰ ਲਿਆ। ਉਨ੍ਹਾਂ ਡੱਬੇ ’ਚੋਂ ਮਿਠਾਈ ਜਦੋਂ ਚੁੱਕੀ ਹੀ ਨਹੀਂ ਤਾਂ ਹੇਠਾਂ ਸੁੱਟਣ ਵਾਲਾ ਆਰੋਪ ਬਿਲਕੁਲ ਬੇਬੁਨਿਆਦ ਹੈ। ਜਦਕਿ ਵੀਡੀਓ ਵਾਇਰਲ ਕਰਨ ਵਾਲੇ ਵਿਅਕਤੀ ਨੇ ਦਾਅਵਾ ਕੀਤਾ ਹੈ ਕਿ ਮਿਠਾਈ ਪੇਸ਼ ਕਰਨ ਵਾਲੀ ਮਹਿਲਾ ਦਲਿਤ ਭਾਈਚਾਰੇ ਨਾਲ ਸਬੰਧਤ ਸੀ। ਇਸ ਲਈ ਵਿਧਾਇਕਾ ਨੇ ਡੱਬੇ ਵਿਚੋਂ ਮਿਠਾਈ ਤਾਂ ਚੁੱਕੀ ਲਈ ਪ੍ਰੰਤੂ ਮਿਠਾਈ ਖਾਣ ਦੀ ਬਜਾਏ ਕੁਰਸੀ ਹੇਠ ਸੁੱਟ ਦਿੱਤਾ।