ਸ਼ੀਗਲ ਇੰਡੀਆ ਨੇ ਵਧਾਇਆ ਗ੍ਰੋਥ ਗਾਈਡੈਂਸ – ਇਸ ਸਾਲ ਰੈਵਨਿਊ 15% ਵਧਣ ਦੀ ਉਮੀਦ

ਨਵੀਂ ਦਿੱਲੀ/ਬਿਊਰੋ ਨਿਊਜ਼
ਭਾਰਤ ਦੀ ਸੜਕ ਨਿਰਮਾਣ ਅਤੇ ਇਨਫ੍ਰਾਸਟਰਕਚਰ ਖੇਤਰ ਦੀ ਕੰਪਨੀ ਸ਼ੀਗਲ ਇੰਡੀਆ ਨੇ ਚਾਲੂ ਵਿੱਤੀ ਸਾਲ ਲਈ ਆਪਣੇ ਰੈਵਨਿਊ ਗ੍ਰੋਥ ਗਾਈਡੈਂਸ ਨੂੰ ਵਧਾ ਕੇ ਘੱਟੋ-ਘੱਟ 15% ਕਰ ਦਿੱਤਾ ਹੈ। ਕੰਪਨੀ ਦੇ ਚੇਅਰਮੈਨ ਅਤੇ ਮੈਨੇਜਿੰਗ ਡਾਇਰੈਕਟਰ ਰਮਨੀਕ ਸਹਿਗਲ ਦੇ ਮੁਤਾਬਕ, ਪਿਛਲੇ ਦੋ ਸਾਲਾਂ ਵਿੱਚ ਕੰਪਨੀ ਨੇ 10-15% ਗ੍ਰੋਥ ਦਾ ਅਨੁਮਾਨ ਦਿੱਤਾ ਸੀ, ਪਰ ਇਸ ਸਾਲ ਮਜ਼ਬੂਤ ਆਰਡਰ ਬੁੱਕ ਦੇ ਦਮ ’ਤੇ ਘੱਟੋ-ਘੱਟ 15% ਰੈਵਨਿਊ ਗ੍ਰੋਥ ਦੀ ਉਮੀਦ ਹੈ।
ਕੰਪਨੀ ਦਾ ਰੈਵਨਿਊ ਆਈ.ਪੀ.ਓ. ਦੇ ਸਮੇਂ ਕਰੀਬ 2,900 ਕਰੋੜ ਰੁਪਏ ਸੀ, ਜੋ ਪਿਛਲੇ ਵਿੱਤੀ ਸਾਲ ਵਿੱਚ ਵਧ ਕੇ ਲਗਭਗ 4,000 ਕਰੋੜ ਰੁਪਏ ਹੋ ਗਿਆ। ਯਾਨੀ ਕੰਪਨੀ ਨੇ ਕਰੀਬ 30% ਦੀ ਗ੍ਰੋਥ ਦਰਜ ਕੀਤੀ ਸੀ। ਸਟਾਕ ਵਿੱਚ ਵੀ ਮਜ਼ਬੂਤੀ ਦੇਖਣ ਨੂੰ ਮਿਲੀ ਹੈ ਅਤੇ ਸ਼ੇਅਰ ਪਿਛਲੇ ਇੱਕ ਸਾਲ ਵਿੱਚ 20% ਤੋਂ ਵੱਧ ਵਧਿਆ ਹੈ।
ਕੰਪਨੀ ਦੇ ਸੀ.ਐਮ.ਡੀ. ਦੇ ਮੁਤਾਬਕ ਸ਼ੀਗਲ ਇੰਡੀਆ ਦੀ ਮੌਜੂਦਾ ਆਰਡਰ ਬੁੱਕ ਕਰੀਬ 18,000 ਕਰੋੜ ਰੁਪਏ ਹੈ, ਜੋ ਪਿਛਲੇ ਸਾਲ ਦੇ ਰੈਵਨਿਊ ਦਾ ਕਰੀਬ ਪੰਜ ਗੁਣਾ ਹੈ। ਕੰਪਨੀ ਨੇ ਇਸ ਵਿੱਤੀ ਸਾਲ ਵਿੱਚ 6,000 ਕਰੋੜ ਰੁਪਏ ਦੇ ਨਵੇਂ ਆਰਡਰ ਹਾਸਲ ਕਰਨ ਦਾ ਟੀਚਾ ਰੱਖਿਆ ਹੈ। ਇਸ ਵਿੱਚੋਂ ਕਰੀਬ 600 ਕਰੋੜ ਰੁਪਏ ਦੇ ਆਰਡਰ ਪਹਿਲੀ ਤਿਮਾਹੀ ਵਿੱਚ ਹੀ ਮਿਲ ਚੁੱਕੇ ਹਨ।