ਪਾਰਲੀਆਮੈਂਟ ਦੀ ਪਿਛਲੀ ਕਾਰਵਾਈ ਵਿੱਚ ਲਿਬਰਲਾਂ ਵੱਲੋਂ ਕੈਨੇਡਾ ਦੇ ਗੰਨ ਲਾਅਜ਼ ਵਿੱਚ ਤਬਦੀਲੀ ਲਿਆਂਦੀ ਗਈ। ਉਸ ਸਮੇਂ ਬੈਕਗ੍ਰਾਊਂਡ ਚੈੱਕ ਕਰਨ ਸਬੰਧੀ ਨਿਯਮ ਨੂੰ ਹੋਰ ਮਜ਼ਬੂਤ ਕੀਤਾ ਗਿਆ ਤੇ ਅਸਾਲਟ-ਸਟਾਈਲ ਹਥਿਆਰਾਂ ਦੀਆਂ ਕਈ ਕਿਸਮਾਂ ਦੇ ਨਾਲ ਨਾਲ 1500 ਮਾਡਲਾਂ ਉੱਤੇ ਪਾਬੰਦੀ ਲਾਈ ਗਈ।
ਹਾਲਾਂਕਿ ਲਿਬਰਲਾਂ ਦੇ ਪਲੈਨ ਦੇ ਕਈ ਹਿੱਸਿਆਂ, ਜਿਵੇਂ ਕਿ ਪ੍ਰਸਤਾਵਿਤ ਗੰਨ ਬਾਇਬੈਕ ਪ੍ਰੋਗਰਾਮ, ਨੂੰ ਬੂਰ ਨਹੀਂ ਪਿਆ ਇਸ ਲਈ ਟਰੂਡੋ ਵੱਲੋਂ 2021 ਦੀਆਂ ਫੈਡਰਲ ਚੋਣਾਂ ਵਿੱਚ ਇਸ ਤੋਂ ਵੀ ਵੱਧ ਸਖ਼ਤੀ ਕਰਨ ਦਾ ਤਹੱਈਆ ਪ੍ਰਗਟਾਇਆ ਗਿਆ ਸੀ।
ਲਿਬਰਲਾਂ ਵੱਲੋਂ ਚੋਣਾਂ ਵਿੱਚ ਕੀਤੇ ਗਏ ਵਾਅਦੇ ਅਨੁਸਾਰ ਪਬਲਿਕ ਸੇਫਟੀ ਮੰਤਰੀ ਮਾਰਕੋ ਮੈਂਡੀਸਿਨੋ ਵੱਲੋਂ ਗੰਨ ਕੰਟਰੋਲ ਸਬੰਧੀ ਨਵੇਂ ਮਾਪਦੰਡ ਲਿਆਉਣ ਦਾ ਕੰਮ ਸ਼ੁਰੂ ਕਰ ਦਿੱਤੀ ਗਈ ਹੈ। ਇਸ ਤਹਿਤ ਹਥਿਆਰਾਂ ਦੀ ਲਾਇਸੰਸ ਸਬੰਧੀ ਵੈਰੀਫਿਕੇਸ਼ਨ ‘ਤੇ ਬਿਜ਼ਨਸ ਰਿਕਾਰਡ ਨੂੰ ਸਾਂਭਣ ਸਬੰਧੀ ਨਿਯਮ ਵੀ ਸ਼ਾਮਲ ਹਨ।
ਅਮਰੀਕਾ ਵਿੱਚ ਸ਼ੂਟਿੰਗ ਦੀ ਵਾਪਰੀ ਤਾਜ਼ਾ ਘਟਨਾ ਦੀ ਗੱਲ ਕਰਦਿਆਂ ਪਬਲਿਕ ਸੇਫਟੀ ਮੰਤਰੀ ਨੇ ਆਖਿਆ ਕਿ ਇਹ ਘਟਨਾ ਸਾਡੇ ਲਈ ਇੱਕ ਸਬਕ ਹੈ ਕਿ ਅਸੀਂ ਇਸ ਪਾਸੇ ਧਿਆਨ ਦੇਈਏ ਤੇ ਕੈਨੇਡਾ ਵਿੱਚ ਅਜੇ ਇਸ ਪਾਸੇ ਕਾਫੀ ਕੁੱਝ ਕਰਨਾ ਬਾਕੀ ਹੈ।