ਓਨਟਾਰੀਓ : ਪੀਲ ਪੁਲਿਸ ਦਾ ਕਹਿਣਾ ਹੈ ਕਿ ਇੱਕ ਸੰਗਠਿਤ ਕ੍ਰਾਈਮ ਗਰੁੱਪ ਦੇ ਤਿੰਨ ਮੈਂਬਰਾਂ ਵੱਲੋਂ ਕਥਿਤ ਤੌਰ ਉੱਤੇ ਦੱਖਣੀ ਓਨਟਾਰੀਓ ਦੇ ਵੱਖ ਵੱਖ ਹਿੱਸਿਆਂ ਤੋਂ ਟਰੈਕਟਰ, ਟਰੇਲਰਜ ਚੋਰੀ ਕੀਤੇ ਗਏ। ਪੁਲਿਸ ਨੇ ਦੱਸਿਆ ਕਿ ਇਸ ਸਾਲ ਅਪ੍ਰੈਲ ਵਿੱਚ ਇਸ ਮਾਮਲੇ ਦੀ ਜਾਂਚ ਸੁਰੂ ਕੀਤੀ ਗਈ ਤੇ ਪੀਲ ਰੀਜਨ, ਜੀਟੀਏ ਦੇ ਹੋਰਨਾਂ ਹਿੱਸਿਆਂ ਤੇ ਗੋਲਡਨ ਹੌਰਸਸੂਅ ਵਿੱਚ ਸੰਗਠਿਤ ਜੁਰਮ ਨੂੰ ਅੰਜਾਮ ਦੇਣ ਵਾਲੇ ਗਰੁੱਪ ਉੱਤੇ ਧਿਆਨ ਕੇਂਦਰਿਤ ਕੀਤਾ ਗਿਆ।
ਜਾਂਚਕਾਰਾਂ ਅਨੁਸਾਰ ਮਸਕੂਕਾਂ ਨੇ ਚੋਰੀ ਦੇ ਸਮਾਨ ਨੂੰ ਲੁਕਾਉਣ ਲਈ ਕਈ ਸਟੋਰੇਜ ਫੈਸਿਲਿਟੀਜ ਦੀ ਵਰਤੋਂ ਕੀਤੀ। 27 ਅਕਤੂਬਰ ਨੂੰ ਇਸ ਸੰਗਠਿਤ ਕ੍ਰਾਈਮ ਕਰਨ ਵਾਲੇ ਗਰੁੱਪ ਦੇ ਤਿੰਨ ਮੈਂਬਰਾਂ ਨੂੰ ਉਨ੍ਹਾਂ ਦੇ ਘਰਾਂ ਤੋਂ ਵਾਰੰਟ ਦੇ ਅਧਾਰ ਉੱਤੇ ਗ੍ਰਿਫਤਾਰ ਕਰ ਲਿਆ ਗਿਆ।
ਪੁਲਿਸ ਨੇ ਦੱਸਿਆ ਕਿ ਚੋਰੀ ਦੀਆਂ ਬਹੁਤੀਆਂ ਆਈਟਮਾਂ ਉਨ੍ਹਾਂ ਦੇ ਅਸਲ ਮਾਲਕਾਂ ਨੂੰ ਪਰਤਾਅ ਦਿੱਤੀਆਂ ਗਈਆਂ ਹਨ। ਪੁਲਿਸ ਨੇ ਦੱਸਿਆ ਕਿ ਇਸ ਮਾਮਲੇ ਵਿੱਚ ਬਰੈਂਪਟਨ ਦੇ 39 ਸਾਲਾ ਧਰਵੰਤ ਗਿੱਲ, 25 ਸਾਲਾ ਰਵਨੀਤ ਬਰਾੜ ਤੇ 23 ਸਾਲਾ ਦੇਵੇਸ ਪਾਲ ਨੂੰ ਚਾਰਜ ਕੀਤਾ ਗਿਆ ਹੈ।