ਐਸਜੀਪੀਸੀ ਪ੍ਰਧਾਨ ਦੀ ਬਾਦਲਾਂ ਖਿਲਾਫ ਬਗਾਵਤੀ ਸੁਰ, ਛੁੱਟੀ ਤੈਅ

ਮੈਂ ਬਾਦਲਾਂ ਦੇ ਲਿਫਾਫੇ ‘ਚੋਂ ਨਹੀਂ ਨਿਕਲਿਆ : ਪ੍ਰੋ. ਬਡੂੰਗਰ
ਫਤਹਿਗੜ੍ਹ ਸਾਹਿਬ/ਬਿਊਰੋ ਨਿਊਜ਼
ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੇ ਨਵੇਂ ਪ੍ਰਧਾਨ ਬਣਨ ਲਈ ਜੋੜ-ਤੋੜ ਸ਼ੁਰੂ ਹੋ ਗਏ ਹਨ ਕਿਉਂਕਿ ਮੌਜੂਦਾ ਪ੍ਰਧਾਨ ਕਿਰਪਾਲ ਸਿੰਘ ਬਡੂੰਗਰ ਨੇ ਐਸਜੀਪੀਸੀ ਦੇ ਇਨਸਾਨੀ ਜਾਮੇ ਵਿਚ ਪਾਲਣਹਾਰ ਬਣੇ ਬਾਦਲਾਂ ਖ਼ਿਲਾਫ਼ ਬਗਾਵਤੀ ਸੁਰ ਅਲਾਪ ਲਈ ਹੈ। ਸ੍ਰੀ ਫਤਿਹਗੜ੍ਹ ਸਾਹਿਬ ਦੀ ਧਰਤੀ ‘ਤੇ ਕਿਰਪਾਲ ਸਿੰਘ ਬਡੂੰਗਰ ਨੇ ਸਾਫ ਤੇ ਸਪੱਸ਼ਟ ਸ਼ਬਦਾਂ ਵਿਚ ਆਖਿਆ ਕਿ ਮੈਂ ਬਾਦਲਾਂ ਦੇ ਲਿਫਾਫੇ ਵਿਚੋਂ ਨਿਕਲਿਆ ਹੋਇਆ ਪ੍ਰਧਾਨ ਨਹੀਂ ਹਾਂ। ਪ੍ਰੋ. ਕਿਰਪਾਲ ਸਿੰਘ ਬਡੂੰਗਰ ਦੇ ਇਨ੍ਹਾਂ ਬੋਲਾਂ ਨੂੰ ਬਗਾਵਤੀ ਸ਼ਬਦ ਮੰਨਦਿਆਂ ਬਾਦਲ ਹਲਕਿਆਂ ਵਿਚ ਨਵੇਂ ਪ੍ਰਧਾਨ ਦੀ ਭਾਲ ਸ਼ੁਰੂ ਹੋ ਗਈ ਹੈ ਅਤੇ ਪ੍ਰੋ. ਬਡੂੰਗਰ ਦੀ ਛੁੱਟੀ ਲਗਭਗ ਤੈਅ ਹੀ ਹੈ। ਪ੍ਰੋ: ਬਡੂੰਗਰ ਦੇ ਬਾਗੀ ਸੁਰਾਂ ਨੂੰ ਦੇਖਦਿਆਂ ਨਵੇਂ ਪ੍ਰਧਾਨ ਬਣਨ ਲਈ ਸੇਵਾ ਸਿੰਘ ਸੇਖਵਾਂ, ਅਮਰਜੀਤ ਸਿੰਘ ਚਾਵਲਾ ਅਤੇ ਪੰਜਾਬੀ ਯੂਨੀਵਰਸਿਟੀ ਪਟਿਆਲਾ ਦੇ ਸਾਬਕਾ ਵਾਈਸ ਚਾਂਸਲਰ ਡਾ. ਜਸਪਾਲ ਸਿੰਘ ਦਾ ਨਾਂ ਜਿੱਥੇ ਚਰਚਾ ਵਿਚ ਹੈ ਉੱਥੇ ਸਾਬਕਾ ਪ੍ਰਧਾਨ ਬੀਬੀ ਜਗੀਰ ਕੌਰ ਵੀ ਆਸ ਲਗਾਈ ਬੈਠੇ ਹਨ।