ਰਾਮ ਰਹੀਮ ਦੀ ਪੋਲ ਖੋਲ੍ਹਣ ਲਈ ਪੁਲਿਸ ਲਵੇਗੀ ਅਮਰੀਕੀ ਕੰਪਨੀ ਦੀ ਸਹਾਇਤਾ

ਐਸ ਆਈ ਟੀ ਨੇ ਹਰਿਮੰਦਰ ਜੱਸੀ ਨੂੰ ਵੀ ਭੇਜਿਆ ਨੋਟਿਸ
ਰੋਹਤਕ/ਬਿਊਰੋ ਨਿਊਜ਼
ਡੇਰਾ ਸਿਰਸਾ ਦਾ ਮੁਖੀ ਰਾਮ ਰਹੀਮ ਸੁਨਾਰੀਆ ਜੇਲ੍ਹ ‘ਚ ਬਲਾਤਕਾਰ ਦੇ ਦੋਸ਼ਾਂ ਤਹਿਤ 20 ਸਾਲ ਦੀ ਸਜ਼ਾ ਕੱਟ ਰਿਹਾ ઠਹੈ। ਇਸ ਤੋਂ ਇਲਾਵਾ ਰਾਮ ਰਹੀਮ ‘ਤੇ ਦੋ ਕਤਲ ਦੇ ਕੇਸ ਚਲ ਰਹੇ ਹਨ। ਪੰਚਕੂਲਾ ਹਿੰਸਾ ਕੇਸ ਦੀ ਜਾਂਚ ਕਰ ਰਹੀ ਪੁਲਿਸ ਨੂੰ ਰਾਮ ਰਹੀਮ ਦੇ ਡੇਰੇ ਵਿਚ ਲੜਕੀਆਂ ਦੇ ਹੋਸਟਲ ਦੇ ਕੋਲੋਂ 3 ਸੜੀਆਂ ਹੋਈਆਂ ਸੀ.ਡੀ. ਮਿਲੀਆਂ ਸਨ। ਇਨ੍ਹਾਂ ਸੜੀਆਂ ਹੋਈਆਂ ਸੀ.ਡੀ. ਵਿਚੋਂ ਡਾਟਾ ਵਾਪਸ ਲੈਣ ਲਈ ਪੁਲਸ ਅਮਰੀਕਾ ਦੀ ਕੰਪਨੀ ਐੱਫ.ਬੀ.ਆਈ. ਤੋਂ ਸਹਾਇਤਾ ਲੈਣ ਜਾ ਰਹੀ ਹੈ।
ਉਧਰ ਦੂਜੇ ਪਾਸੇ ਰਾਮ ਰਹੀਮ ਦੇ ਕੁੜਮ ਅਤੇ ਬਠਿੰਡਾ ਦੇ ਸਾਬਕਾ ਕਾਂਗਰਸੀ ਵਿਧਾਇਕ ਹਰਮਿੰਦਰ ਸਿੰਘ ਜੱਸੀ ਨੂੰ ਪੰਚਕੂਲਾ ਹਿੰਸਾ ਮਾਮਲੇ ਵਿਚ ਐੱਸ. ਆਈ. ਟੀ. ਨੇ ਨੋਟਿਸ ਭੇਜ ਕੇ ਜਵਾਬ ਮੰਗਿਆ ਹੈ। ਇਸੇ ਦੌਰਾਨ ਪੰਚਕੂਲਾ ‘ਚ ਦੰਗਾ ਭੜਕਾਉਣ ਦੇ ਮਾਮਲੇ ਵਿੱਚ ਰਾਮ ਰਹੀਮ ਦੇ ਨੇੜਲੇ ਅਦਿੱਤਿਆ ਇੰਸਾਂ ਨੂੰ ਫੜਨ ਲਈ ਪੁਲਿਸ ਨੇ ਇਨਾਮੀ ਰਾਸ਼ੀ ਵਧਾ ਕੇ ਦੋ ਲੱਖ ਰੁਪਏ ਕਰ ਦਿੱਤੀ ਹੈ।