ਬਰੈਂਪਟਨ ‘ਚ ਹਾਦਸੇ ਦੌਰਾਨ ਪੰਜਾਬੀ ਨੌਜਵਾਨ ਦੀ ਮੌਤ

ਟੋਰਾਂਟੋ/ਸਤਪਾਲ ਸਿੰਘ ਜੌਹਲ
ਕੈਨੇਡਾ ਦੇ ਸ਼ਹਿਰ ਬਰੈਂਪਟਨ ਵਿਖੇ ਲੰਘੇ ਦਿਨੀਂ ਡਿਊਟੀ ਦੌਰਾਨ ਵਾਪਰੇ ਦਰਦਨਾਕ ਹਾਦਸੇ ਵਿਚ ਅੰਮ੍ਰਿਤਧਾਰੀ ਪੰਜਾਬੀ ਨੌਜਵਾਨ ਦੀ ਮੌਤ ਹੋ ਗਈ। ਜਾਣਕਾਰੀ ਅਨੁਸਾਰ ਰਵਿੰਦਰ ਸਿੰਘ (21) ਇਕ ਵੇਅਰਹਾਊਸ ‘ਚ ਰਾਖੀ ਕਰਨ ਦਾ ਕੰਮ ਕਰਦਾ ਸੀ। ਘਟਨਾ ਸਮੇਂ ਉਹ ਇਕ ਟਰੱਕ ਦੇ ਟਰੇਲਰ ਦਾ ਏਅਰਲਾਈਨ ਕਪਲਿੰਗ ਲਾਕ (ਹਵਾ ਦਾ ਪ੍ਰਵਾਹ ਰੋਕਣ ਵਾਲੇ ਜਿੰਦਰੇ) ਨਾਲ ਕੰਮ ਕਰ ਰਿਹਾ ਸੀ ਪਰ ਇਸੇ ਦੌਰਾਨ ਜਦੋਂ ਅਚਾਨਕ ਉਸੇ ਟਰੇਲਰ ਨਾਲ ਟਰੱਕ ਆ ਜੁੜਿਆ ਤਾਂ ਰਵਿੰਦਰ ਦੀ ਵਿਚਕਾਰ ਫਸ ਕੇ ਮੌਕੇ ‘ਤੇ ਹੀ ਮੌਤ ਹੋ ਗਈ। ਉਹ ਦੋ ਕੁ ਸਾਲ ਪਹਿਲਾਂ ਪੜ੍ਹਾਈ ਲਈ ਕੈਨੇਡਾ ਪੁੱਜਿਆ ਸੀ। ਟਰੱਕਿੰਗ ਦੇ ਕਿੱਤੇ ‘ਚ ਤਜ਼ਰਬੇ ਅਤੇ ਜਾਣਕਾਰੀ ਦੀ ਘਾਟ ਕਾਰਨ ਵਾਪਰਦੇ ਹਾਦਸੇ ਕੈਨੇਡਾ ਭਰ ‘ਚ ਬੀਤੇ ਮਹੀਨਿਆਂ ਤੋਂ ਲਗਾਤਾਰ ਜਾਰੀ ਹਨ। ਜ਼ਿਕਰਯੋਗ ਹੈ ਕਿ ਲੰਘੇ ਮਹੀਨੇ ਹੀ ਲਗਪਗ 10 ਪੰਜਾਬੀ ਡਰਾਈਵਰਾਂ ਦੀਆਂ ਜਾਨਾਂ ਗਈਆਂ ਹਨ।