ਗੋਹਾਣਾ ਤੇ ਹਾਂਸੀ ਵੀ ਬਣਾਏ ਜਾ ਸਕਦੇ ਹਨ ਜ਼ਿਲ੍ਹੇ
ਚੰਡੀਗੜ੍ਹ/ਬਿਊਰੋ ਨਿਊਜ਼ : ਹਰਿਆਣਾ ਨੂੰ ਅੱਠ ਸਾਲਾਂ ਬਾਅਦ ਨਵਾਂ ਜ਼ਿਲ੍ਹਾ ਮਿਲ ਗਿਆ ਹੈ। ਮੁੱਖ ਮੰਤਰੀ ਮਨੋਹਰ ਲਾਲ ਖੱਟਰ ਦੇ ਐਲਾਨ ਬਾਅਦ ਚਰਖੀ ਦਾਦਰੀ ਸੂਬੇ ਦਾ 22ਵਾਂ ਜ਼ਿਲ੍ਹਾ ਬਣ ਗਿਆ ਹੈ। ਇਸ ਤੋਂ ਪਹਿਲਾਂ ਹੁੱਡਾ ਸਰਕਾਰ ਵੱਲੋਂ ਮੇਵਾਤ ਅਤੇ ਪਲਵਲ ਨੂੰ ਜ਼ਿਲ੍ਹਾ ਬਣਾਇਆ ਗਿਆ ਸੀ। ਪੰਜਾਬ ਤੋਂ ਹਰਿਆਣਾ ਨੂੰ ਵੱਖ ਹੋਏ 50 ਸਾਲ ਪੂਰੇ ਹੋਣ ਜਾ ਰਹੇ ਹਨ ਅਤੇ ਹੁਣ ਹਰਿਆਣਾ ਵਿਚ ਪੰਜਾਬ ਵਾਂਗ 22 ਜ਼ਿਲ੍ਹੇ ਹੋ ਗਏ ਹਨ। ਹਾਲਾਂਕਿ ਭੂਗੋਲਿਕ ਸਥਿਤੀ ਮੁਤਾਬਕ ਹਰਿਆਣਾ ਤੋਂ ਪੰਜਾਬ ਕਾਫ਼ੀ ਵੱਡਾ ਹੈ। ਹੁਣ ਸੋਨੀਪਤ ਦੇ ਗੋਹਾਣਾ ਅਤੇ ਹਿਸਾਰ ਦੇ ਹਾਂਸੀ ਨੂੰ ਵੀ ਜ਼ਿਲ੍ਹੇ ਦਾ ਦਰਜਾ ਮਿਲਣ ਦੀ ਸੰਭਾਵਨਾ ਵਧ ਗਈ ਹੈ।
ਗੋਹਾਣਾ ਦੇ ਲੋਕਾਂ ਨੇ ਤਾਂ ਜ਼ਿਲ੍ਹਾ ਬਣਾਏ ਜਾਣ ਲਈ ਅੰਦੋਲਨ ਵੀ ਚਲਾਇਆ ਹੈ। ਸੂਬੇ ਵਿੱਚ ਜ਼ਿਲ੍ਹਿਆਂ, ਮੰਡਲਾਂ, ਉਪ ਮੰਡਲਾਂ, ਸਬ ਡਿਵੀਜ਼ਨਾਂ, ਤਹਿਸੀਲਾਂ, ਉਪ ਤਹਿਸੀਲਾਂ ਤੇ ਬਲਾਕ ਆਦਿ ਦੀਆਂ ਹੱਦਾਂ ਨਵੇਂ ਸਿਰੇ ਤੋਂ ਤੈਅ ਕਰਨ ਲਈ ਸਰਕਾਰ ਨੇ ਪੰਚਾਇਤੀ ਵਿਕਾਸ ਮੰਤਰੀ ਓਮ ਪ੍ਰਕਾਸ਼ ਧਨਖੜ ਦੀ ਪ੍ਰਧਾਨਗੀ ਵਿੱਚ ਕੈਬਨਿਟ ਸਬ-ਕਮੇਟੀ ਦਾ ਗਠਨ ਕੀਤਾ ਸੀ। ਇਸ ਸਬ-ਕਮੇਟੀ ਨੇ ਇਸ ਸਾਲ ਅਪਰੈਲ ਵਿੱਚ ਸਰਕਾਰ ਨੂੰ ਰਿਪੋਰਟ ਸੌਂਪ ਦਿੱਤੀ ਸੀ, ਜਿਸ ਵਿੱਚ ਦਾਦਰੀ, ਹਾਂਸੀ ਤੇ ਗੋਹਾਣਾ ਨੂੰ ਜ਼ਿਲ੍ਹੇ ਬਣਾਉਣ ਦੀ ਸਿਫ਼ਾਰਸ਼ ਕੀਤੀ ਗਈ ਸੀ। ਸੂਤਰਾਂ ਮੁਤਾਬਕ ਦਾਦਰੀ ਵਾਂਗ ਗੋਹਾਣਾ ਤੇ ਹਾਂਸੀ ਵਿੱਚ ਵੀ ਰੈਲੀਆਂ ਕਰਕੇ ਜ਼ਿਲ੍ਹੇ ਐਲਾਨੇ ਜਾ ਸਕਦੇ ਹਨ।
ਦਾਦਰੀ ਬਣਿਆ ਹਰਿਆਣਾ ਦਾ 22ਵਾਂ ਜ਼ਿਲ੍ਹਾ
