ਡੀ.ਜੀ.ਸੀ.ਏ. ਜਲਦ ਲਿਆ ਸਕਦਾ ਹੈ ਹਵਾਈ ਯਾਤਰਾ ਦੇ ਨਵੇਂ ਨਿਯਮ
ਨਵੀਂ ਦਿੱਲੀ/ਬਿਊਰੋ ਨਿਊਜ਼
ਹਵਾਈ ਯਾਤਰੀ ਹੁਣ ਟਿਕਟ ਬੁਕਿੰਗ ਦੇ 48 ਘੰਟਿਆਂ ਦੇ ਅੰਦਰ-ਅੰਦਰ ਬਿਨਾ ਕਿਸੇ ਵਾਧੂ ਖਰਚੇ ਦੇ ਆਪਣੀਆਂ ਟਿਕਟਾਂ ਰੱਦ ਕਰਾ ਸਕਣਗੇ ਅਤੇ ਟਿਕਟ ਬਦਲ ਵੀ ਸਕਣਗੇ। ਡਾਇਰੈਕਟੋਰੇਟ ਜਨਰਲ ਆਫ ਸਿਵਲ ਏਵੀਏਸ਼ਨ (ਡੀਜੀਸੀਏ) ਨੇ ਇਨ੍ਹਾਂ ਨਿਯਮਾਂ ਨੂੰ ਪੇਸ਼ ਕਰਨ ਲਈ ਇਕ ਖਰੜਾ ਜਾਰੀ ਕੀਤਾ ਹੈ। ਡੀਜੀਸੀਏ ਨੇ ਇਸ ਸਬੰਧੀ ਲੋਕਾਂ ਕੋਲੋਂ ਸੁਝਾਅ ਮੰਗੇ ਹਨ ਅਤੇ ਜੇਕਰ ਸਭ ਠੀਕ ਰਿਹਾ ਤਾਂ ਜਲਦ ਹੀ ਇਸ ਸਬੰਧੀ ਨਿਯਮ ਬਣ ਜਾਵੇਗਾ। ਇਹ ਨਿਯਮ ਕਦੋਂ ਤੋਂ ਲਾਗੂ ਹੋਣਗੇ, ਇਸ ਸਬੰਧੀ ਅਜੇ ਤੱਕ ਤੈਅ ਨਹੀਂ ਹੋਇਆ ਹੈ। ਧਿਆਨ ਰਹੇ ਕਿ ਫਿਲਹਾਲ ਭਾਰਤ ਵਿਚ ਏਅਰ ਟਿਕਟ ਕੈਂਸੀਲੇਸ਼ਨ ਦੇ ਲਈ ਕੋਈ ਵੀ ਸਟੈਂਡਰਡ 48 ਘੰਟੇ ਦਾ ਗਰੇਸ ਪੀਰੀਅਡ ਨਹੀਂ ਹੈ। ਜ਼ਿਆਦਾਤਰ ਏਅਰਲਾਈਨਜ਼ ਆਪਣੀ ਪਾਲਿਸੀ ਮੁਤਾਬਕ ਹੀ ਫੀਸ ਲਗਾਉਂਦੀਆਂ ਹਨ। ਇਨ੍ਹਾਂ ਕੰਪਨੀਆਂ ਦਾ ਰਿਫੰਡ ਪ੍ਰੋਸੈਸ ਵੀ ਧੀਮਾ ਹੈ ਅਤੇ ਇਸ ਨਾਲ ਯਾਤਰੀਆਂ ਨੂੰ ਪਰੇਸ਼ਾਨੀ ਹੁੰਦੀ ਹੈ।
ਹਵਾਈ ਟਿਕਟ ਬੁਕਿੰਗ ਦੇ 48 ਘੰਟਿਆਂ ਤੱਕ ਫ੍ਰੀ ਕੈਂਸੀਲੇਸ਼ਨ ਦੀ ਮਿਲੇਗੀ ਸਹੂਲਤ
