ਭਾਰਤ ਨੇ ਅਗਨੀ ਪ੍ਰਾਈਮ ਮਿਜ਼ਾਇਲ ਦਾ ਕੀਤਾ ਸਫ਼ਲ ਪ੍ਰੀਖਣ

ਨਵੀਂ ਦਿੱਲੀ/ਬਿਊਰੋ ਨਿਊਜ਼
ਭਾਰਤੀ ਰੱਖਿਆ ਖੋਜ ਅਤੇ ਵਿਕਾਸ ਸੰਗਠਨ ਨੇ ਅਗਨੀ ਪ੍ਰਾਈਮ ਮਿਜ਼ਾਈਲ ਦਾ ਸਫਲ ਪ੍ਰੀਖਣ ਕੀਤਾ ਹੈ। ਡੀਆਰਡੀਓ ਨੇ ਅਬਦੁਲ ਕਲਾਮ ਟਾਪੂ ਤੋਂ ਇਸ ਅਤਿ-ਆਧੁਨਿਕ ਮਿਜ਼ਾਈਲ ਦਾ ਸਫ਼ਲ ਪ੍ਰੀਖਣ ਕੀਤਾ ਹੈ। ਤੁਹਾਨੂੰ ਦੱਸ ਦੇਈਏ ਕਿ ਅਗਨੀ ਪ੍ਰਾਈਮ ਜਾਂ ਅਗਨੀ ਪੀ ਮਿਜ਼ਾਈਲ ਅਗਨੀ ਸੀਰੀਜ਼ ਦੀ ਨਵੀਂ ਪੀੜ੍ਹੀ ਦੀ ਐਡਵਾਂਸਡ ਮਿਜ਼ਾਈਲ ਹੈ। ਡੀਆਰਡੀਓ ਵੱਲੋਂ ਦੱਸਿਆ ਗਿਆ ਹੈ ਕਿ ਇਸ ਮਿਜ਼ਾਈਲ ਦੀ ਰੇਂਜ 1000 ਤੋਂ 2000 ਕਿਲੋਮੀਟਰ ਦੇ ਵਿਚਕਾਰ ਹੈ। ਇਹ ਮਿਜ਼ਾਈਲ ਪ੍ਰਮਾਣੂ ਬੰਬ ਲਿਜਾਣ ਦੇ ਸਮਰੱਥ ਹੈ, ਸ਼ਨੀਵਾਰ ਨੂੰ ਇਸ ਦੇ ਸਫਲ ਪ੍ਰੀਖਣ ਤੋਂ ਬਾਅਦ ਡੀਆਰਡੀਓ ਅਤੇ ਭਾਰਤੀ ਵਿਗਿਆਨੀਆਂ ਵਿੱਚ ਖੁਸ਼ੀ ਦੀ ਲਹਿਰ ਦੌੜ ਗਈ ਹੈ। ਪ੍ਰੀਖਣ ਦੌਰਾਨ ਮਿਜ਼ਾਈਲ ਦੀ ਨਿਗਰਾਨੀ ਕਰਨ ਲਈ ਬੀਚ ‘ਤੇ ਟੈਲੀਮੈਟਰੀ ਅਤੇ ਰਾਡਾਰ ਸਟੇਸ਼ਨ ਲਗਾਏ ਗਏ ਸਨ। ਪ੍ਰੀਖਣ ਦੌਰਾਨ ਅਗਨੀ ਪ੍ਰਾਈਮ ਮਿਜ਼ਾਈਲ ਨੇ ਸਾਰੇ ਟੀਚਿਆਂ ਨੂੰ ਸਟੀਕਤਾ ਨਾਲ ਨਿਸ਼ਾਨਾ ਬਣਾਇਆ ਅਤੇ ਉੱਚ ਸਟੀਕਤਾ ਦੇ ਨਾਲ ਸਾਰੇ ਤਕਨੀਕੀ ਪ੍ਰਯੋਗਾਂ ਵਿੱਚ ਸਫਲ ਰਹੀ। ਅਗਨੀ ਪ੍ਰਾਈਮ ਹੋਰ ਅਗਨੀ ਮਿਜ਼ਾਈਲਾਂ ਨਾਲੋਂ ਹਲਕਾ ਹੈ ਅਤੇ ਉੱਚ ਫਾਇਰ ਪਾਵਰ ਹੈ। ਅਗਨੀ 1 ਮਿਜ਼ਾਈਲ ਸਿੰਗਲ ਸਟੇਜ ਮਿਜ਼ਾਈਲ ਸੀ ਜਦੋਂ ਕਿ ਅਗਨੀ ਪ੍ਰਾਈਮ ਡਬਲ ਸਟੇਜ ਮਿਜ਼ਾਈਲ ਹੈ, ਅਗਨੀ ਪ੍ਰਾਈਮ ਦਾ ਭਾਰ ਇਸਦੇ ਪਿਛਲੇ ਵਰਜ਼ਨ ਨਾਲੋਂ ਹਲਕਾ ਹੈ। ਇਹ 4000 ਕਿਲੋਮੀਟਰ ਦੀ ਰੇਂਜ ਵਾਲੇ ਅਗਨੀ 4 ਅਤੇ 5000 ਕਿਲੋਮੀਟਰ ਦੀ ਰੇਂਜ ਵਾਲੇ ਅਗਨੀ 5 ਨਾਲੋਂ ਭਾਰ ਵਿੱਚ ਹਲਕਾ ਹੈ। ਅੱਜ ਇਸ ਦੇ ਪ੍ਰੀਖਣ ਮੌਕੇ ਰੱਖਿਆ ਖੋਜ ਅਤੇ ਵਿਕਾਸ ਸੰਗਠਨ ਅਤੇ ਆਈ.ਟੀ.ਆਰ ਨਾਲ ਜੁੜੇ ਸੀਨੀਅਰ ਅਧਿਕਾਰੀਆਂ ਅਤੇ ਵਿਗਿਆਨੀਆਂ ਦੀ ਟੀਮ ਮੌਕੇ ‘ਤੇ ਮੌਜੂਦ ਸੀ।