ਕਸ਼ਮੀਰ ਦੇ ਮਾਛਿਲ ‘ਚ ਬਰਫ ਹੇਠਾਂ ਦੱਬਣ ਨਾਲ ਹੋਰ 5 ਜਵਾਨ ਸ਼ਹੀਦ

ਹਫਤੇ ਵਿਚ ਤਿੰਨ ਥਾਵਾਂ ‘ਤੇ ਐਵਲਾਂਚ ਹੋਣ ਨਾਲ ਫੌਜ ਦੇ 20 ਜਵਾਨ ਸ਼ਹੀਦ ਹੋਏ
ਸ੍ਰੀਨਗਰ/ਬਿਊਰੋ ਨਿਊਜ਼
ਕਸ਼ਮੀਰ ਦੇ ਮਾਛਿਲ ਸੈਕਟਰ ਵਿਚ ਬਰਫ ਦੇ ਹੇਠਾਂ ਦੱਬੇ ਫੌਜ ਦੇ ਪੰਜ ਹੋਰ ਜਵਾਨ ਸ਼ਹੀਦ ਹੋ ਗਏ ਹਨ। ਫੌਜ ਨੇ ਪਿਛਲੇ ਦਿਨ ਸਖਤ ਮਿਹਨਤ ਤੋਂ ਬਾਅਦ ਉਨ੍ਹਾਂ ਨੂੰ ਬਰਫ ਹੇਠੋਂ ਕੱਢ ਲਿਆ ਸੀ, ਜਿਸ ਤੋਂ ਬਾਅਦ ਉਨ੍ਹਾਂ ਦਾ ਇਲਾਜ ਚੱਲ ਰਿਹਾ ਸੀ। ਪਿਛਲੇ ਹਫਤੇ ਗੁਰੇਜ ਅਤੇ ਸੋਨਮਰਗ ਵਿਚ ਵੀ ਐਵਲਾਂਚ ਹੋਣ ਨਾਲ ਮੇਜਰ ਸਮੇਤ 15 ਜਵਾਨ ਸ਼ਹੀਦ ਹੋ ਗਏ ਸਨ। ਘਾਟੀ ਵਿਚ ਖਰਾਬ ਮੌਸਮ ਦੇ ਚੱਲਦਿਆਂ ਹੁਣ ਤੱਕ 20 ਜਵਾਨਾਂ ਦੀ ਜਾਨ ਜਾ ਚੁੱਕੀ ਹੈ।
ਐਤਵਾਰ ਨੂੰ ਜੰਮੂ ਕਸ਼ਮੀਰ ਦੌਰੇ ‘ਤੇ ਪਹੁੰਚੇ ਸੈਨਾ ਮੁਖੀ ਵਿਪਿਨ ਰਾਵਤ ਨੇ ਕਿਹਾ ਕਿ ਗਲੋਬਲ ਵਾਰਮਿੰਗ ਨਾਲ ਗਲੇਸ਼ੀਅਰ ਵਿਚ ਤਰੇੜਾਂ ਆ ਰਹੀਆਂ ਹਨ। ਅਜਿਹੇ ਖੇਤਰਾਂ ਵਿਚ ਵੀ ਐਵਲਾਂਚ ਆ ਰਹੇ ਹਨ, ਜਿੱਥੇ ਪਹਿਲਾਂ ਕਦੀ ਅਜਿਹਾ ਦੇਖਣ ਨੂੰ ਨਹੀਂ ਮਿਲਦਾ ਸੀ।