ਬਰਨਾਲਾ ‘ਚ ਪਿਕਨਿਕ ਦੌਰਾਨ 10ਵੀਂ ਦੀ ਵਿਦਿਆਰਥਣ ਨੇ ਚਲਾਈ ਏਅਰਗੰਨ

ਦੂਜੀ ਜਮਾਤ ਦੇ ਵਿਦਿਆਰਥੀ ਦੀ ਗਈ ਜਾਨ
ਬਰਨਾਲਾ/ਬਿਊਰੋ ਨਿਊਜ਼
ਬਰਨਾਲਾ ਦੇ ਇਕ ਸਕੂਲ ਵਿਚ ਪਿਕਨਿਕ ਦੌਰਾਨ ਵੱਡੀ ਲਾਪਰਵਾਹੀ ਸਾਹਮਣੇ ਆਈ ਹੈ। ਇੱਥੇ ਪਿਕਨਿਕ ਦੌਰਾਨ 10ਵੀਂ ਜਮਾਤ ਦੀ ਵਿਦਿਆਰਥਣ ਨੇ ਏਅਰਗੰਨ ਨਾਲ ਇਕ ਲੜਕੇ ਨੂੰ ਸ਼ੂਟ ਕਰ ਦਿੱਤਾ। ਦੂਜੀ ਜਮਾਤ ਦੇ ਜਸਵੀਰ ਸਿੰਘ ਨਾਮ ਦੇ ਵਿਦਿਆਰਥੀ ਨੂੰ ਗੰਭੀਰ ਹਾਲਤ ਵਿਚ ਹਸਪਤਾਲ ਭਰਤੀ ਕਰਵਾਇਆ ਗਿਆ ਸੀ ਅਤੇ ਉਹ ਲੰਘੀ ਰਾਤ ਜ਼ਿੰਦਗੀ ਦੀ ਜੰਗ ਹਾਰ ਗਿਆ। ਹੁਣ ਇਸ ਸਕੂਲ ਦੀ ਮਾਨਤਾ ਰੱਦ ਕੀਤੇ ਜਾਣ ਦੀ ਗੱਲ ਕਹੀ ਜਾ ਰਹੀ ਹੈ।
ਇਹ ਘਟਨਾ ਬਰਨਾਲਾ ਜ਼ਿਲ੍ਹੇ ਵਿਚ ਕਸਬਾ ਭਦੌੜ ਸਥਿਤ ਲਾਲਾ ਲਾਜਪਤ ਰਾਏ ਆਰੀਆ ਮਾਡਲ ਸੀਨੀਅਰ ਸੈਕੰਡਰੀ ਸਕੂਲ ‘ਚ ਲੰਘੇ ਬੁੱਧਵਾਰ ਨੂੰ ਵਾਪਰੀ ਸੀ। ਜਾਣਕਾਰੀ ਮੁਤਾਬਕ ਫਿਰੋਜ਼ਪੁਰ ਦੀ ਹਰੀਸ਼ ਅਰੋੜਾ ਐਂਡ ਕੰਪਨੀ ਨੇ ਸਕੂਲ ਵਿਚ ਪਿਕਨਿਕ ਦਾ ਆਯੋਜਨ ਕੀਤਾ ਸੀ। ਇਸ ਸਬੰਧੀ ਸਕੂਲ ਦੀ ਪ੍ਰਿੰਸੀਪਲ ਸੁਰੇਸ਼ ਪ੍ਰਭਾ ਨੇ ਦੱਸਿਆ ਕਿ ਪਿਕਨਿਕ ਵਿਚ 10ਵੀਂ ਦੀ ਵਿਦਿਆਰਥਣ ਨੇ ਏਅਰਗੰਨ ਚਲਾਈ ਤਾਂ ਇਹ ਬੱਚਾ ਸਾਹਮਣੇ ਆ ਗਿਆ ਅਤੇ ਗੋਲੀ ਉਸਦੀ ਗਰਦਨ ਵਿਚ ਲੱਗ ਗਈ। ਪੁਲਿਸ ਨੇ ਮਾਮਲਾ ਦਰਜ ਕਰਕੇ ਕਾਰਵਾਈ ਸ਼ੁਰੂ ਕਰ ਦਿੱਤੀ ਹੈ।