ਸਿੱਕਮ ’ਚ ਵੀ ਮੈਰਿਜ ਰਜਿਸਟਰਡ ਕਰਵਾ ਸਕਣਗੇ ਸਿੱਖ ਜੋੜੇ

1 ਜੂਨ ਤੋਂ ਲਾਗੂ ਹੋਵੇਗਾ ਆਨੰਦ ਮੈਰਿਜ ਐਕਟ
ਚੰਡੀਗੜ੍ਹ/ਬਿਊਰੋ ਨਿਊਜ਼
ਸਿੱਕਮ ਸਣੇ ਹੁਣ ਪੂਰੇ ਭਾਰਤ ਵਿਚ ਸਿੱਖ ਜੋੜੇ ਆਨੰਦ ਮੈਰਿਜ ਐਕਟ ਦੇ ਤਹਿਤ ਵਿਆਹ ਰਜਿਸਟਰਡ ਕਰਵਾ ਸਕਣਗੇ। ਸੁਪਰੀਮ ਕੋਰਟ ਦੀ ਫਟਕਾਰ ਤੋਂ ਬਾਅਦ ਹੁਣ ਸਿੱਕਮ ਨੇ ਵੀ ਆਨੰਦ ਮੈਰਿਜ ਐਕਟ ਦੇ ਤਹਿਤ ਆਉਂਦੀ 1 ਜੂਨ ਤੋਂ ਰਜਿਸਟਰੇਸ਼ਨ ਕਰਵਾਉਣ ਦਾ ਨੋਟੀਫਿਕੇਸ਼ਨ ਜਾਰੀ ਕਰ ਦਿੱਤਾ ਹੈ। ਇਸ ਇਤਿਹਾਸਕ ਬਦਲਾਅ ਤੋਂ ਬਾਅਦ ਹੁਣ ਸਿੱਕਮ ਵਿਚ ਰਹਿਣ ਵਾਲੇ ਸਿੱਖ ਜੋੜੇ ਆਪਣੀ ਪਰੰਪਰਿਕ ‘ਆਨੰਦ ਕਾਰਜ’ ਦੀ ਰਸਮ ਦੇ ਤਹਿਤ ਵਿਆਹ ਨੂੰ ਬਿਨਾ ਕਿਸੇ ਕਾਨੂੰਨੀ ਅੜਚਨ ਦੇ ਸਿੱਧੇ ਰਜਿਸਟਰ ਕਰਾ ਸਕਣਗੇ। ਜ਼ਿਕਰਯੋਗ ਹੈ ਕਿ ਭਾਰਤ ਦੇ ਸਾਰੇ ਸੂਬਿਆਂ ਵਿਚ ਆਨੰਦ ਮੈਰਿਜ ਐਕਟ ਦੇ ਤਹਿਤ ਵਿਆਹਾਂ ਦੀ ਰਜਿਸਟਰੇਸ਼ਨ ਹੋ ਰਹੀ ਹੈ, ਪਰ ਸਿੱਕਮ ਨੇ ਇਸ ਸਬੰਧ ਵਿਚ ਨਿਯਮ ਨਹੀਂ ਬਣਾਏ ਸਨ। ਮਾਮਲਾ ਸੁਪਰੀਮ ਕੋਰਟ ਪਹੁੰਚਿਆ ਤਾਂ ਵੀ ਸਿੱਕਮ ਸਰਕਾਰ ਨੇ ਇਸ ਨੂੰ ਲਾਗੂ  ਨਹੀਂ ਕੀਤਾ। ਇਸਦੇ ਚੱਲਦਿਆਂ ਜਦੋਂ ਸੁਪਰੀਮ ਕੋਰਟ ਨੇ ਸਰਕਾਰ ਨੂੰ ਦੁਬਾਰਾ ਫਿਟਕਾਰ ਲਗਾਈ ਤਾਂ ਹੁਣ ਇਸ ਸਬੰਧੀ ਨੋਟੀਫਿਕੇਸ਼ਨ  ਜਾਰੀ ਕਰ ਦਿੱਤਾ ਗਿਆ ਹੈ ਅਤੇ ਆਉਂਦੀ 1 ਜੂਨ ਤੋਂ ਸਿੱਕਮ ਵਿਚ ਸਿੱਖ ਜੋੜੇ ਮੈਰਿਜ ਰਜਿਸਟਰਡ ਕਰਵਾ ਸਕਣਗੇ।