ਰਿਜ਼ਰਵ ਬੈਂਕ ਨੇ ਮੰਨਿਆ ਕਿ ਨੋਟਬੰਦੀ ਕਾਰਨ ਪੇਂਡੂ ਖੇਤਰਾਂ ਨੂੰ ਜ਼ਿਆਦਾ ਸਮੱਸਿਆ

ਪੇਂਡੂ ਖੇਤਰਾਂ ਦੀਆਂ ਬ੍ਰਾਂਚਾਂ ਵਿਚ 40 ਫੀਸਦੀ ਨਕਦੀ ਭੇਜਣ ਲਈ ਕਿਹਾ
ਮੁੰਬਈ/ਬਿਊਰੋ ਨਿਊਜ਼
ਰਿਜ਼ਰਵ ਬੈਂਕ ਨੇ ਮੰਨਿਆ ਹੈ ਕਿ ਪੇਂਡੂ ਖੇਤਰਾਂ ਵਿੱਚ ਨਕਦੀ ਦੀ ਸਮੱਸਿਆ ਆ ਰਹੀ ਹੈ। ਇਸ ਦੇ ਨਾਲ ਹੀ ਆਰ.ਬੀ.ਆਈ. ਨੇ ਬੈਂਕਾਂ ਨੂੰ ਹੁਕਮ ਦਿੱਤਾ ਹੈ ਕਿ ਆਪਣੀਆਂ ਪੇਂਡੂ ਖੇਤਰਾਂ ਵਿਚਲੀਆਂ ਬ੍ਰਾਂਚਾਂ ਵਿੱਚ ਘੱਟੋ-ਘੱਟ 40 ਫੀਸਦੀ ਨਕਦੀ ਭੇਜੀ ਜਾਵੇ। ਆਰ.ਬੀ.ਆਈ. ਨੇ ਅੱਜ ਇੱਕ ਨੋਟੀਫਿਕੇਸ਼ਨ ਜਾਰੀ ਕੀਤਾ ਹੈ। ਇਸ ਵਿੱਚ ਕਿਹਾ ਗਿਆ ਹੈ ਕਿ ਪੇਂਡੂ ਖੇਤਰਾਂ ਵਿੱਚ ਨੋਟਾਂ ਦੀ ਸਪਲਾਈ ਢੁਕਵੀਂ ਨਹੀਂ ਹੈ। ਇਸ ਨਾਲ ਲੋਕਾਂ ਨੂੰ ਮੁਸ਼ਕਲਾਂ ਆ ਰਹੀਆਂ ਹਨ। ਇਸ ਲਈ ਸਾਰੇ ਬੈਂਕ ਆਪਣੀਆਂ ਪੇਂਡੂ ਸ਼ਖਾਵਾਂ ਵਿੱਚ 40 ਫੀਸਦੀ ਨਕਦੀ ਭੇਜਣ।
ਜ਼ਿਕਰਯੋਗ ਹੈ ਕਿ ਨੋਟਬੰਦੀ ਦਾ ਸਭ ਤੋਂ ਵੱਧ ਅਸਰ ਪੇਂਡੂ ਖੇਤਰਾਂ ਵਿੱਚ ਹੀ ਪਿਆ ਹੈ। ਪਿੰਡਾਂ ਵਿੱਚ ਇੱਕ ਤਾਂ ਏਟੀਐਮ ਨਹੀਂ ਤੇ ਦੂਜਾ ਇੱਥੇ ਜ਼ਿਆਦਾਤਰ ਲੈਣ-ਦੇਣ ਨਕਦੀ ਰਾਹੀਂ ਹੀ ਹੁੰਦਾ ਹੈ। ਹੁਣ ਸ਼ਹਿਰਾਂ ਵਿੱਚ ਹਾਲਤ ਸੁਧਰਣ ਲੱਗੀ ਹੈ ਪਰ ਪਿੰਡਾਂ ਵਿੱਚ ਅਜੇ ਵੀ ਖੱਜਲ-ਖੁਆਰੀ ਜਾਰੀ ਹੈ।